លោក ឡុង ឌីម៉ង៖សាលាក្រុងអនុញ្ញាតឲ្យមានការដង្ហែក្បួនមាឃបូជាតែសម្ដេចព្រះសង្ឃរាជលុបចោលការហែក្បួន
លោក ឡុង ឌីម៉ង អ្នកនាំពាក្យសាលារាជធានីភ្នំពេញបានបញ្ជាក់ប្រាប់វិទ្យុបារាំងថា សាលាក្រុងបានអនុញ្ញាតឲ្យមានការដង្ហែក្បួនមាឃបូជា ទៅតាមការស្នើសុំរបស់សម្ដេចព្រះសង្ឃរាជ មិនមែនមិនអនុញ្ញាត ដូចការចោទប្រកាន់ពីបណ្ដាញសង្គមឬការចុះផ្សាយរបស់បណ្ដាញសារព័ត៌ មាននោះទេ។ ប៉ុន្តែសាលាក្រុងបានស្នើសុំត្រឡប់ទៅវិញកាត់បន្ថយសម្ងាយផ្លូវ ដើម្បីកុំឲ្យក្បួនដង្ហែប៉ះគ្នា ជាមួយក្បួន គណៈប្រតិភូថៃ ដែលកំពុងបំពេញទស្សនកិច្ចនៅកម្ពុជា។ ប៉ុន្តែយ៉ាងក៏ដោយការហែក្បួននេះត្រូវបានលុបចោលទាំងស្រុងពី សំណាក់សម្ដេចព្រះសង្ឃរាជ នន្ទ ង៉ែត ដោយព្រះអង្គយល់ថា កុំឲ្យមានការប៉ះពាល់ដល់ការធ្វើចរាចរណ៍សាធារណៈ។
ចុះផ្សាយនៅថ្ងៃ៖
ស្តាប់ - ០១:៥១
ទោះជាមិនមានការហែក្បួនក៏ពិតមែនប៉ុន្តែការប្រារព្ធពិធីមាឃបូជានៅតែបន្តធ្វើដដែលនៅវត្តបទុមវត្តី។ លោក ឡុង ឌីម៉ង ពន្យល់ថា តាមគម្រោងក្បួនមាឃបូជាហែចេញពីវត្តបទុមវត្តីឡើងមកផ្លូវ២៤០ កាត់តាមផ្លូវព្រះស៊ីសុវត្ថិ បត់មកត្បូង ហែជុំវិញរូបសំណាក់សម្ដេច ជួន ណាត រួចហែបន្តកាត់ផ្លូវសុរាម្រិតនិងមុខផ្ទះលោកនាយករដ្ឋមន្ត្រី ហ៊ុន សែន បន្តចូលផ្លូវនរោត្តម។ ប៉ុន្តែផ្លូវនរោត្តមត្រូវបានសាលាក្រុងស្នើសុំមិនឲ្យមានការហែក្បួនឆ្លងកាត់ព្រោះគណៈប្រតិភូថៃធ្វើដំណើស្របពេលជាមួយគ្នា។
តាមរយៈការស្នើសុំរបស់សាលាក្រុងនេះសម្ដេចព្រះសង្ឃរាជ នន្ទ ង៉ែត សម្រេចមិនដង្ហែក្បួនដើម្បីកុំឲ្យប៉ះពាល់ដល់ការធ្វើចរាចរណ៍សាធារណៈនិងលើកម្មវិធីនេះទៅធ្វើនៅឆ្នាំក្រោយ។ លោក ឡុង ឌីម៉ង បញ្ជក់ថា សាលាក្រុងគ្មានសិទ្ធិហាមឃាត់ចំពោះគម្រោងនៃការហែក្បួនមាឃបូជានោះទេ ព្រោះនេះជាសំណើរបស់សម្ដេចព្រះសង្ឃរាជ។ ខណៈមានការប្រៀបធៀបរវាងគម្រោងនៃការហែក្បួនមាឃបូជានិងពិធីហែអ្នកតារបស់ចិនសាលាក្រុងក៏បានកំណត់ផ្លូវសម្រាប់ក្រុមអ្នកតាធ្វើការហែក្បួនដែរពោលគឺមិនមែនផ្ដល់សិទ្ធិឲ្យធ្វើការហែក្បួនដោយសេរីនោះទេ។
សូមបញ្ជាក់ថា ដូចរៀងរាល់ឆ្នាំដែរ ពុទ្ធបរិស័ទ អ្នកកាន់ព្រះពុទ្ធសាសនាបាន ប្រារព្ធពិធីបុណ្យមាឃបូជា នៅទីតាំងរៀងៗខ្លួន។ ពិធីនេះត្រូវបានរដ្ឋាភិបាលរៀបចំជាផ្លូវការនៅបរិវេណព្រះមហា សក្យមុនីចេតិយ ភ្នំព្រះរាជទ្រព្យ ខេត្តកណ្ដាល ដោយមានការចូលរួមយ៉ាងច្រើនកុះករពីព្រះសង្ឃ យាយជី តាជី និង ពលរដ្ឋទូទៅ ។ពិធីនេះប្រារព្ធឡើងរយៈពេលពីរថ្ងៃ ចាប់ពីថ្ងៃចន្ទ ទី២២ ដល់ថ្ងៃអង្គារ ទី២៣ ខែកុម្ភៈ ឆ្នាំ២០១៦នេះ។
មាឃបូជាជាបុណ្យមួយសម្រាប់ពុទ្ធសាសនា ធ្វើក្នុងថ្ងៃពេញបូណ៌មីខែមាឃ រំឮកដល់ សាវកសន្និបាត “ការប្រជុំសាវ័ក” នៃព្រះសម្ពុទ្ធដែលហៅថា ចាតុរង្គសន្និបាត “ការប្រជុំមានអង្គបួន”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ