អាជ្ញាធររកមិនទាន់ឃើញមូលហេតុករណីបាញ់សម្លាប់សមត្ថកិច្ចការពារព្រៃឈើខេត្តព្រះវិហារ
អាជ្ញាធរខេត្តព្រះវិហាកំពុងស៊ើបអង្កេតករណីបាញ់សម្លាប់សមត្ថកិច្ចការពារព្រៃឈើពីរនាក់ និង របួសធ្ងន់ម្នាក់ នៅតំបន់ការពារព្រៃឈើ ក្នុងខេត្តព្រះវិហារកាលពីម៉ោង២យប់ទាបភ្លឺឈានចូល ថ្ងៃទី០៧ វិច្ឆិកា ២០១៥ ។ មិនទាន់រកឃើញពីមូលហេតុករណីបាញ់ប្រហារនេះទេ តែតាមការសន្និដ្ឋានជំហានដំបូងរបស់មន្ត្រីអាដហុកប្រចាំខេត្តព្រះវិហារថា ករណីបាញ់សម្លាប់នេះ អាចមន្ត្រីរកស៊ីខុសច្បាប់ជាអ្នកនៅពីក្រោយ។
ចុះផ្សាយនៅថ្ងៃ៖
ស្តាប់ - ០១:៤៣
អាជ្ញាធរខេត្តព្រះវិហាររកមិនទាន់ឃើញមូលហេតុនៃករណីបាញ់ សម្លាប់យ៉ាងសាហាវទៅលើមន្រ្តីការពារព្រៃឈើនៅក្នុងខេត្តព្រះវិហារ នៅឡើយទេ។ នេះបើតាមការបញ្ជាក់ពីលោក អ៊ុំ ម៉ារ៉ា អភិបាលខេត្តព្រះវិហារ។ លោក អ៊ុំ ម៉ារ៉ា បានបញ្ជាក់ថា អាជ្ញាធរកំពុងបើកការស៊ើបអង្កេតលើករណីនេះ។ ប៉ុន្តែការសន្និដ្ឋានជាជំហានដំបូង មានការលើកឡើងថា ការចុះល្បាតរបស់ក្រុមមន្ត្រីការពារព្រៃឈើ អាចនឹងជួបក្រុមឈ្មួញទុច្ចរិត ជាអ្វីដែលលោកចាត់ទុកថា ក្រុមអ្នកល្បាតជាសត្រូវរបស់អ្នកបំផ្លាញធនធានធម្មជាតិ។
សូមបញ្ជាក់ថា កាលពីវេលាម៉ោង១រំលងអធ្រាត្រ ថ្ងៃទី៦ឈានចូលថ្ងៃទី៧ ខែវិច្ឆិកាសមត្ថកិច្ចការពារព្រៃឈើ២នាក់ត្រូវបានគេបាញ់សម្លាប់ និងម្នាក់ទៀតរងរបួសធ្ងន់ខណៈពួកគេកំពុងដេកក្នុងជំរុំក្នុងព្រៃ ក្នុងស្រុកជាំក្សាន្តខេត្តព្រះវិហារ ក្នុងពេលដែលមន្ត្រីទាំងនោះ ចុះបំពេញបេសកកម្មការពារព្រៃឈើជាមួយនឹងក្រុមអភិរក្សសត្វព្រៃ(WCS)។ ជនរងគ្រោះដែលស្លាប់មានឈ្មោះ សៀង ណារ៉ុង ជាប្រធានក្រុមល្បាតរដ្ឋបាលព្រៃឈើ និងម្នាក់ទៀតឈ្មោះ សាប់ យស់ ជាមន្ត្រីនគរបាលស្រុកឆែប។ ចំណែកអ្នករងរបួស ឈ្មោះ ភេទ សុភាន់ ជាមន្ត្រីនគរបាលវរសេនាតូចការពារព្រំដែនគោកលេខ១០៥ ។
ករណីបាញ់ប្រហារនេះ កើតឡើងនៅចំណុចភូមិសែនរុងរឿង៣ ឃុំមរតក ស្រុកជាំក្សាន្ត ខេត្តព្រះវិហារ។ លោក ឡោ រស្មី អ្នកនាំពាក្យក្រសួងកសិកម្ម រុក្ខាប្រមាញ់និងនេសាទ បានចាត់ទុកករណីបាញ់សម្លាប់នេះថា ជារឿងដែលមិនអាចលើកលែងបានទេ។
ចំណែកឯ លោក ឡោ ចាន់ មន្ត្រីសិទ្ធិមនុស្សអាដហុកប្រចាំខេត្តព្រះវិហារ បានចាត់ទុកករណីបាញ់សម្លាប់នេះថា ជាទង្វើរបស់ក្រុមឈ្មួញអ្នកមានអំណាចរកស៊ីឈើខុសច្បាប់ ជាអ្នកនៅពីក្រោយ។ លោក ឡោ ចាន់ ឲ្យដឹងថា មន្រីអភិរក្សព្រៃឈើទាំងពីរូបនេះត្រូវបានសម្លាប់នៅកណ្ដាលព្រៃ ក្នុងព្រះវិហារដែលជាតំបន់មួយត្រូវប៉ាន់សម្រាប់ក្រុមឈ្មួញរកស៊ី ខុសច្បាប់។ លោកថា ហេតុការណ៍នេះ បានកើតឡើងក្រោយពេលដែលក្រុមល្បាត ចុះចាប់ម៉ាស៊ីនអារឈើពីក្រុមឈ្មួញខុសច្បាប់ចំនួន២គោលដៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ