ក្រុមស្ត្រីបង្កើតកម្មវិធីលើទូរស័ព្ទដៃទំនើប ដើម្បីចូលរួមបញ្ឈប់ហិង្សាលើស្ត្រី
នៅថ្ងៃទី២៧ ខែធ្នូ នេះ ក្រុមស្ត្រីបានដាក់ផ្សព្វផ្សាយពីការប្រើប្រាស់កម្មវិធីជួយ ស្ត្រីតាមរយៈប្រព័ន្ធទូរស័ព្ទដៃទំនើប ដើម្បីចូលរួមក្នុងការបញ្ឈប់អំពើហិង្សាលើស្ត្រី។ នាយិកាកម្មវិធីនៃអង្គការបន្ទាយស្ត្រី លោកស្រី ចាន់ សោភ័ណ្ឌ បានបញ្ជាក់ថាបច្ចុប្បន្ននេះ កម្ពុជាមានស្ត្រីប្រមាណជិតពាក់កណ្តាលនៃប្រជាពលរដ្ឋ១៤លាននាក់ បានទទួលរងគ្រោះដោយអំពើហិង្សាពីបុរស ហើយក្នុងនោះមានស្ត្រី២៤ភាគរយ មិនទទួលបានការអប់រំ ដើម្បីពង្រីកចំណេះដឹងរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:០៨
កម្មវិធីសម្រាប់ទូរស័ព្ទដៃទំនើបចំនួនពីរត្រូវបានដាក់ផ្សព្វផ្សាយឲ្យប្រើប្រាស់នៅថ្ងៃទី២៧ ខែធ្នូ នេះ ដោយក្រុមបណ្តាញពង្រឹងសិទ្ធិអំណាចស្ត្រីវ័យក្មេងនៅកម្ពុជា និងអង្គការ ActionAid សម្រាប់លុបបំបាត់ហិង្សាលើស្ត្រី។ កម្មវិធីទូរស័ព្ទដៃទាំងនោះ មានដូចជា “Safe Agent 008” និង “Krousa Koumrou” ដែលអ្នកប្រើប្រាស់ទូរស័ព្ទដៃទំនើបៗ អាចចូលទៅទាញយកមកប្រើប្រាស់នៅលើទូរស័ព្ទដៃបាន លើកលែងតែទូរស័ព្ទ iPhone។
លក្ខណៈពិសេសនៃកម្មវិធីទាំងអស់នោះ មានដូចជា ការបង្ហាញពីគំនូរជីវចលអំពើហិង្សាក្នុងគ្រួសារ សំនួរចម្លើយ បញ្ជីទំនាក់ទំនងទៅកាន់ស្ថាប័ន ដែលធ្វើការទាក់ទងនឹងស្រ្តី ការផ្ញើសារដោយភ្ជាប់ជាមួយទីតាំងអ្នកប្រើប្រាស់ មានសម្លេងស៊ីរ៉ែនសម្រាប់ស្វែងរកជំនួយនៅទីសាធារណៈ។ បន្ថែមពីនេះកម្មវិធីទាំងនោះ នឹងអាចជួយផ្លាស់ប្តូរ ព្រមទាំងអាចជាឧបករណ៍អប់រំ ដើម្បីបង្កើនចំណេះដឹងក្នុងការបញ្ឈប់អំពើហិង្សាក្នុងគ្រួសារផងដែរ។
លោកស្រី ចាន់ សោភ័ណ្ឌ នាយិកាកម្មវិធីនៃអង្គការបន្ទាយស្ត្រី បានបញ្ជាក់ថាការបង្កើតកម្មវិធីសម្រាប់ទូរស័ព្ទដៃនេះឡើង គឺដោយសារតែបច្ចុប្បន្ននេះមានអ្នកប្រើប្រាស់ទូរស័ព្ទដៃទំនើបច្រើន ដូចជានៅទីក្រុង និងទីប្រជុំជនក្នុងខេត្តទាំងអស់របស់ប្រទេសកម្ពុជា ហើយកម្មកររោងចក្រកាត់ដេរភាគច្រើនក៏មានប្រើប្រាស់ទូរស័ព្ទដៃទំនើបទាំងអស់នោះដែរ។
ក្រៅពីប្រើប្រាស់កម្មវិធីទូរស័ព្ទដៃ ដើម្បីចូលរួមលុបបំបាត់ហិង្សាលើស្ត្រី ក៏មានដែរការរៀបចំកម្មវិធីមួយចំនួនទៀត ដូចជាកម្មវិធីមួយរយកោដិសម្លេងលើកឡើងពីការបញ្ឈប់អំពើហិង្សាលើស្ត្រី ដែលធ្វើឡើងនៅថ្ងៃទី១៤ កុម្ភៈ។
លោកស្រីបានបន្តទៀតថា បច្ចុប្បន្ននេះនៅក្នុងប្រទេសកម្ពុជា ការប្រើអំពើហិង្សាដែលធ្វើឲ្យប៉ះពាល់ដល់ផ្លូវចិត្តស្ត្រី គឺមានច្រើន បើប្រៀបធៀបនឹងរូបភាពហិង្សាដទៃទៀត ប៉ុន្តែប្រជាពលរដ្ឋខ្មែរមិនបានរាប់ទង្វើនេះថាជាហិង្សាទេ។ បើតាមលោកស្រីហិង្សាដែលធ្វើឲ្យប៉ះពាល់ដល់ផ្លូវចិត្តមានដូចជាការជេរប្រមាថជាដើម។
សម្រាប់រដ្ឋាភិបាលកម្ពុជាវិញ កន្លងមកក៏មានការបង្កើតច្បាប់ស្តីពីការទប់ស្កាត់អំពើហិង្សា ក្នុងគ្រួសារ ដែលច្បាប់នេះត្រូវបានរដ្ឋសភាកម្ពុជាអនុម័តកាលពីថ្ងៃទី១៦ ខែកញ្ញា ឆ្នាំ២០០៥ ហើយក៏មានផែនការជាតិដើម្បីការពារស្ត្រីពីអំពើហិង្សា ឆ្នាំ២០១៤ ដល់ឆ្នាំ២០១៨ ដែលបានអនុម័តកាលពីថ្ងៃទី៥ ខែធ្នូ ឆ្នាំ២០១៤ កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ