ថៃមិនទាន់ឆ្លើយតបសេចក្តីព្រាងអនុវត្តសាលក្រមឡាអេរបស់កម្ពុជា
រហូតដល់ពេលនេះ រដ្ឋាភិបាលក្រុងបាងកកនៅតែមិនទាន់ផ្តល់ចម្លើយលើសេចក្តីព្រាងការអនុវត្តសាលក្រមទីក្រុងឡាអេដែលរដ្ឋាភិបាលកម្ពុជាបានតាក់តែងឡើងនោះឡើយ។ ក្នុងករណីដែលថៃមិនឆ្លើយតបឬពន្យារពេលនៃការឆ្លើយតបយូរពេកនោះ កម្ពុជានឹងអាចរាយការណ៍បញ្ហានេះទៅតុលាការយុត្តិធម៌អន្តរជាតិ។
ចុះផ្សាយនៅថ្ងៃ៖
ស្តាប់ - ០១:៣៤
គ្មានចម្លើយផ្លូវការអ្វីសោះពីរដ្ឋាភិបាលក្រុងបាងកកមករដ្ឋាភិបាលកម្ពុជាលើសេចក្តីព្រាងកិច្ចព្រមព្រៀងស្តីពីការអនុវត្តសាលក្រមតុលាការយុត្តិធម៌អន្តរជាតិទីក្រុងឡាអេ។ តាំងពីការបង្ហាញសេចក្តីព្រាងនៃការអនុវត្តសាលក្រមដោយលោកនាយករដ្ឋមន្ត្រីកម្ពុជាហ៊ុន សែន កាលពីថ្ងៃទី២២កក្កដាសប្តាហ៍មុន រហូតដល់ពេលនេះកម្ពុជាបានត្រឹមតែលឺមន្ត្រីជាន់ខ្ពស់នៃរដ្ឋាភិបាលក្រុងបាងកកសព្វថ្ងៃនិយាយប្រាប់សារព័ត៌មានថា ពួកគេកំពុងពិចារណាលើសេចក្តីព្រាងរបស់កម្ពុជានេះ។
អ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រី លោកទិត សុធាបានថ្លែងប្រាប់វិទ្យុបារាំងអន្តរជាតិនៅថ្ងៃនេះថា កម្ពុជាបានបង្ហាញឆន្ទៈរបស់ខ្លួនគ្រប់ដំណាក់កាលនៃបញ្ហា ក្នុងការស្វែងរកដំណោះស្រាយ។ ចំពោះរដ្ឋាភិបាលថៃវិញ រឿងគឺនៅដដែលទេថា តើថៃមានសុឆន្ទៈចង់ដោះស្រាយបញ្ហាឬយ៉ាងណា? នៅពេលនេះ កម្ពុជានៅរង់ចាំការឆ្លើយតបផ្លូវការពីរដ្ឋាភិបាលថៃ។
បើទោះជាសាលក្រមរបស់តុលាការឡាអេមិនបានកំណត់ពេលវេលាសម្រាប់ភាគីទាំងពីរអោយដោះស្រាយវិបត្តិហើយកម្ពុជាទៀតសោតក៏មិនបានកំណត់អោយភាគីជម្លោះម្ខាងទៀត គឺរដ្ឋាភិបាលថៃ ត្រូវឆ្លើយតបលើសេចក្តីព្រាងស្តីពីការអនុវត្តសាលក្រមតុលាការនៅពេលណាក៏ដោយ ប៉ុន្តែបើតាមការពន្យល់របស់លោកនាយករដ្ឋមន្ត្រីហ៊ុន សែននៅក្នុងសន្និសីទកាសែតសប្តាហ៍មុននោះ ក្នុងករណីដែលភាគីថៃនៅមិនព្រមផ្តល់ចម្លើយចំពោះសេចក្តីព្រាងរបស់កម្ពុជា កម្ពុជានឹងធ្វើរបាយការណ៍ទៅតុលាការយុត្តិធម៌អន្តរជាតិ អំពីការរាំងស្ទះនៃដំណើរការដោះស្រាយបញ្ហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ