សេចក្តីព្រាងច្បាប់ស្តីពីការបង្កានិងការពន្លត់អគ្គីភ័យត្រូវបានអនុម័ត
នៅពេលដែលគ្រោះមហន្តរាយដែលបង្កឡើងដោយអគ្គីភ័យពីមួយឆ្នាំទៅមួយឆ្នាំ ចេះតែមានការកើនឡើងគួរឲ្យព្រួយបារម្ភនិងបំផ្លាញទ្រព្យសម្បត្តិប្រជាពលរដ្ឋម្រមាណជា៧៥លានដុល្លារក្នុងមួយឆ្នាំៗនោះ រដ្ឋាភិបាលកម្ពុជា បានអនុម័តសេចក្តីព្រាងច្បាប់ ស្តីពីការបង្កា និងការពន្លត់អគ្គីភ័យ ដើម្បីការពារសុវត្ថិភាពជូនប្រជាពលរដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
រដ្ឋាភិបាលកម្ពុជា បានអនុម័តសេចក្តីព្រាងច្បាប់ ស្តីពីការបង្កា និងការពន្លត់អគ្គីភ័យ ដើម្បីការពារសុវត្ថិភាពជូនប្រជាពលរដ្ឋ នៅខណៈដែលអគ្គីភ័យបានធ្វើឲ្យខូចខាតទ្រព្យសម្បត្តិប្រជាពលរដ្ឋប្រមាណជា៧៥លានដុល្លារក្នុងមួយឆ្នាំៗ។
ការសម្រេចអនុម័ត សេចក្តីព្រាងច្បាប់ ស្តីពីការបង្កានិងការពន្លត់អគ្គីភ័យ បានធ្វើឡើងក្នុងសម័យប្រជុំអង្គគណៈរដ្ឋមន្រ្តីកាលពីថ្ងៃទី១៤ខែធ្នូឆ្នាំ២០១២ ក្រោមអធិបតីភាពលោកនាយករដ្ឋមន្រ្តី ហ៊ុន សែន។
យោងតាមសេចក្តីប្រកាសព័ត៌មានរបស់ទីស្តីការគណរដ្ឋមន្រ្តី បានឲ្យដឹងថា គ្រោះមហន្តរាយដែលបង្កឡើងដោយអគ្គីភ័យពីមួយឆ្នាំទៅមួយឆ្នាំ ចេះតែមានការកើនឡើងគួរឲ្យព្រួយបារម្ភ គំរាមកំហែងដល់សន្តិសុខ សណ្តាប់ធ្នាប់សាធារណៈប៉ះពាល់ដល់អាយុជីវិតសុខមាលភាព និងបំផ្លាញទ្រព្យសម្បតិ្តបរិស្ថាន ជះឥទ្ធិពលធ្ងន់ធ្ងរដល់គោលនយោបាយកាត់បន្ថយភាពក្រីក្ររបស់រដ្ឋាភិបាល។
សេចក្តីប្រកាសព័ត៌មានក៏បានបញ្ជាក់ទៀតថា សេចក្តីព្រាងច្បាប់ ស្តីពីការបង្កានិងពន្លត់អគ្គិភ័យ អាចចូលរួមចំណែកយ៉ាងសំខាន់ដល់ការថែរក្សាសន្តិសុខសុវត្ថិភាពសង្គម សណ្តាប់ធ្នាប់ សាធារណៈការពារអាយុជីវិត ទ្រព្យសម្បត្តិ កាត់បន្ថយភាពក្រីក្រនិងបង្កើនទំនុកចិត្តដល់វិនិយោគិន និងអ្នកទេសចរ។
សេចក្តីព្រៀងច្បាប់ ដែលមាន៨ជំពូកនិង៣៣មាត្រានេះ មានគោលដៅកំណត់អំពីការទទួលខុសត្រូវរបស់ជនគ្រប់រូបនិងអំពីលក្ខខណ្ឌវិធានការនានាដើម្បីបង្កានិងពន្លត់អគ្គីភ័យ។
តាមការអះអាងរបស់លោកនេត វត្ថា ប្រធានការិយាល័យនគរបាលបង្កា និងពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញ បានថ្លែងឲ្យដឹងថា សេចក្តីព្រាងច្បាប់ ស្តីពីការបង្កានិងការពន្លត់អគ្គីភ័យនេះ ជួយសម្រួលបានច្រើនដល់មន្ត្រីរបស់លោកពីព្រោះមន្ត្រីរបស់លោកមានច្បាប់សម្រាប់ប្រើប្រាស់។ លោកថា ចាប់ពីខែមករាដល់ខែធ្នូឆ្នាំ ២០១២ នេះគ្រោះអគ្គីភ័យ បានកើតឡើងនៅក្នុងរាជធានីភ្នំពេញចំនួន៧១ ករណី សម្លាប់មនុស្សម្នាក់និងរបួស៨ នាក់។ គ្រោះអគ្គីភ័យក្នុងមួយឆ្នាំៗ បំផ្លាញទ្រព្យសម្បត្តិពលរដ្ឋអស់ពី៦៥ លានដុល្លារទៅ៧៥ លានដុល្លារ។
គួរបញ្ជាក់ថា កាលពីថ្ងៃទី៨ ខែធ្នូ អគ្គីភ័យមួយបានឆេះផ្សាររាត្រីនៅឯខេត្តសៀមរាប បណ្តាលឲ្យមនុស្សស្លាប់ចំនួន៨នាក់និងការខូចខាតត្រូវបានប៉ាន់ប្រមាណ ជាងមួយលានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ