សាលាក្តីខ្មែរក្រហម៖ អៀង សារី ត្រូវនាំមកកាត់ទោសក្នុងសំណុំរឿង០០២
អង្គបុរេជំនុំជម្រះរបស់សាលាក្តីមេខ្មែរក្រហម បានបញ្ជាក់ថា បើទោះបីជាអៀង សារី អតីតរដ្ឋមន្ត្រីការបរទេសខ្មែរក្រហម ត្រូវបានតុលាការបដិវត្តន៍ប្រជាជនកម្ពុជាកាត់ទោសកំបាំងមុខ កាលពីឆ្នាំ១៩៧៩ និងត្រូវព្រះមហាក្សត្រព្រះរាជទានលើកលែងទោសកាលពីឆ្នាំ១៩៩៦ ក៏ប៉ុន្តែអតីតប្រមុខការទូតខ្មែរក្រហម អាយុ ៨៦ ឆ្នាំ លោក អៀង សារី នៅតែត្រូវនាំមកកាត់ទោសនៅតុលាការចម្រុះ ដែលបង្កើតឡើងដោយរដ្ឋាភិបាលកម្ពុជានិងអង្គការសហប្រជាជាតិនាពេលនេះ។ សាលាក្តីខ្មែរក្រហម ក៏បានសម្រេចផងដែរ ដើម្បីជ្រើសរើស អតីតមេគុកទួលស្លែង កាំង ហ្កេកអ៊ាវ ហៅ ឌុច ធ្វើជាសាក្សី ក្នុងសំណុំរឿង ០០២ ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរ
មានអាយុ ៨៦ ឆ្នាំ លោក អៀង សារី អតីតរដ្ឋមន្ត្រីការបរទេសខ្មែរក្រហម សព្វថ្ងៃជាប់ឃុំឃាំង នៅតុលាការខ្មែរក្រហម។លោក អៀង សារី ជាប់ចោទពីបទឧក្រិដ្ឋកម្មសង្គ្រាម ឧក្រិដ្ឋកម្មប្រឆាំងមនុស្សជាតិ និងបទប្រល័យពូជសាសន៍ នៅក្នុងសំណុំរឿង០០២ ជាមួយអតីតមេខ្មែរក្រហមវ័យជរា ៣ រូបទៀត គឺ នួន ជា ខៀវសំផន និងលោកស្រី អៀងធីរិទ្ធ។
កាលពីខែមករា សហមេធាវីការពារលោក អៀង សារី បានប្តឹងឧទ្ធរណ៍ចំពោះការបន្តឃុំខ្លួន លោក អៀង សារី ចាប់តាំងពីឆ្នាំ២០០៧ ដើម្បីរង់ចាំកាត់ទោសក្នុងសំណុំរឿង០០២។ សហមេធាវីបានលើកឡើងថា លោក អៀងសារី ត្រូវបានកាត់ទោសម្តងហើយ កាលពីឆ្នាំ១៩៧៩។ អតីតរដ្ឋមន្ត្រីការបរទេសខ្មែរក្រហមរូបនេះ ក៏ត្រូវបានព្រះមហាក្សត្រ ព្រះរាជទានលើកលែងទោស កាលពីឆ្នាំ១៩៩៦។ ដូច្នេះតាមច្បាប់កម្ពុជា គេមិនអាចយកលោក អៀង សារី ទៅកាត់ទោស នៅសាលាក្តីខ្មែរក្រហមដែលបង្កើតឡើងដោយរដ្ឋាភិបាលកម្ពុជា និងអង្គការសហប្រជាជាតិបានឡើយ។
ក៏ប៉ុន្តែកាលពីថ្ងៃទី១១មេសា ឆ្នាំ២០១១ អង្គបុរេជំនុំជម្រះ របស់សាលាក្តីចម្រុះខ្មែរក្រហម បានចេញដីកាបដិសេធ ដោយលើកឡើងថា តុលាការបដិវត្តន៍ប្រជាជនកម្ពុជា ដែលបានកាត់ទោសមេដឹកនាំខ្មែរក្រហម កាលពីឆ្នាំ១៩៧៩ ក្រោយបែកសម័យប៉ុលពត ធ្វើឡើងមិនស្របតាមស្តង់ដារ និងមិនអាចទទួលយកបាន។ មួយវិញទៀត ការលើកលែងទោស លោក អៀង សារី កាលពីឆ្នាំ១៩៩៦ ក៏មិនអាចរារាំងសាលាក្តីចម្រុះ មិនឲ្យជំនុំជម្រះលោកអៀងសារីឡើយ ដោយសារតែខ្មែរក្រហម កាលណោះ មិនគោរពកិច្ចព្រមព្រៀងសន្តិភាព ទីក្រុងប៉ារីស ថ្ងៃ២៣តុលា ឆ្នាំ១៩៩១ ឡើយ។
សំណុំរឿង០០២ ត្រូវសាលាក្តីខ្មែរក្រហម បានបើកកិច្ចប្រជុំរៀបចំសវនាការ កាលពីសប្តាហ៍មុន។ កិច្ចប្រជុំនោះ បានសម្រេច ជ្រើសរើស លោក កាំងហ្កេកអ៊ាវ ហៅ ឌុច អតីតប្រធានគុកទួលស្លែង ធ្វើជាសាក្សី ក្នុងសំណុំរឿង០០២។
សំណុំរឿង០០២ ដែលមានជនជាប់ចោទ ៤ រូប គឺ នួនជា, ខៀវសំផន, អៀងសារី និងលោកស្រី អៀង ធីរិទ្ធ នឹងត្រូវបើកសវនាការកាត់ទោសរួមគ្នា នាពាក់កណ្តាលឆ្នាំនេះ និងប្រើពេលវែងជាងសវនាការលើសំណុំរឿង០០១។ នេះបើតាមការបញ្ជាក់របស់លោក ឌឹម សុវណ្ណារុំ អ្នកនាំពាក្យសាលាក្តីខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ