យន្តការបន្ថយភាពតានតឹងនៅព្រំដែនកម្ពុជា-ថៃចាប់ផ្តើមជាថ្មី
ក្រសួងការពារជាតិកម្ពុជាបានរៀបចំកិច្ចប្រជុំផ្ទៃក្នុងមួយនៅព្រឹកថ្ងៃព្រហស្បតិ៍នេះ ក្នុងគោលដៅបង្កើតទំនាក់ទំនងល្អរវាងគណៈកម្មាធិការព្រំដែនថ្នាក់ភូមិភាគ និងបង្កើនសន្តិភាពនៅតាមព្រំដែន។ រីឯលោកនាយករដ្ឋមន្ត្រីខ្មែរហ៊ុន សែនវិញក៏បានថ្លែងជាសាធារណៈថា ស្ថានភាពស្ងប់ស្ងាត់នៅតាមបណ្តោយព្រំដែនត្រូវបានធានាបន្ទាប់ពីគណបក្សភឿថៃបានឈ្នះឆ្នោតនៅប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
មិនទុកពេលវេលាអោយដើរទៅមុខឥតប្រយោជន៍ឡើយ។ ប៉ុន្មានថ្ងៃក្រោយការឡើងកាន់អំណាចពេញលេញរបស់គណបក្សភឿថៃ កម្ពុជាក៏ប្រញាប់ចាប់ផ្តើមស្វែងរកផ្លូវដើម្បីធ្វើការងារជាមួយភាគីថៃជាថ្មី។
នៅព្រឹកថ្ងៃព្រហស្បតិ៍ទី១១សីហានេះ ថ្នាក់ដឹកនាំក្រសួងការពារជាតិកម្ពុជាបានរៀបចំកិច្ចប្រជុំស្តីពីកិច្ចសហប្រតិបត្តិការនិងទំនាក់ទំនងល្អរវាងថ្នាក់ភូមិភាគនៃប្រទេសទាំងពីរកម្ពុជានិងថៃ។ នាយឧត្តមសេនីយនាង ផាត រដ្ឋលេខាធិការក្រសួងការពារជាតិដែលដឹកនាំកិច្ចប្រជុំនេះ បានថ្លែងថាទំនាក់ទំនងល្អរវាងថ្នាក់ភូមិភាគរវាងយោធាទាំងពីរនឹងអាចធានាបានសន្តិភាពនៅតាមព្រំដែន។
កិច្ចប្រជុំនេះត្រូវបានរៀបចំឡើងមុនពេលដែលកម្ពុជាដល់វេណធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការព្រំដែនទូទៅកម្ពុជា-ថៃក្នុងក្របខណ្ឌក្រសួងការពារជាតិ ហើយថាបើយោងតាមអះអាងរបស់លោកនាយករដ្ឋមន្ត្រីហ៊ុន សែន កិច្ចប្រជុំរវាងភូមិភាគ៤របស់កម្ពុជា និងភូមិភាគ២របស់ថៃនឹងត្រូវរៀបចំនៅចុងខែសីហានេះ។
កម្ពុជាបានមើលឃើញភាពធូរស្រាលច្រើននៃស្ថានភាពយោធានៅតាមព្រំដែននៅពេលដែលគណបក្សភឿថៃបានឈ្នះឆ្នោត។ ប្រមុខរដ្ឋាភិបាលកម្ពុជាលោកហ៊ុន សែននៅតែថ្លែងម្តងហើយម្តងទៀតទទួលស្គាល់អំពីសារៈប្រយោជន៍នៃការឡើងកាន់អំណាចរបស់គណបក្សភឿថៃដែលធ្វើអោយទំនាក់ទំនងកម្ពុជា-ថៃវិលមករកប្រក្រតីភាពវិញ។ លោកនាយករដ្ឋមន្ត្រីកម្ពុជាបានបញ្ជាអោយមានការពិភាក្សាទ្វេភាគីគ្រប់ផ្នែកដើម្បីស្តារទំនាក់ទំនងកម្ពុជា-ថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ