តុលាការបើកសវនាការលើមនុស្ស១៦នាក់ ពាក់ព័ន្ធនឹងបទល្មើសបូមខ្សាច់ខុសច្បាប់
មនុស្សចំនួន១៦នាក់ ដែលត្រូវបានចាប់ខ្លួនពាក់ព័ន្ធនឹងបទល្មើសបូមខ្សាច់ខុសច្បាប់ ត្រូវបញ្ជូនទៅកាន់តុលាការនៅថ្ងៃសៅរ៍នេះ។ បើតាមក្រសួងរ៉ែ និងថាមពល មនុស្សចំនួន១៦នាក់នេះ ត្រូវបានចាប់ខ្លួននៅរាជធានីភ្នំពេញ និងនៅខេត្តកណ្ដាល។ គួរជម្រាបជូនថា ការចាប់ខ្លួននេះធ្វើឡើងភ្លាមៗ បន្ទាប់ពីក្រសួងរ៉ែនិងថាមពលបានព្រមានដល់ម្ចាស់អាជីវកម្មខ្សាច់ថា ពួកគេអាចប្រឈមនឹងវិធានាការច្បាប់ ប្រសិនបើនៅតែបន្តបូមខ្សាច់ដោយគ្មានអាជ្ញាបណ្ណពីក្រសួង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
តុលាការបើកសវនាការលើមនុស្ស១៦នាក់ ពាក់ព័ន្ធនឹងបទល្មើសបូមខ្សាច់ខុសច្បាប់ នៅថ្ងៃសៅរ៍ ទី៤ខែមេសានេះ។ នេះបើតាមលោកឌិត ទីណា រដ្ឋលេខាធិការក្រសួងរ៉ែ និងថាមពល ដែលមានប្រសាសន៍ប្រាប់វិទ្យុបារាំងអន្ដរជាតិ នៅព្រឹកថ្ងៃសៅរ៍នេះ។ បើតាមលោក ឌិត ទីណា ក្នុងចំណោមមនុស្សទាំង១៦នាក់នោះ ១០នាក់ត្រូវបានបញ្ជូនទៅកាន់សាលាដំបូងរាជធានីភ្នំពេញហើយ នៅព្រឹកថ្ងៃសៅរ៍នេះ។ ចំណែក៦នាក់ផ្សេងទៀត ត្រូវគ្រោងបញ្ជូនទៅកាន់សាលាដំបូងខេត្តកណ្ដាល ឲ្យទាន់ល្ងាចថ្ងៃសៅរ៍នេះផងដែរ។
សូមរំលឹកជូនថា កាលពីថ្ងៃទី១ និងថ្ងៃទី២កន្លងទៅ ក្រសួងរ៉ែនិងថាមពល សហការជាមួយកងរាជអាវុធហត្ថ បានចាប់សាឡង់បូមខ្សាច់ខុសច្បាប់ចំនួន៦ និងមនុស្សចំនួន១៦នាក់។ ក្នុងចំណោមសាឡង់ដែលចាប់បានទាំង៦នោះ មាន១នៅត្រង់ចំណុចវាលស្បូវ ២នៅចន្លោះកោះពេជ្រនិងអរិយក្សត្រ ២នៅឃុំព្រែកតាមាក់ ស្រុកខ្សាច់កណ្ដាល និង១ទៀតនៅឃុំព្រែកជ្រៃ ស្រុកកោះធំ ខេត្តកណ្ដាល។
យុទ្ធនាការបង្ក្រាបសាឡង់បូមខ្សាច់ខុសច្បាប់ពីសំណាក់អាជ្ញាធរ និងក្រសួងមានសមត្ថកិច្ចនាពេលនេះ ធ្វើឡើងភ្លាមៗបន្ទាប់ពីក្រសួងរ៉ែនិងថាមពល បានរៀបចំជំនួបបិទទ្វារជាមួយម្ចាស់អាជីវកម្មខ្សាច់ចំនួន២០ នៅសណ្ឋាគារសាន់វ៉េ កាលពីថ្ងៃពុធ ទី១ខែមេសាកន្លងទៅ។ នៅក្នុងជំនួបនោះ ក្រសួងរ៉ែនិងថាមពលក៏បានព្រមានទៅដល់ម្ចាស់អាជីវកម្មខ្សាច់ផងដែរថា ពួកគេអាចប្រឈមនឹងវិធានាការច្បាប់ ប្រសិនបើនៅតែបន្តបូមខ្សាច់ដោយគ្មានអាជ្ញាបណ្ណពីក្រសួង។
រដ្ឋលេខាធិការក្រសួងរ៉ែ និងថាមពល លោក ឌិត ទីណា បានគូសបញ្ជាក់ប្រាប់វិទ្យុបារាំងទៀតថា ចាប់ពីពេលនេះតទៅ ការល្បាតនិងចុះបង្ក្រាបសាឡង់បូមខ្សាច់ខុសច្បាប់ នឹងធ្វើឡើងជាបន្តបន្ទាប់។ ទន្ទឹមគ្នានេះ លោករដ្ឋលេខាធិការ ក៏បានអំពាវនាវដល់ប្រជាពលរដ្ឋ ឲ្យចូលរួមរាយការណ៍ពីបទល្មើសបូមខ្សាច់នានា នៅខេត្តកណ្ដាល និងរាជធានីភ្នំពេញផងដែរ។ ការរាយការណ៍អាចធ្វើបានតាមរយៈលេខទូរសព្ទ៣ខ្ទង់ គឺ៧២៧ ឬតាមកម្មវិធី WhatsApp តាមរយៈលេខទូរសព្ទ ០៩៥ ៧២៧ ៧២៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ