កិច្ចប្រជុំគណៈកម្មការព្រំដែនទូទៅ GBC កម្ពុជា-ថៃ ធ្វើនៅចុងខែធ្នូ
រដ្ឋមន្ត្រីក្រសួងការពារជាតិកម្ពុជា ក្នុងនាមជាម្ចាស់ផ្ទះ គ្រោងនឹងបញ្ជូនលិខិតថ្មីមួយទៀត ទៅកាន់រដ្ឋមន្ត្រីការពារជាតិថៃ ដើម្បីកំណត់ពេលប្រជុំគណៈកម្មការព្រំដែនទូទៅកម្ពុជា-ថៃ GBC នៅចុងខែធ្នូខាងមុខ។ កិច្ចប្រជុំ ដែលដឹកនាំដោយរដ្ឋមន្ត្រីការពារ នឹងផ្តោតសំខាន់លើបញ្ហាសន្តិសុខតាមបណ្តោយព្រំដែន ជាពិសេសការអនុវត្តន៍សាលដីការបស់តុលាការយុត្តិធម៌អន្តរជាតិ ទីក្រុងឡាអេ ក្នុងរឿងដកកងទ័ព ចេញពីតំបន់ព្រំដែនប្រាសាទព្រះវិហារ ក៏ជាប្រធានបទ ដែលរដ្ឋមន្ត្រីការពារជាតិកម្ពុជាថៃ ត្រូវលើកមកពិភាក្សាផងដែរ។
ចុះផ្សាយនៅថ្ងៃ៖
ស្តាប់ - ០១:៥០
ក្រសួងការពារជាតិកម្ពុជា នឹងបញ្ជូនលិខិតផ្លូវការទៅកាន់ក្រសួងការពារជាតិថៃ ដើម្បីចូលរួមកិច្ចប្រជុំគណៈកម្មការព្រំដែនទូទៅកម្ពុជា-ថៃ GBC នៅចុងខែធ្នូខាងមុខ។ កម្ពុជា ជាម្ចាស់ផ្ទះនៃកិច្ចប្រជុំ GBC លើកទី៨ ដែលគ្រោងធ្វើនៅភ្នំពេញ បានប្រុងប្រៀបរួចស្រេចហើយ ក្នុងកិច្ចប្រជុំប្រចាំឆ្នាំនោះ។ នេះបើតាមការបញ្ជាក់របស់លោកឧត្តមសេនីយ៍ឯក ឈុំ សុជាតិ រដ្ឋលេខាធិការ និងជាអ្នកនាំពាក្យក្រសួងការពារជាតិ។
មន្ត្រីជាន់ខ្ពស់ក្រសួងការពារជាតិកម្ពុជា ក៏បានឲ្យដឹងថា លិខិតរដ្ឋមន្ត្រីការពារជាតិថៃ ដើម្បីចូលរួមកិច្ចប្រជុំ GBC លើកនេះ ជាលើកទី៣ហើយ ដែលកម្ពុជាបានដាក់ទៅកាន់ភាគីថៃ បន្ទាប់ពីកិច្ចប្រជុំ GBC ដែលដឹកនាំដោយរដ្ឋមន្ត្រីការពារជាតិកម្ពុជា និងថៃ ពីរលើកត្រូវបានលើកពេល។ មូលហេតុមកពី ថៃដោះដូរសមាសភាពក្នុងគណៈកម្មការ GBC និងមួយទៀត ដោយសារតែថៃ ជួបគ្រោះទឹកជំនន់។
ចំពោះប្រធានបទនៃកិច្ចប្រជុំប្រចាំឆ្នាំ នៃគណៈកម្មការចម្រុះ GBC លើកទី៨ នៅកម្ពុជា ត្រូវបានលោកឧត្តមសេនីយ៍ឯក ឈុំ សុជាតិ លើកឡើងថា នឹងផ្តោតសំខាន់លើបញ្ហាសន្តិសុខតាមបណ្តោយព្រំដែន និងការអភិវឌ្ឍន៍នានា។ សន្តិសុខតាមព្រំដែនកម្ពុជា-ថៃ ដែលបានតាន តឹង រហូតដល់មានសង្គ្រាមបង្ហូរឈាម ចាប់តាំងពីថៃ លើកទ័ពចូលឈ្លានពានទឹកដីកម្ពុជា នៅប្រាសាទព្រះវិហារ កាលពីថ្ងៃទី១៥កក្កដា ឆ្នាំ២០០៨។
ជាមួយគ្នានោះ លោក ឈុំ សុជាតិ បានបន្ថែមថា ក្នុងកិច្ចប្រជុំ GBC ដែលដឹកនាំដោយរដ្ឋមន្ត្រីការពារជាតិកម្ពុជា និងថៃ នៅចុងខែធ្នូ ក៏នឹងអាចមានការនិយាយពីការអនុវត្តន៍សាលដីការបស់តុលាការយុត្តិធម៌អន្តរជាតិ ទីក្រុងឡាអេ ICJ កាលពីថ្ងៃទី១៨កក្កដា ឆ្នាំ២០១១ ក្នុងរឿងដកកងទ័ព ចេញពីតំបន់ព្រំដែន នៅចំណុចប្រាសាទព្រះវិហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ