កុមារកម្ពុជាប្រមាណ១ ០០០ នាក់ស្លាប់ក្នុងមួយឆ្នាំៗដោយសារទឹកមិនស្អាត
នៅតំបន់ជនបទរបស់ប្រទេសកម្ពុជា មានទឹកស្អាតប្រើប្រាស់ប្រមាណតែជាង៥០ភាគរយតែប៉ុណ្ណោះ ហើយកង្វះទឹកស្អាតប្រើប្រាស់ បានបណ្តាលឲ្យប្រជាជនរងនូវជំងឺផ្សេងៗ ពិសេសគឺកុមារ។ ក្នុងនោះ មានកុមារប្រហែល១ ០០០នាក់ បានស្លាប់ក្នុងមួយឆ្នាំៗដោយសារទឹកមិនស្អាត និងជំងឺរាក។ នេះបើតាមការអះអាងរបស់មន្ត្រីនៃអង្គការយូនីសេហ្វកម្ពុជា។
ចុះផ្សាយនៅថ្ងៃ៖
ស្តាប់ - ០២:១២
នៅកម្ពុជា ទឹកស្អាតមិនទាន់ត្រូវបានផ្គត់ផ្គង់បានគ្រប់គ្រាន់នៅឡើយទេ។ នៅទីជនបទ ប្រព័ន្ធទឹកស្អាតប្រមាណ៥០ភាគរយតែប៉ុណ្ណោះដែលបានផ្តល់សេវាជូនដល់ប្រជាជន ហើយនៅទីប្រជុំជននិងតំបន់ជាយក្រុង ក៏មានប្រព័ន្ធទឹកស្អាតមិនទាន់គ្រប់គ្រាន់ដែរ។
ការប្រើប្រាស់ទឹកគ្មានអនាម័យនិងមិនបានសម្លាប់មេរោគឬបាក់តេរី បានធ្វើឲ្យប្រជាជនទទួលរងនូវជំងឺផ្សេងៗ ពិសេសជំងឺរាករូស។ តាមរបាយការណ៍ បានបង្ហាញថា អ្នកដែលរងគ្រោះច្រើនជាងគេ គឺកុមារ។ ពោលគឺកុមារខ្មែរជាមធ្យម ១ ០០០នាក់ បានបាត់បង់ជីវិតដោយសារតែជំងឺរាក ដែលបណ្តាលពីប្រើប្រាស់និងទទួលទានទឹកមិនស្អាត។ នេះបើតាមការបញ្ជាក់របស់ លោក មាស ប៊ុនលី មន្ត្រីរបស់អង្គការយូនីសេហ្វកម្ពុជា។
តាមមន្ត្រីរូបនេះ ដើម្បីឲ្យសេវាទឹកស្អាតបានផ្គត់ផ្គង់ដល់ប្រជាជាពលរដ្ឋគ្រប់គ្នា ក្រសួងអភិវឌ្ឍជនបទនិងអង្គការពាក់ព័ន្ធត្រូវធ្វើការច្រើនជាងមុន ដើម្បីការចែកចាយសេវាទឹកស្អាតឲ្យដល់មូលដ្ឋាននិងទីជនបទដាច់ស្រយាល។ គឺធ្វើឲ្យមាននិរន្តភាពចំពោះការគ្រប់គ្រងនិងផ្គត់ផ្គង់ទឹកស្អាត។ មិនតែប៉ុណ្ណោះ លោក មាស ប៊ុនលី បានរម្លឹកថា ពលរដ្ឋត្រូវតែផ្លាស់ប្តូរឥរិយាបថនិងប្រយ័ត្នប្រយែងចំពោះការថែរក្សាសុខភាពនិងអនាម័យ។
សម្រាប់ ទិវាទឹកប្រទេសកម្ពុជាឆ្នាំ២០១៥ នៅថ្ងៃទី២១ ខែមីនានេះ អង្គការយូនីសេហ្វ និងក្រសួងអភិវឌ្ឍន៍ជនបទ ព្រមទាំងអង្គការសុខភាពពិភពលោក បានរៀបចំការពិភាក្សាអំពីប្រធានបទទឹកនិងការអភិវឌ្ឍប្រកបដោយចីរភាព នៅឯមជ្ឈមណ្ឌលសហប្រតិបត្តិការ កម្ពុជា-ជប៉ុន។
អ្នកចូលរួមប្រមាណជាង២០០នាក់ សុទ្ធសឹងតែជាសិស្សនិងនិស្សិត។ គោលបំណងនៃសិក្ខានេះ គឺជំរុញឱ្យយុវនិស្សិតយល់ដឹងស្តីការរប្រើប្រាស់ទឹកស្អាត និងធ្វើយ៉ាងណាបព្ឈប់ជំងឺរាកនិងទឹកគ្មានមេរោគ។ បន្ទាប់ពីសិក្ខាសាលាពេញមួយព្រឹក ពួកគេនឹងធ្វើទស្សនកិច្ចសិក្សាទៅកាន់គម្រោងទឹកសហគមន៍ ដែលមានលក្ខណៈច្នៃប្រឌិត មានឈ្មោះថា គម្រោងទឹកស្អាត១០០១ នៅក្នុងឃុំក្រាំងយ៉ូវ ស្រុកស្អាង ខេត្ដកណ្ដាល។
គួរជម្រាបជូនដែរថា គម្រោងនេះ បានផ្ដល់នូវជម្រើសទឹកស្អាត សម្រាប់បរិភោគដល់ប្រជាពលរដ្ឋ ដែលរស់នៅតាមតំបន់ ដែលរងផលប៉ះពាល់ពីសារជាតិអាសេនិច។ គម្រោងទឹកស្អាត១០០១ បានផ្គត់ផ្គង់ទឹកក្នុងតម្លៃសមរម្យដល់ប្រជាពលរដ្ឋ ចំនួន ៨២១ គ្រួសារ និងផ្ដល់ទឹកដោយមិនគិតថ្លៃដល់សិស្សជាង ២.០០០ នាក់ នៅតាមសាលាមួយចំនួនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ