ទាហានថៃធ្វើជាបង្ហាញជំហរចង់អនុវត្តសាលក្រមឡាអេ
មេប៉ូលីសថៃនៅក្នុងខេត្តស៊ីសាកេតបាននិយាយអោយដឹងថា មន្ត្រីប៉ូលីស៥នាក់នឹងត្រូវបញ្ជូនទៅក្នុងតំបន់ដែលគ្មានកងទ័ពបណ្តោះអាសន្នក្បែរព្រំដែនប្រាសាទព្រះវិហារជំនួសទាហានថៃ តាមបញ្ជាសាលក្រមតុលាការឡាអេ។ ទោះយ៉ាងនេះក្តី កម្ពុជាមិនទាន់ខ្វល់អំពីសកម្មភាពរបស់ថៃនៅឡើយទេ។
ចុះផ្សាយនៅថ្ងៃ៖
ស្តាប់ - ០១:៣៦
កម្ពុជាមិនខ្វាយខ្វល់នឹងសេចក្តីប្រកាសរបស់មេប៉ូលីសខេត្តស៊ីសាកេតរបស់ថៃនោះទេ។ សម្រាប់កម្ពុជា វាហាក់ដូចជាថៃច្រៀងមិនទាន់ចំពេលនៅឡើយ។ ចំពោះអ្នកនាំពាក្យក្រសួងការពារជាតិកម្ពុជា ឧត្តមសេនីយឯកឈុំ សុជាតិ គ្មានការព្រមព្រៀងណាមួយជាមួយថៃអំពីការអនុវត្តសាលក្រមតុលាការឡាអេ ដោយគ្មានការដឹងឮពីឥណ្ឌូនេស៊ី ឬពីប្រធានអាស៊ាននោះទេ។ មន្ត្រីជាន់ខ្ពស់ក្រសួងការពារជាតិខ្មែរពន្យល់ថា កម្ពុជាបានស្នើសេចក្តីព្រាងកិច្ចព្រមព្រៀងអំពីការដកកងទ័ព និងការទទួលអ្នកសង្កេតការណ៍ឥណ្ឌូនេស៊ីរួចហើយ។ នៅឡើយតែថៃ ដែលត្រូវសម្រេចចិត្តថា នឹងធ្វើសេចក្តីព្រាងរបស់ខ្លួនមួយផ្ញើទៅអាស៊ានដែរ ឬត្រូវពិចារណាលើសេចក្តីព្រាងរបស់កម្ពុជា។ ការពិភាក្សាដែលត្រូវឆ្លងកាត់ការដឹងឮរបស់ឥណ្ឌូនេស៊ី។ ចំពោះអ្នកនាំពាក្យក្រសួងការពារជាតិ យោធាថៃហាក់កំពុងចង់បង្ហាញឥទ្ធិពលនិងតួនាទីរបស់ខ្លួននៅក្នុងការដោះស្រាយបញ្ហាព្រំដែនទន្ទឹមនឹងរដ្ឋាភិបាលថៃដែរ។
គួរបញ្ជាក់ថា នេះជាលើកទី២ហើយ ក្រោយសេចក្តីប្រកាសសាលក្រមតុលាការឡាអេ ដែលក្រុមយោធាថៃបានព្រលយបំណង និងចង់ចេញមុខដើរតួដោះស្រាយវិបត្តិព្រំដែនជាមួយកម្ពុជា។ កន្លងទៅថ្មីៗនេះ ក្រសួងការពារជាតិថៃបានបើកកិច្ចប្រជុំមួយដើម្បីរៀបចំការប្រជុំគណៈកម្មាធិការព្រំដែនទូទៅជាមួយកម្ពុជា។ ហើយពួកគេនៅតែប្រកាន់ជំហរដដែលថា ជម្លោះព្រំដែនខ្មែរ-ថៃជាបញ្ហាទ្វេភាគី ហើយដែលអាចដោះស្រាយបានដោយកម្ពុជា-ថៃ។ ប៉ុន្តែថា សម្រាប់កម្ពុជា បញ្ហាសន្តិសុខព្រំដែនប្រាសាទព្រះវិហារបានឡើងដល់ដៃអង្គការសហប្រជាជាតិ និងអាស៊ានហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ