គម្រោងបាតុកម្មប្រឆាំងបាតុកម្មជំរុញឲ្យ លោក កឹម សុខា ស្នើទៅ លោក ស ខេង ការពារសុវត្ថិភាព
គម្រោងនៃការធ្វើបាតុកម្មប្រឆាំងបាតុកម្មរវាងអ្នកគាំទ្រគណបក្សប្រជាជនកម្ពុជានិងគណបក្សសង្គ្រោះជាតិ នាំឲ្យលោក កឹម សុខា កាលពីថ្ងៃទី១២កុម្ភៈ ដាក់សំណើទៅ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ចាត់វិធានការពារសន្តិសុខជូនគណបក្សសង្គ្រោះជាតិទាំងមូល។ ជាសំណើធ្វើឡើងតែមួយថ្ងៃប៉ុណ្ណោះបន្ទាប់ពីអ្នកគាំទ្រគណបក្ស ប្រជាជនកម្ពុជាគំរាមធ្វើបាតុកម្មរំលាយគណបក្សសង្គ្រោះជាតិចេញពី រដ្ឋសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោក កឹម សុខា ប្រធានស្ដីទីគណបក្សសង្គ្រោះជាតិបានជម្រាបទៅលោកឧបនាយក រដ្ឋមន្ត្រី ស ខេង តាមរយៈលិខិតចុះថ្ងៃទី១២កុម្ភៈថា ការគំរាមរៀបចំធ្វើបាតុកម្មរួមនិងការគំរាមរំលាយគណបក្សសង្គ្រោះជាតិពីបុគ្គលមួយចំនួនដែលបានផ្សព្វផ្សាយតាមរយៈបណ្ដាញសង្គម Facebook គឺជាការគំរាមកំហែងដល់សន្តិសុខ សុវត្ថិភាព របស់ថ្នាក់ដឹកនាំ និង សមាជិក សមាជិកា គណបក្សសង្គ្រោះជាតិទាំងមូល។
លោក កឹម សុខា ជឿថា ប្រសិនពុំមានការចាត់វិធានការពីអាជ្ញាធរមានសមត្ថកិច្ចនោះទេថ្នាក់ដឹកនាំគណបក្សសង្គ្រោះជាតិអាចនឹងប្រឈមចំពោះការរំលោភបំពានដល់រាងកាយដោយប្រការណាមួយជាក់ជាមិនខាន ប្រសិនបើមានបាតុកម្មកើតឡើងពិតមែន។ ហ៊ានថាដូច្នេះដោយលោក កឹម សុខា សំអាងថា កន្លងមកធ្លាប់មានករណីរំលោភបំពានលើអ្នកតំណាងរាស្ត្រគណបក្សសង្គ្រោះជាតិរួចហើយ។ លោក កឹម សុខា កាលពីថ្ងៃទី១១កុម្ភៈក៏បានអះអាងថា ទោះមានបាតុកម្មប្រឆាំងគណបក្សសង្គ្រោះជាតិយ៉ាងណាក៏ដោយ លោកនឹងមិនធ្វើដំណើរចេញទៅក្រៅប្រទេសទេ។
ឆ្លើយតបសំណើនេះ អ្នកនាំពាក្យក្រសួងមហាផ្ទៃ លោក ខៀវ សុភ័គ នៅមិនទាន់ទទួលបាននៅឡើយទេ។ តែលោកបង្ហើបថា សំណើនេះគណបក្សសង្គ្រោះអាចនឹងយកទៅដាក់ដោយផ្ទាល់នៅគេហដ្ឋានលោក ស ខេង ។ លោក ខៀវ សុភ័គ បដិសេពមិនធ្វើអធិប្បាយបន្ថែមដោយចាំការស្រាវជ្រាវជាមុនសិនលើសំណើនេះ។
តាមគម្រោងបាតុកម្មប្រឆាំងបាតុកម្មរវាងអ្នកគាំទ្រគណបក្សទាំងពីរនឹងចាប់ផ្ដើមធ្វើឡើងនៅពេលលោក នាយករដ្ឋមន្ត្រី ហ៊ុន សែន អញ្ជើញទៅដល់សហរដ្ឋអាមេរិក ទីដែលរៀបចំកិច្ចប្រជុំកំពូលអាស៊ាន អាមេរិក។ នៅទីនោះពលរដ្ឋខ្មែរ ដែលរដ្ឋាភិបាលចោទថា គណបក្សសង្គ្រោះជាតិនៅពីក្រោយពួកគេបន្តអះអាងថា នៅតែរៀបចំបាតុកម្មប្រឆាំងវត្តមានលោក ហ៊ុន សែន ។
ទន្ទឹមគ្នានេះអ្នកគាំទ្រលោក ហ៊ុន សែន ក្នុងស្រុកក៏បន្តគំរាមធ្វើបាតុកម្មប្រឆាំងគណបក្សសង្គ្រោះជាតិដើម្បីឈានទៅរំលាយបក្សនេះក្នុងរដ្ឋសភាផងដែរ។ ប្រឈមនិងការចោទប្រកាន់នេះគណបក្សសង្គ្រោះជាតិ តែងតែរលាស់ខ្លួន ចេញពីគម្រោងធ្វើបាតុកម្មដោយបានបដិសេពថា មិនមែនបាតុកម្មរៀបចំឡើងដោយគណបក្សសង្គ្រោះជាតិ។
សូមបញ្ជាក់ថា រូបភាពនៃបាតុកម្មប្រឆាំងបាតុកម្មបានកើតឡើងម្ដងរួចមកហើយ គ្រាដែល លោក ហ៊ុន សែន ចេញទៅបំពេញទស្សនកិច្ចនៅប្រទេសបារាំង ខណៈក្នុងស្រុកក៏កើតមានបាតុកម្មទម្លាក់លោក កឹម សុខា ចេញពីតំណែងអនុប្រធានទី១រដ្ឋសភា។ កាលណោះនាំឲ្យតំណាងរាស្ត្រគណបក្សសង្គ្រោះជាតិពីររូបគឺ លោក ញយ ចំរើន និង គង់ សភា រងការប្រើអំពើហិង្សាពីក្រុមបាតុករគាំទ្ររដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ