សង្គមស៊ីវិលបានអត្ថាធិប្បាយអំពីស្ថានភាពរបស់គណបក្សប្រឆាំង នៅពេល សម រង្ស៊ី មកដល់កម្ពុជា
ប្រសិនបើគ្មានអ្វីប្រែប្រួល លោកសម រង្ស៊ីនឹងមកដល់កម្ពុជានៅព្រឹកថ្ងៃសុក្រទី១៩កក្កដាក្នុងសប្តាហ៍នេះ។ តើវត្តមានលោកសម រង្ស៊ីដែលអ្នកគាំទ្របានរង់ចាំជាង៣ឆ្នាំមកហើយនោះ នឹងអាចជួយប្រជាប្រិយភាពរបស់គណបក្សប្រឆាំងមួយនេះបានប៉ុណ្ណាដែរ? អ្នកតាមដានស្ថានការណ៍នយោបាយកម្ពុជាបានបញ្ចេញអត្ថាធិប្បាយផ្សេងៗគ្នាជុំវិញបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ការទាក់ទាញអ្នកបោះឆ្នោតបន្ថែមអោយគាំទ្រគណបក្សសង្គ្រោះជាតិក្រោមវត្តមានរបស់លោកសម រង្ស៊ីនោះ គឺវាអាស្រ័យនឹងរបៀបនៃការឃោសនាតែប៉ុណ្ណោះ។ នេះគឺជាការអត្ថាធិប្បាយរបស់ លោកកែម ឡី អ្នកវិភាគសង្គមនយោបាយឯករាជ្យមួយរូបនៅកម្ពុជា។ អ្នកតាមដានសង្គមនយោបាយកម្ពុជារូបនេះទទួលស្គាល់ថា វត្តមានរបស់លោកសម រង្ស៊ីនឹងផ្តល់ទំនុកចិត្តបន្ថែមទៀតដល់សមាជិករបស់គណបក្សប្រឆាំង ជាការពិត ក៏ប៉ុន្តែប្រសិនបើក្នុងរយៈនៃការឃោសនាដែលនៅសេសសល់នេះ លោកសម រង្ស៊ី មិនបានរកឃើញរបៀបឃោសនាថ្មី បញ្ចេញការទាមទារថ្មីដែលជាប្រយោជន៍រួមរបស់ប្រទេសជាតិនោះទេ គណបក្សសង្គ្រោះជាតិនេះ មិនអាចស្រូបយកអ្នកបោះឆ្នោតថ្មីបន្ថែមទៀត ពិសេសអ្នកមិនទាន់សម្រេចចិត្តនៅឡើយ នោះទេ។
យល់ឃើញផ្សេងពីនេះ លោក គល់ បញ្ញា នាយកប្រតិបត្តិអង្គការសង្កេតការណ៍បោះឆ្នោត ខុមហ្វ្រែលបានអះអាងថា វត្តមានលោកសម រង្ស៊ី ពិតជាមានប្រយោជន៍ក្នុងការស្រូបយកអ្នកគាំទ្រថ្មីបន្ថែមទៀត។ ពីព្រោះ បើតាមលោកគល់ បញ្ញា ការផ្តុំកំលាំងនៃវត្តមានមេដឹកនាំសំខាន់ទាំងពីររបស់គណបក្សប្រឆាំង គឺលោកកឹម សុខា និងលោកសម រង្ស៊ី នឹងធ្វើអោយសកម្មភាពឃោសនាក្នុងដំណាក់កាលចុងក្រោយនេះ កាន់តែសស្រាក់សស្រាំថែមទៀត។
ចំពោះប្រធានអង្គការខុមហ្វ្រែលរូបនេះ គ្មានឡើយការបែកបាក់ផ្ទៃក្នុងនៃគណបក្សប្រឆាំង នៅចំពោះមុខវត្តមានរបស់លោកសម រង្ស៊ី នៅក្នុងប្រទេសកម្ពុជា ខណៈដែលគណបក្សសម្ព័ន្ធទាំងពីរ បានចងក្រងកិច្ចព្រមព្រៀងផ្លូវការរឹងមាំហើយ ទាក់ទងនឹងរចនាសម្ព័ន្ធ និងការបែងចែកអំណាច និងតួនាទីនៃសមាជិកគណបក្សទាំងពីរនោះ។
សម្រាប់លោក កែម ឡី វិញ ទំនងជាសេណារីយ៉ូនេះ សេណារីយ៉ូដែលរដ្ឋាភិបាលអនុញ្ញាតអោយលោកសម រង្ស៊ី អាចត្រឡប់ចូលក្នុងប្រទេសវិញបាននេះ នៅមិនទាន់ចប់នៅឡើយទេ ឬក៏អាចមានអ្វីនៅពីក្រោយនេះទៀត។ ដូច្នេះ គេគួរនៅរង់ចាំមើលរហូតដល់លោកសម រង្ស៊ីមកដល់កម្ពុជា នៅថ្ងៃសុក្រនេះសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ