លោក ហ៊ុន សែន និង លោក ង្វ្រៀន តាន់យ៉ុង អញ្ជើញសម្ពោធបង្គោលព្រំដែនពីរកន្លែងក្នុងថ្ងៃតែមួយ
លោកនាយករដ្ឋមន្ត្រី ហ៊ុន សែន និង លោក ង្វ្រៀន តាន់យ៉ុង នាយករដ្ឋមន្រ្តីវៀតណាមនៅព្រឹកថ្ងៃសៅរ៍ទី២៦ធ្នូនេះបានធ្វើជាអធិបតីភាពរួមគ្នាសម្ពោធបង្គោលព្រំដែនអន្តរជាតិច្រកអូយ៉ាដាវលេខ៣០ខេត្តរតនគិរីទល់នឹងច្រកព្រំដែនអន្តរជាតិ ច្រកឡេថាញ់ស្រុកដុងកឺខេត្តយ៉ាឡាយរបស់វៀតណាម ។ ចេញពីខេត្តរតនគិរីលោកនាយករដ្ឋមន្រ្តីទាំងពីរបន្តដំណើរមកសម្ពោធបង្គោលព្រំដែនលេខ ២៧៥ នៅច្រកភ្នំដិន ខេត្តតាកែវបន្តទៀត។
ចុះផ្សាយនៅថ្ងៃ៖
ស្តាប់ - ០២:០១
ទន្ទឹមនេះភាគីទាំងពីរក៏បានដាក់សម្ពោធកំណាត់ផ្លូវជាតិប្រវែង៤៥០គីឡូម៉ែត្រនៅព្រំដែនអន្តរជាតិអូយ៉ាវដាវ។ ថ្លែងពីខេត្តរតនគិរី លោក ហ៊ុន សែន ថា ការបោះព្រំដែនរវាងកម្ពុជានឹងវៀតណាមសម្រេចបានលទ្ធផលល្អជាបន្តបន្ទាប់។ ហើយតាមរយៈលទ្ធផលនេះវាគឺជានិមិត្តរូបនៃកិច្ចសហប្រតិបត្តិការនៃប្រទេសទាំងពីរ។ លទ្ធផលនៃការបោះបង្គោលព្រំដែនល្អនេះ បើតាម លោក ហ៊ុន សែន ដោយសារការជួយរបស់រដ្ឋាភិបាលវៀតណាម។
យ៉ាងណាក៏ដោយ លោក ហ៊ុន សែន បន្តថា ការបោះបង្គោលព្រំដែនគោក រវាង កម្ពុជា-វៀតណាមនៅសល់តែប្រមាណជាង១៦ភាគរយទៀតប៉ុណ្ណោះ។ លោកបន្ថែមថា បន្ទាប់ពីដំណើរការបោះបង្គោលព្រំដែនគោកត្រូវបញ្ចប់ភាគីទាំងពីរនឹងបន្តការងារឈានទៅកំណត់ព្រំដែនសមុទ្រមួយដ៏ពេញលេញដោយគ្មានវិវាទ។ លោកនាយករដ្ឋមន្រ្តី ហ៊ុន សែន បានប្រកាសកាត់ខ្សែបូររួមគ្នាបន្តទៀតជាមួយ លោក ង្វ្រៀន តាន់យ៉ុង នាយករដ្ឋមន្រ្តីវៀតណាម នៅបង្គោលព្រំដែនលេខ ២៧៥ នៅច្រកភ្នំដិន ខេត្តាកែវ នៅសៀលថ្ងៃទី២៦ធ្នូនេះ។
បន្ថែមពីលើនេះ លោកនាយករដ្ឋមន្រ្តី ហ៊ុន សែន បានធ្វើការអំពាវនាវដល់កម្លាំងប្រដាប់អាវុធប្រចាំការនៅព្រំដែនឲ្យចូលរួមការពារនិងជួយបង្កលក្ខណៈងាយស្រួលដល់ការងារកំណត់ខ្សែបន្ទាត់និងបោះបង្គោលព្រំដែន ។ លោកនាយករដ្ឋមន្រ្តីក៏ បានអំពាវនាវទៅអាជ្ញាធរនិងប្រជាពលរដ្ឋខ្មែរសហការរួមគ្នាថែរក្សាបង្គោលព្រំដែនឲ្យបានឋិតថេរគង់វង្ស ដើម្បីកែប្រែតំបន់ព្រំដែនទៅជាតំបន់សន្តិភាព មិត្តភាព កិច្ចសហប្រតិបត្តិការ និង ការអភិវឌ្ឍន៍ជានិរន្ត។
សូមបញ្ជាក់ថា បញ្ហាព្រំដែនគឺជាប្រធានរបស់បក្សប្រឆាំងតែងតែធ្វើការរិះគន់មកលើរដ្ឋាភិបាល។ លោកស្រី កុយ ពិសី អនុប្រធានគណៈកម្មាធិការជាតិកិច្ចការព្រំដែនថា នេះជាលើកទី៣ហើយនៃ ការបោះបង្គោលព្រំដែនអន្តរជាតិ ច្រកអូយ៉ាដាវ លេខ៣០ ខេត្តរតនគិរី បន្ទាប់ពីកម្ពុជា បានបោះបង្គោលព្រំដែនលើកទី១ នៅបង្គោលលេខ១៧១នៅបាវិត ខេត្តស្វាយរៀង និងលើកទី២ នៅខេត្តកំពត បង្គោលលេខ៣១៤ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ