លោក ហ៊ុន សែន ចេញមុខការពារគ្រូពេទ្យមានវិជ្ជាជីវៈហើយបានរិះគន់គ្រូពេទ្យមួយចំនួនគិតលុយជាធំ
លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី២៩កុម្ភៈនេះបានរិះគន់ជាលើកដំបូងទៅលើវិជ្ជាជីវៈគ្រូពេទ្យខ្មែរ។ ក្នុងនោះលោកនាយករដ្ឋមន្ត្រីបាននិយាយចាក់ចំគ្រូពេទ្យមួយចំនួនថា គ្មានសីលធម៌ គិតតែពីយកលុយជាធំ ។ ប៉ុន្តែគ្រូពេទ្យមួយចំនួនទៀតមានការលះបង់ មានក្រមសីលធម៌ និង ការទទួលខុសត្រូវគួរឲ្យកោតសសើរ។ ទន្ទឹមនឹងនេះប្រមុខរដ្ឋាភិបាលក៏បានបដិសេពមិនទទួលយក ចំពោះការរិះគន់មកលើគ្រូពេទ្យនិងមន្ត្រីសុខាភិបាលដែលថា ៩៩ភាគរយនៃពេទ្យខ្មែរ មានតែគ្រូពេទ្យម្នាក់ប៉ុណ្ណោះល្អ។
ចុះផ្សាយនៅថ្ងៃ៖
ស្តាប់ - ០២:០០
ខណៈដែលវិស័យសុខាភិបាល និង វិជ្ជាជីវៈគ្រូពេទ្យខ្មែរកំពុងក្លាយជាផ្ទាំងស៊ីបនៃការរិះគន់របស់មជ្ឈដ្ឋានទូទៅ លោក ហ៊ុន សែន ចេញមុខការពារគ្រូពេទ្យមានវិជ្ជាជីវៈហើយបានរិះគន់គ្រូពេទ្យមួយចំនួនគិតលុយជាធំ។ លោកនាយករដ្ឋមន្ត្រីមិនប្រកែកទេហើយបានទទួលស្គាល់ថាគ្រូពេទ្យខ្មែរនៅមានចំណុចខ្វះខាតពិតប្រាកដមែន។ ប៉ុន្តែលោកជំទាស់ថា គ្រូពេទ្យខ្មែរមិនអាក្រក់ដល់ថ្នាក់៩៩ភាគរយហើយមានតែម្នាក់ប៉ុណ្ណោះដែលល្អ។ លោកហ៊ានអះអាងថា ភាគច្រើននៃគ្រូពេទ្យខ្មែរមានសីលធម៌។
ថ្លែងនៅក្នុងពិធីសម្ពោធអគារថ្មី នៃមន្ទីរពេទ្យបង្អែក ខេត្តព្រះសីហនុនៅព្រឹកថ្ងៃចន្ទទី២៩កុម្ភៈ លោក ហ៊ុន សែន បានបង្ហាញពីលះបង់យ៉ាងធំធេងរបស់គ្រូពេទ្យ។ហើយការលះបង់នេះមានតម្លៃស្មើគ្នាដូច ទាហ៊ាន នគរបាល កងរាជអាវុធហត្ថ ជាដើម ដែលគ្មានថ្ងៃឈប់សម្រាក់ជួបជុំក្រុមគ្រួសារដូចពលរដ្ឋទូទៅចំពោះថ្ងៃបុណ្យទាន។
ប្រមុខរដ្ឋាភិបាលក៏បានរិះគន់ចំពោះការជំរុញនាពេលកន្លងមកឲ្យមានការធ្វើបដិវត្តគ្រូពេទ្យ ដែលលោកចាត់ទុកថា ជាការប្រមាថមកលើគ្រូពេទ្យ។ លោកក៏បានអំពាវនាវឲ្យគ្រូពេទ្យធ្វើការអប់រំគ្រូពេទ្យគ្នាឯងដើម្បីស្តារមុខមាត់មន្ទីពេទ្យកុំឲ្យខូចកេរ្តិ៍ឈ្មោះដោយសារពេទ្យតែពីរបីនាក់។ និងបង្កើនការយកចិត្តទុកដាក់ព្យាបាលអ្នកជំងឺ។
គួររម្លឹកជូនថា ប្រតិកម្មរបស់លោកនាយករដ្ឋមន្ត្រី ហ៊ុន សែន ដែលមិនសំដៅឲ្យចំឈ្មោះបុគ្គលតែអាចគេសន្និដ្ឋានបានថាសំដៅទៅលើ លោកវេជ្ជបណ្ឌិត គួច ម៉េងលី ដែលមានងារជាឧកញ៉ា និងជាប្រធានក្រុមហ៊ុនមួយចំនួននៅស្រុកខ្មែរ និង លោក កែម ឡី អ្នកស្រាវជ្រាវបញ្ហាសង្គម។
លោកម៉េងលីថា «វិស័យសុខាភិបាលយើងបើលោកឲ្យពិន្ទុពី ១ ដល់ ១០ លោកឲ្យ ២ ពិន្ទុ»។ក្រោយការលើកឡើងនេះនាំឲ្យមានភាពចម្រូងចម្រាសខ្លាំងរវាងលោកម៉េងលីនិង គណៈវិជ្ជាជីវៈសុខាភិបាលដែលតម្រូវឲ្យមានការសុំទោសជាសាធារណៈ។ទន្ទឹមនឹងភាពចម្រូងចម្រាស់នេះលោក កែម ឡី បានលើកឡើងថាវិស័យសុខាភិបាលកម្ពុជាគួរតែធ្វើបដិវត្តគ្រូពេទ្យ។ សូមបញ្ជាក់ថា នាពេលបច្ចុប្បន្ននេះវិស័យសុខាភិបាលកម្ពុជាមានគ្រូពេទ្យបំរើការងារចំនួនពីរម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ