UNISCO បារម្ភពីការសម្លាប់សត្វព្រៃនៅឧទ្យានបេតិកភណ្ឌនៅអាហ្វ្រិកខាងត្បូង
សម័យប្រជុំពេញអង្គលើកទី ៣៧ របស់គណៈកម្មាធិការបេតិកភណ្ឌពិភពលោកកំពុងតែបន្តប្រព្រឹត្តទៅនៅទីស្តីការគណៈរដ្ឋមន្ត្រី នាទីក្រុងភ្នំពេញនៅថ្ងៃចន្ទទី ១៧ មិថុនា ២០១៣។ កិច្ចប្រជុំផ្តោតទៅលើការអភិរក្សសម្បត្តិបេតិកភណ្ឌ នៅអាហ្វ្រិកខាងត្បូង និងក៏មានការតាំងពិព័រណ៍បង្ហាញសម្បត្តិបេតិកភណ្ឌរបស់ប្រទេសហ្វីលីពីន និងជប៉ុនផងដែរ។
ចុះផ្សាយនៅថ្ងៃ៖
ស្តាប់ - ០២:១៣
គណៈកម្មាធិការបេតិកភណ្ឌពិភពលោកសម្តែងការព្រួយបារម្ភចំពោះ ការសម្លាប់សត្វ នៅឧទ្យានធម្មជាតិរបស់អាហ្វ្រិកខាងត្បូង។ នេះបើតាម លោក ឯក ថា អ្នកនាំពាក្យរបស់គណៈកម្មាធិការបេតិកភណ្ឌពិភពលោកលើកទី៣៧នៅថ្ងៃចន្ទទី១៧ មិថុនា។
ការព្រួយបារម្ភរបស់គណៈកម្មាធិការបេតិកភណ្ឌពិភពលោកនេះ គឺដោយសារតែសត្វព្រៃ នៅក្នុងឧទ្យានuKhahlamba / Drakensberg Park របស់អាហ្វ្រិកខាងត្បូង ដែលស្ថិតក្នុងបញ្ជីបេតិកភណ្ឌពិភពលោកនោះ ត្រូវរងការបាញ់សម្លាប់។ ការបាញ់សម្លាប់នេះដែលខូចខាតដល់បេតិកភណ្ឌធម្មជាតិរបស់ពិភពលោក។
ក្នុងកិច្ចប្រជុំ នៅថ្ងៃល្ងាចថ្ងៃចន្ទនេះ រវាងគណៈកម្មាធិការបេតិកភណ្ឌពិភពលោក និង រដ្ឋមន្ត្រីក្រសួងវប្បធម៌ របស់អាហ្វ្រិកខាងត្បូងនោះ លោកឯក ថា បានឱ្យដឹងថា ការប្រជុំនេះ នឹងលើកទឹកចិត្ត ក៏ដូចជាផ្តល់យោបល់ដល់រដ្ឋអាហ្វ្រិកខាងត្បូងដើម្បីការពារ និងអភិរក្សតំបន់ឧទ្យានការពារសត្វព្រៃរបស់ UNISCOនេះឱ្យកាន់តែមានលក្ខណៈល្អប្រសើរ។
គួរបញ្ជាក់ថា លោកស្រី IRANA BOKOVA អគ្គនាយិកាអង្គការយូណេស្កូ ក្នុងសន្និសីទសារព័ត៌មាន នៅថ្ងៃចន្ទទី១៧ មិថុនានេះ នៅវិមានសន្តិភាពក្រុងភ្នំពេញ បានបញ្ជាក់ថា កិច្ចប្រជុំ បេតិកភណ្ឌពិភលោកលើកទី៣៧នេះ មានសារៈសំខាន់ណាស់។ មានសារៈសំខាន់ព្រោះ កិច្ចប្រជុំនេះ គឺផ្តោតលើការអភិវឌ្ឍន៍ ជាចេរភាព នូវបេតិកភណ្ឌវប្បធម៌ និងការដោះស្រាយ នៃបញ្ហាប្រឈម រួមទាំងការការពារ និងការអភិរក្សសម្បតិ្តបេតិកភណ្ឌ និងចុងក្រោយ គឺបញ្ហាថវិកាសម្រាប់ការអភិវឌ្ឍសម្បតិ្តបេតិកភណ្ឌដែលមានស្រាប់កន្លងមក។
ក្រៅពីកិច្ចប្រជុំ រវាងគណៈកម្មាធិការបេតិកភណ្ឌពិភពលោក នឹង រដ្ឋមន្ត្រីក្រសួងវប្បធម៌ របស់អាហ្វ្រិកខាងត្បូងនោះ ក៏មានដែរ ការដាក់បង្ហាញពិព័រណ៍របស់ប្រទេសហ្វីលីពីន និងប្រទេសជប៉ុនផងដែរ។
កិច្ចប្រជុំលើកទី៣៧ នៃគណៈកម្មាធិការបេតិកភណ្ឌពិភពលោក ដែលកម្ពុជាធ្វើជាម្ចាស់ផ្ទះនេះ បានបើកថ្ងៃទី ១៦ មិថុនា នៅទីក្រុងភ្នំពេញ ហើយនិងបិទបញ្ចប់ទៅវិញ នៅ ថ្ងៃទី២៧ មិថុនា នៅខេត្តសៀមរាប។ កិច្ចប្រជុំលើកទី៣៧នេះ មានការចូលរួមពីសំណាក់ប្រតិភូជាង១៣០០នាក់ មកពី១២៨ប្រទេសដែលជាសមាជិកអនុសញ្ញាឆ្នាំ១៩៧២ ស្តីពីការការពារបេតិកភណ្ឌពិភពលោក វប្បធម៌ និងធម្មជាតិនៃអង្គការយូណេស្កូ។
នៅក្នុងកិច្ចប្រជុំដែលកម្ពុជា ជាម្ចាស់ផ្ទះនេះ សម្បត្តិបេតិកភណ្ឌមនុស្សជាតិចំនួន៣១ ដែលមកពីប្រទេសនានាលើពិភពលោកនឹងត្រូវស្នើសុំចុះបញ្ជីជាបេតិកភណ្ឌពិភពលោកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ