ការផ្លាស់ប្ដូរមន្ត្រីពន្ធនាគារធ្វើឱ្យសង្គមស៊ីវិលយល់ថា ជាសញ្ញានៃកំណែទម្រង់ផ្លូវត្រូវមួយ
មន្ត្រីចំនួន ១៨ រូបបំរើការងារនៅអគ្គនាយកដ្ឋានពន្ធនាគារ ត្រូវបានក្រសួងមហាផ្ទៃប្រកាសផ្លាស់ប្តូរមុខតំណែង កាលពី ថ្ងៃទី ២០ ខែសីហា ឆ្នាំ ២០១៣ នៅទីស្ដីការក្រសួងមហាផ្ទៃ។ មន្ត្រីដែលត្រូវបានផ្លាស់ប្ដូរមុខតំណែងទាំងនោះ មានដូចជា អគ្គនាយករង ១រូប អនុប្រធាននាយកដ្ឋាន ៤ រូប និងថ្នាក់ប្រធាន អនុប្រធានការិយាល័យមួយចំនួនផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ការផ្លាស់ប្ដូរមន្ត្រីពន្ធនាគារជាន់ខ្ពស់ជាច្រើននេះ ត្រូវបានមន្ត្រីសិទ្ធិមនុស្ស យល់ឃើញថា ជាសញ្ញាណនៃកំណែទម្រង់ល្អមួយចំនួន ដើម្បីឆ្លើយតបទៅនឹងការប្រយុទ្ធប្រឆាំងនឹងអំពើទារុណកម្មលើអ្នកទោស និងដើម្បីលុបបំបាត់ភាពអសកម្មមួយចំនួនក្នុងពន្ធនាគារ។ ហើយបើតាមមន្ត្រីជាន់ខ្ពស់មួយរូបរបស់អគ្គនាយកដ្ឋានពន្ធនាគារនៃក្រសួងមហាផ្ទៃ ដែលបានដកស្រង់ដោយ ទីភ្នាក់ងារសារព័ត៌មានកម្ពុជា AKP នៅថ្ងៃសុក្រទី២៣ សីហា បានបញ្ជាក់ថា ក្រសួងមហាផ្ទៃនឹងចាត់វិធានការតាមច្បាប់ ចំពោះមន្ត្រីពន្ធនាគារណា ដែលប្រើអំណាចធ្វើទារុណកម្មទៅលើទណ្ឌិត កំពុងជាប់ពន្ធនាគារនោះ។ ដោយស្នើឱ្យមន្ត្រី ដែលទើបតែតែងតាំងខាងលើ ធ្វើការងារឱ្យបានល្អ។
បើតាមលោក អំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការសិទ្ធិមនុស្សលីកាដូនេះជាសញ្ញាវិជ្ជមានមួយ ដើម្បីទប់ស្កាត់អំពើទារុណកម្មទៅលើអ្នកទោសនៅប្រទេសកម្ពុជា។ លោករលឹកថា កម្ពុជាជាប្រទេសមួយក្នុងកិច្ចព្រមព្រៀងប្រយុទ្ធប្រឆាំង នឹងអំពើទារុណកម្មលើអ្នកទោស។
មន្ត្រីផ្នែកសិទ្ធិមនុស្សរូបនេះ អះអាងថា ការផ្លាស់ប្ដូរបានធ្វើឡើង ស្ទើរតែគ្រប់ពន្ធនាគារទាំងអស់។ ហើយលោកបានបញ្ជាក់ថា មានហេតុផលបីយ៉ាងក្នុងផ្លាស់ប្ដូរនេះ។ គឺមានមន្ត្រីចូលនិវត្តន៍ មានការផ្លាស់ប្ដូរតាមបែបបទរដ្ឋបាល ឬមន្ត្រីកាន់តំណែងយូរឆ្នាំ និងជាពិសេសលោក យល់ថា មានហេតុផលមួយចំនួនទាក់ទងនឹងកំហុសឆ្គង របស់មន្ត្រីគ្រប់គ្រងចាស់កន្លងមក។
ចំពោះ លោក ចាន់ សាវ៉េត មន្ត្រីសិទ្ធិមនុស្សរបស់អង្គការអាដហុក វិញបានស្វាគមន៍ សញ្ញាណវិជ្ជមានមួយនេះ សម្រាប់ឈានទៅរកកំណែទម្រង់ភាពមិនប្រក្រតីទាំងឡាយ ដែលកើតមានឡើងកន្លងមក។ ដោយលោកពន្យល់ថា ការផ្លាស់ប្ដូរពីមុនគឺគ្រាន់តែជាការផ្លាស់ប្ដូរ មួយចំនួន ទៅលើមន្ត្រីចូលនិវត្តន៍ និងពីកន្លែងមួយទៅកន្លែងមួយប៉ុណ្ណោះ។ តែលើកនេះ លោក ចាន់ សាវ៉េត អះអាងថា ជាការផ្លាស់ប្ដូរមួយ ដើម្បីឈានទៅរកផ្លូវល្អត្រឹមត្រូវចំគោលដៅ។
លោក បានកត់សំគាល់ថា កន្លងមកគេតែមានពាក្យលេចលឺថា មានការយកលុយពីក្រុមគ្រួសារអ្នកទៅសួរសុខទុក្ខអ្នកទោស មានការលក់ដូរនៅក្នុងពន្ធនាគារ ដោយយកតម្លៃខ្ពស់លើសទីផ្សារច្រើន។ ហើយជាពិសេសជាងនេះទៅទៀត លោក អះអាងថា មានការស្លាប់អ្នកទោសក្នុងពន្ធនាគារ ហើយមិនសូវមានការបង្ហាញរបាយការណ៍ច្បាស់លាស់អំពីការស្លាប់នេះទេ។
សូមបញ្ជាក់ថា ក្នុងចំណោមពន្ធនាគាចំនួន ២៧ ក្នុងព្រះរាជាណាចក្រកម្ពុជា មានអ្នកទោសចំនួន ប្រមាណជាង ១៥ ០០០នាក់។ គឺរាប់ទាំងពន្ធនាគា ស៊ីវិល ពន្ធនាគារយោធា និងពន្ធនាគារបស់សាលាក្ដីខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ