ប្រមុខយោធាថៃយល់ព្រមឲ្យបញ្ជូនអ្នកវាយតម្លៃសភាពការណ៍មកព្រំដែន
នៅក្នុងជំនួបពិភាក្សាគ្នារវាងរដ្ឋមន្ត្រីការពារជាតិកម្ពុជានិងថៃនៅទីក្រុងហ្សាការតាប្រទេសឥណ្ឌូនេស៊ី លោក ប្រាវីដ វង្សស៊ូវណ្ណ រដ្ឋមន្ត្រីការពារជាតិថៃបានយល់ព្រមឲ្យឥណ្ឌូនេស៊ីកំណត់ពេលវេលាជាក់លាក់ដើម្បីបញ្ជូនអ្នកវាយតម្លៃសភាពការណ៍មកកាន់ព្រំដែនជម្លោះដែលជាការបើកផ្លូវឲ្យក្រុមអ្នកសង្កេតការណ៍ឥណ្ឌូនេស៊ីបានមកពិនិត្យមើលបទឈប់បាញ់គ្នាជាអចិន្ត្រៃយ៍រវាងកងទ័ពកម្ពុជានិងថៃ។ នៅក្នុងកិច្ចប្រជុំរដ្ឋមន្ត្រីការពារជាតិអាស៊ាន និងអាស៊ានបូកចិននៅហ្សាការតានេះដែរ ប្រធានាធិបតីឥណ្ឌូនេស៊ី និងរដ្ឋមន្ត្រីការពារជាតិចិនក៏បានអំពាវនាវជាថ្មីទៀតឲ្យកម្ពុជានិងថៃដោះស្រាយបញ្ហាព្រំដែនដោយសន្តិវិធី និងឲ្យបានឆាប់។
ចុះផ្សាយនៅថ្ងៃ៖
ស្តាប់ - ០២:២៧
នៅពេលត្រឡប់ពីប្រទេសឥណ្ឌូនេស៊ីវិញនៅព្រឹកថ្ងៃសៅរ៍នេះ លោក ទៀ បាញ់ រដ្ឋមន្ត្រីក្រសួងការពារជាតិកម្ពុជាបានប្រាប់ក្រុមអ្នកកាសែតថា រដ្ឋមន្ត្រីការពារជាតិថៃលោក ប្រាវីដ វង្សស៊ូវណ្ណ បានយល់ព្រមដោយផ្ទាល់មាត់ថាឲ្យប្រទេសឥណ្ឌូនេស៊ីកំណត់ពេលវេលាឲ្យបានជាក់លាក់ក្នុងការបញ្ជូនក្រុមអ្នកវាយតម្លៃសភាពការណ៍មកកាន់តំបន់ព្រំដែនកម្ពុជាថៃ។
ការព្រមព្រៀងបែបនេះបានធ្វើឡើងនៅក្នុងជំនួបដោយឡែករវាងរដ្ឋមន្ត្រីការពារជាតិកម្ពុជាថៃនៅក្រៅកិច្ចប្រជុំរដ្ឋមន្ត្រីការពារជាតិអាស៊ានដែលបានប្រព្រឹត្តទៅចាប់ពីថ្ងៃទី១៨ដល់ថ្ងៃទី២០ឧសភានៅទីក្រុងហ្សាការតាប្រទេសឥណ្ឌូនេស៊ី។ លោកទៀ បាញ់ ក៏បានឲ្យដឹងទៀតថា សមភាគីថៃបានស្នើឲ្យអ្នកវាយតម្លៃសភាពការណ៍ទាំងនោះស្លៀកពាក់ជាជនស៊ីវិល។ ការមកដល់របស់អ្នកវាយតម្លៃសភាពការណ៍គឺជាការបើកផ្លូវឲ្យក្រុមអ្នកសង្កេតការណ៍ឥណ្ឌូនេស៊ីមកពិនិត្យមើលការឈប់បាញ់គ្នាជាអចិន្ត្រៃយ៍រវាងកងទ័ពកម្ពុជានិងថៃ។
បន្ទាប់មកនឹងមានកិច្ចប្រជុំគណៈកម្មការព្រំដែនទូទៅកម្ពុជាថៃនៅក្នុងប្រទេសកម្ពុជា។ បើយោងតាមលោក ទៀ បាញ់ នៅក្នុងកិច្ចប្រជុំរដ្ឋមន្ត្រីការពារជាតិអាស៊ាននៅហ្សាការតា ប្រធានាធិបតីឥណ្ឌូនេស៊ីក៏បានអំពាវនាវជាថ្មីទៀតឲ្យកម្ពុជានិងថៃដោះស្រាយបញ្ហាជាមួយគ្នាដោយសន្តិវិធី។ នៅក្នុងជំនួបដោយឡែករវាងរដ្ឋមន្ត្រីការពារជាតិអាស៊ាន និងចិន នៅហ្សាការតាដែរ ចិនក៏បានអំពាវនាវឲ្យកម្ពុជានិងថៃដោះស្រាយបញ្ហាដោយសន្តិវិធី និងឲ្យបានឆាប់ផងដែរ។
ប៉ុន្តែ គេគួរកត់សម្គាល់ថា នេះមិនមែនជាលើកទី១ទេដែលថៃបានយល់ព្រមទទួលយកអ្នកសង្កេតការណ៍អាស៊ានឲ្យមកពិនិត្យមើលការឈប់បាញ់នៅតាមជាយដែន ប៉ុន្តែ ការយល់ព្រមរបស់ថៃច្រើនតែត្រូវបានបំភ្លេចទៅវិញក្រោយពីចេញពីកិច្ចប្រជុំ។ ការប្រែក្រឡាស់របស់ថៃនេះហើយដែលបានធ្វើឲ្យនីតិវិធីបញ្ជូនអ្នកសង្កេតការណ៍ឥណ្ឌូនេស៊ីមកកាន់តំបន់ជាយដែនជាប់គាំងតាំងពីថ្ងៃទី២២កុម្ភៈរហូតមកទល់សព្វថ្ងៃ។
ជាក់ស្តែង គណៈរដ្ឋមន្ត្រីថៃនៅមិនទាន់បានអនុម័តកិច្ចព្រមព្រៀងវិធានការជាកញ្ចប់ដែលសម្រេចបាននៅក្នុងអំឡុងពេលជំនួបកំពូលអាស៊ានកាលពីថ្ងៃទី១៩ឧសភានោះនៅឡើយទេ។ យ៉ាងណាក៏ដោយ ដំណោះស្រាយវិធានការបន្ទាន់ក្នុងជម្លោះនៅព្រះវិហារនឹងត្រូវតុលាការយុត្តិធម៌អន្តរជាតិក្រុងឡាអេលើកមកដោះស្រាយនៅចុងខែឧសភានេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ