កម្ពុជា
សង្គមស៊ីវិលជំរុញឲ្យរដ្ឋាភិបាល ប្រយ័ត្នប្រយែងចំពោះការតាក់តែងច្បាប់គ្រប់គ្រងប្រេង និងឧស្ម័ន
ក្រុមអង្គការសង្គមស៊ីវិលជាតិ និងអន្តរជាតិ ដែលធ្វើការលើវិស័យប្រេង និងឧស្ម័ន បានជំរុញឲ្យមានការទំនាក់ទំនង ដោយបើកចំហរវាងគ្រប់ភាគីពាក់ព័ន្ធទាំងអស់ ក្នុងស្មារតីតម្លាភាព គណនេយ្យភាព និងយុត្តិធម៌។ នោះគឺរដ្ឋាភិបាលកម្ពុជា ត្រូវតែតាក់តែងសេចក្តីព្រាងច្បាប់គ្រប់គ្រងប្រេង និងឧស្ម័ន ដ៏ល្អមួយ ខណៈដែលកម្ពុជា នឹងបូមប្រេងដំណក់ទី១ នៅថ្ងៃទី១២ ខែ១២ ឆ្នាំ២០១២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ផ្សាយពាណិជ្ជកម្ម
សង្គមស៊ីវិលបានលើកឡើងដូច្នេះ នៅក្នុងសិក្ខាសាលាថ្នាក់ជាតិ ស្តីពី ការអនុវត្តដ៏ប្រសើរលើក្របខណ្ឌច្បាប់ វិស័យប្រេង និងឧស្ម័ន កាលពីព្រឹកថ្ងៃសុក្រ ទី១៦កញ្ញា ឆ្នាំ២០១១ នៅសណ្ឋាគារ កាំបូឌីយ៉ាណា ក្នុងរាជធានីភ្នំពេញ។
លោក ម៉ម សម្បត្តិ ប្រធានក្រុមប្រឹក្សាភិបាល សម្ព័ន្ធភាពកម្ពុជា ដើម្បីចំណូលធនធាន បានលើកឡើងថា ពេលវេលារបស់យើង កាន់តែជិតទៅៗ សម្រាប់ការងារទាញយកប្រេង និងឧស្ម័នពីដែនសមុទ្រ។ នៅពេលនេះ ជាវេលាដែលកម្ពុជាត្រូវធ្វើការរួមគ្នា ដើម្បីធ្វើអោយប្រទេសជាតិទទួលបានផលប្រយោជន៍ជាអតិបរិមាពីការអភិវឌ្ឍន៍វិស័យប្រេង។
តំណាងសង្គមស៊ីវិល រូបនេះ បញ្ជាក់ថា ការបង្កើតច្បាប់គ្រប់ជ្រុងជ្រោយ និងប្រសិទ្ធភាព ដើម្បីគ្រប់គ្រង់វិស័យឧស្សាហកម្ម និស្សារណកម្ម នឹងពិតជាគាំទ្រកម្ពុជា សម្រេចបានគោលបំណង ដូចដែលបានចែងក្នុងផែនការអភិវឌ្ឍន៍ជាតិ ក៏ដូចជាគោលដៅអភិវឌ្ឍន៍សហសវត្សរ៍ដើម្បីលុបបំបាត់ភាពក្រីក្រ ផ្ដល់ឱកាស និងជម្រើសសម្រាប់គ្រប់គ្នា ធ្វើឲ្យប្រសើរឡើងហេដ្ឋារចនាសម្ព័ន្ធកម្ពុជា។
តាមអង្គការសង្គមស៊ីវិល ផលបះពាល់ និងបច្ច័យនៃច្បាប់ប្រេង មានភាពធ្ងន់ធ្ងរ និងយូរអង្វែង ប្រសិនជាច្បាប់ទាំងនោះ មិនបានតាក់តែងច្បាប់ ពុំបានពិចារណាឲ្យគ្រប់ជ្រុងជ្រោយ ឬត្រឹមត្រូវនោះទេ។
ចំណែកលោក ប្រាយអិន ឡន់ នាយកប្រចាំតំបន់អាស៊ីខាងកើត របស់អង្គការអុកស្វាមអាមេរិក បានលើកឡើងក្នុងពិធីជួបជុំ កាលពីព្រឹកមិញថា នៅមិនដល់មួយឆ្នាំកន្លះទៀតទេ ប្រទេសកម្ពុជានឹងចាប់ផ្តើមដំណើរការបូមប្រេង ពីដែនសមុទ្ររបស់ខ្លួន។ ប៉ុន្តែដើម្បីធានាថា ដំណើរការបូមយកប្រេងនោះ អាចប្រព្រឹត្តទៅបានដោយជោគជ័យនោះ ក្របខណ្ឌច្បាប់ស្តីពីការរុករក និងការផលិត ព្រមទាំងក្របខណ្ឌច្បាប់ស្តីពីការបញ្ឈប់ដំណើរការអាជីវកម្មប្រេង និងឧស្ម័ន គួរទទួលបានការយកចិត្តទុកដាក់ជាបន្ទាន់។
តាមអ្នកជំនាញការរូបនេះ ការរៀបចំក្របខណ្ឌច្បាប់ទាំងនោះ ឲ្យបានល្អ នឹងអនុញ្ញាតឲ្យប្រទេសកម្ពុជា ប្រមូលអត្តប្រយោជន៍ជាអតិបរមា ពីផលិតកម្មប្រេង ដែលត្រូវបានរំពឹងថា នឹងចាប់ផ្តើមនៅថ្ងៃទី១២ ខែ១២ ឆ្នាំ២០១២ និងនៅម៉ោង ១២ សម្រាប់កិច្ចខិតខំប្រឹងប្រែង ក្នុងការអភិវឌ្ឍន៍ប្រទេសជាតិ។
ទាក់ទងនឹងច្បាប់គ្រប់គ្រងប្រេង និងឧស្ម័ន ត្រូវបានលោក សុខ អាន ប្រធានអាជ្ញាធរប្រេងកាតជាតិកម្ពុជា លើកឡើង កាលពីថ្ងៃ៩កញ្ញាថា អាជ្ញាធរប្រេងកាតជាតិកម្ពុជា កំពុងចាត់តាំងមន្ត្រីជំនាញ សហការជាមួយអ្នកជំនាញអន្តរជាតិ ដើម្បីសិក្សាច្បាប់ពីបណ្តាប្រទេសជាច្រើន ដើម្បីបង្កើតបានច្បាប់ស្តីពីការគ្រប់គ្រងប្រេងកាត និងឧស្ម័ននៅកម្ពុជា ឲ្យក្លាយទៅជាច្បាប់មួយដែលល្អ ហើយចំណូលពីប្រេង ត្រូវរួមចំណែកឲ្យបានច្រើនបំផុតក្នុងការអភិវឌ្ឍន៍សេដ្ឋកិច្ចជាតិ។
ក៏ប៉ុន្តែមន្ត្រីជាន់ខ្ពស់រដ្ឋាភិបាល មិនបានឲ្យដឹងពីខ្លឹមសារពង្រាងច្បាប់ និងពេលណា ទើបពង្រាងច្បាប់ប្រេងត្រូវអនុម័តឡើយ ពីព្រោះតាមលោកសុខអាន នៅមានកិច្ចការច្រើនទៀត ដែលរដ្ឋាភិបាលត្រូវធ្វើ ដើម្បីឲ្យស្របតាមបរិបទសេដ្ឋកិច្ចកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ