កម្ពុជាថៃក្នុងរបៀបវារៈនៃការស្តារទំនាក់ទំនងឡើងវិញ
ចុះផ្សាយនៅថ្ងៃ៖
ស្តាប់ - ០៤:២៩
ចាប់តាំងពីក្រោយការកកើតនៃរដ្ឋាភិបាលថ្មីរបស់គណបក្សភឿថៃ ទីក្រុងភ្នំពេញ និងបាងកកកំពុងស្ថិតនៅក្នុងរបៀបវារៈនៃការស្តារទំនាក់ទំនងជាមួយ គ្នាឡើងវិញ។ នៅក្នុងសប្តាហ៍នេះ លោកនាយករដ្ឋមន្ត្រីហ៊ុន សែនបានអះអាងថា គោលនយោបាយរដ្ឋាភិបាលថ្មីរបស់លោកស្រីយីងឡាក់ ស៊ីណាវ៉ាត្រា មានលក្ខណៈស៊ីសង្វាក់គ្នាយ៉ាងខ្លាំងជាមួយគោលនយោបាយរបស់រដ្ឋាភិបាល កម្ពុជា ពោលគឺភាគីទាំងពីរសុទ្ធតែចង់រួមរស់ជាមួយគ្នាដោយសន្តិភាព។ ទន្ទឹមនឹងនោះ រដ្ឋាភិបាលប្រទេសជិតខាងទាំងពីរគ្រោងចាប់ផ្តើមជំនួបជាច្រើនក្នុង ទិសដៅស្តារទំនាក់ទំនងជាមួយគ្នា។ តើរបៀបវារៈនៃដំណោះស្រាយកម្ពុជាថៃ ជាសញ្ញានៃការបញ្ចប់បញ្ហាឬ?
ភ្លាមៗក្រោយពីការចាប់កំណើតនៃរដ្ឋាភិបាលថ្មី ដឹកនាំដោយប្អូនស្រីលោកថាក់ស៊ីន ទីក្រុងភ្នំពេញ និងបាងកកលែងមានទៀតហើយ ការដំឡើងសរសៃកដាក់គ្នា គឺមានតែស្នាមញញឹមស្រស់ស្រាយរាក់ទាក់រកគ្នាតែប៉ុណ្ណោះ។ លែងមានទៀតហើយការប្រឈមមុខដាក់គ្នាខាងយោធាតាមព្រំដែន គឺមានតែការដកកងទ័ពត្រឡប់មកសមរភូមិក្រោយវិញ។ ក៏លែងមានទៀតដែរ ភាពតានតឹងផ្នែកការទូត។ តើនេះមិនមែនជានិទាឃរដូវសម្រាប់ចំណងទាក់ទងកម្ពុជាថៃទេឬ?
លោកនាយករដ្ឋមន្ត្រីហ៊ុន សែន បានមានប្រសាសន៍ដោយការសាទរថា គោលនយោបាយរដ្ឋាភិបាលថ្មីរបស់លោកស្រីយីងឡាក់ ស៊ីសង្វាក់គ្នាយ៉ាងខ្លាំងជាមួយគោលនយោបាយនៃរដ្ឋាភិបាលកម្ពុជា ពោលគឺភាគីទាំងពីរសុទ្ធតែមានសុឆន្ទៈក្នុងការរួមរស់ជាមួយគ្នាក្នុងសុខសន្តិភាព។ ឆ្លើយតបទៅនឹងបំណងចង់រួមរស់ជាមួយគ្នាដោយសន្តិវិធីរបស់កម្ពុជា លោកស្រីយីងឡាក់បានផ្តល់សញ្ញាវិជ្ជមានភ្លាមៗដែរ។ រដ្ឋាភិបាលថ្មីនៃទីក្រុងបាងកកបានចាត់ទុកជម្លោះព្រំដែនកម្ពុជាថៃ ជារបៀបវារៈសំខាន់ជាងគេមួយ ក្នុងចំណោមបញ្ហាដែលរដ្ឋាភិបាលរបស់លោកស្រីត្រូវដោះស្រាយ។ បន្ទាប់ពីការផ្តល់សញ្ញាវិជ្ជមានរកគ្នារួចមក ផែនការសកម្មភាពជាច្រើនត្រូវបានរៀបចំឡើង ដើម្បីអនុញ្ញាតឲ្យមេដឹកនាំគ្រប់ជាន់ថ្នាក់នៃភាគីទាំងពីរបានជួបគ្នា ចាប់តាំងពីថ្នាក់កងទ័ពជួរមុខរហូតដល់ថ្នាក់ឧបនាយករដ្ឋមន្ត្រី និងនាយករដ្ឋមន្ត្រី។
ជាការពិត បញ្ហាព្រំដែនរវាងកម្ពុជា និងថៃបានបង្កស្នាមរបួសជ្រាលជ្រៅ រវាងប្រទេសទាំងពីរ ជាពិសេសឆ្លងកាត់ការផ្ទុះអាវុធទ្រង់ទ្រាយធំប៉ុន្មានលើកចុងក្រោយ។ ដូច្នេះការដោះស្រាយប្រាកដជាមិនមែនងាយស្រួលឡើយ។ សម្រាប់ក្រសែភ្នែកក្រុមអ្នកវិភាគ បរិយាកាសក្នុងដំណោះស្រាយកម្ពុជា ថៃបានប្រែប្រួលមែន ប៉ុន្តែ ជម្រៅនៃបញ្ហាហាក់ដូចជានៅតែដដែលទេ នោះគឺភាពដាច់ស្រេចនៃខ្សែបន្ទាត់ព្រំដែនរវាងប្រទេសទាំងពីរ ជារឿងដែលមិនងាយអារកាត់ទោះបីជាមានឯកសារប្រវត្តិសាស្ត្រជាច្រើនបញ្ជាក់ច្បាស់លាស់ហើយក៏ដោយ។ ប៉ុន្តែ ភាគីថៃបានជាប់ផុងទៅក្នុងគំនាបនៃភាពជាអ្នកវង្វេងប្រវត្តិសាស្ត្រយ៉ាងជា្រលជ្រៅដែលមិនងាយមានអ្នកណាស្តារបាន។
ម្យ៉ាងទៀត រដ្ឋាភិបាលដែលដឹកនាំដោយប្អូនស្រីលោកថាក់ស៊ីន ក៏កំពុងស្ថិតក្នុងគំនាបនៃក្រុមប្រឆាំង និងជាពិសេសក្រុមយោធាដែរ។ គំនាបនេះទាមទារឲ្យលោកស្រីយីងឡាក់ប្រយ័ត្នប្រយែងគ្រប់ជំហាន បើមិនដូច្នោះទេ លោកស្រីនឹងរអិលធ្លាក់ក្នុងគន្លងចាស់របស់បងប្រុស គឺអតីតនាយករដ្ឋមន្ត្រីថាក់ស៊ីន ជាមិនខានឡើយ។
យ៉ាងណាក៏ដោយចុះ សញ្ញាល្អមួយទៀតសម្រាប់ដំណោះស្រាយបញ្ហាកម្ពុជា ថៃ គឺ លោកស្រីយីងឡាក់ ស៊ីណាវ៉ាត្រា បានប្រកាសប្រើប្រាស់យន្តការអាស៊ានដើម្បីសម្របសម្រួលដោះស្រាយបញ្ហាជាមួយកម្ពុជា។ នេះជាមធ្យោបាយដែលក្រុមអ្នកវិភាគមើលឃើញថា មានប្រយោជន៍សំខាន់សម្រាប់រដ្ឋាភិបាលរបស់លោកស្រីផង សម្រាប់កម្ពុជាផង និងសម្រាប់អាស៊ានផង។ សម្រាប់រដ្ឋាភិបាលលោកស្រីយីងឡាក់ ដំណោះស្រាយតាមយន្តការអាស៊ាន គឺជាច្រកល្អបំផុតក្នុងការកាត់បន្ថយសម្ពាធពីក្រុមប្រឆាំង ឬពីក្រុមយោធា ពីព្រោះថា អាស៊ានដែលមានប្រទេសសមាជិក១០ និងជាពិសេស ដែលមានអគ្គលេខាធិការបច្ចុប្បន្នជាជនជាតិថៃផងនោះ គឺជាសាក្សីយ៉ាងសំខាន់សម្រាប់បង្កើនភាពជឿជាក់នៃដំណោះស្រាយក្រោមយន្តការអាស៊ានជាងការដោះស្រាយទ្វេភាគី។
ចំណែកប្រយោជន៍សម្រាប់កម្ពុជាវិញគឺ ដំណោះស្រាយតាមយន្តការអាស៊ាន គឺជាអ្វីដែលរដ្ឋាភិបាលក្រុងភ្នំពេញប្រាថ្នាចង់បានជាយូរមកហើយ ប៉ុន្តែ ត្រូវបានជំទាស់ដោយនាយករដ្ឋមន្ត្រីអាភីស៊ីតតែរហូត។ ដូច្នេះ ការចាប់យកយន្តការអាស៊ានឡើងវិញមកដោះស្រាយបញ្ហា គឺជាអ្វីដែលកម្ពុជាទន្ទឹងរង់ចាំ។ រីឯអាស៊ានក៏នឹងទទួលបានប្រយោជន៍ពីដំណោះស្រាយបញ្ហាកម្ពុជាថៃដែរ ប្រយោជន៍នៅត្រង់ថា សមាគមនេះនឹងមានមុខមាត់ជាងមុន ដោយសារតែខ្លួនមានតួនាទីកាន់តែសំខាន់ក្នុងការដោះស្រាយវិវាទផ្ទៃក្នុងរវាងរដ្ឋាភិបាលជាសមាជិក។
សរុបមកវិញ សភាពការណ៍ព្រំដែនកម្ពុជាថៃ ពិតជាបានប្រែប្រួលថ្មីហើយពេលនេះ ប៉ុន្តែ តើដំណោះស្រាយពិតប្រាកដនៅឯណា? និងត្រូវប្រើពេលយូរប៉ុណ្ណា? នៅមិនទាន់មានអ្នកណាអាចឆ្លើយសំណួរនេះបាននៅឡើយទេ។ យ៉ាងណាក៏ដោយ សន្តិភាពនៅតាមជាយដែនជារឿងសំខាន់ដំបូងបំផុតដែលគួរអបអរសាទរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ