ប្រធានាធិបតីចិន សន្យាគាំទ្រកិច្ចប្រឹងប្រែង របស់កម្ពុជា ក្នុងការរក្សាសន្តិសុខ និងស្ថិរភាពជាតិ
នាយករដ្ឋមន្ត្រីកម្ពុជា និងប្រធានាធិបតីចិន បានជួបគ្នា មុនកិច្ចប្រជុំកំពូលលើកទី៤ នៃសន្និសីទស្តីពីវិធានការកសាងទំនុកចិត្ត និងអន្តរសកម្មភាពនៅអាស៊ី។ បើតាមទីភ្នាក់ងារសារព័ត៌មានស៊ីនហួរបស់ចិន ក្នុងជំនួបទ្វេភាគីនោះ លោក ស៊ី ជិនពីង «បានប្តេជ្ញាគាំទ្រកិច្ចខិតខំការពារសន្តិសុខ និងស្ថិរភាពជាតិរបស់កម្ពុជា ព្រមទាំងសន្យា បន្តជំនួយសម្រាប់អភិវឌ្ឍន៍សេដ្ឋកិច្ច និងសង្គមខ្មែរ។ ហើយលោក ហ៊ុន សែន បានថ្លែងថា «រដ្ឋាភិបាល និងប្រជាជនកម្ពុជា សាទរជំនួយរយៈពេលវែងរបស់ចិន និងពេញចិត្តនឹងចំណងមិត្តភាពរវាងប្រទេសទាំងពីរយ៉ាងខ្លាំង»។
ចុះផ្សាយនៅថ្ងៃ៖
ស្តាប់ - ០៣:០៧
លោក ហ៊ុន សែន ដែលកំពុងស្ថិតនៅប្រទេសចិន ដើម្បីចូលរួមកិច្ចប្រជុំកំពូលលើកទី៤ នៃសន្និសីទស្តីពីវិធានការកសាងទំនុកចិត្ត និងអន្តរសកម្មភាពនៅអាស៊ី បានប្រជុំទ្វេរភាគី ជាមួយលោក ស៊ី ជិនពីង រួចហើយ កាលពីថ្ងៃអាទិត្យ បន្ទាប់ពីបានទៅដល់ទីក្រុងសៀងហៃ មិនយូរប៉ុន្មាន។
ទីភ្នាក់ងារសារព័ត៌មានស៊ីនហួរបស់ចិនរាយការណ៍ថា ក្នុងជំនួបនោះ ប្រធានាធិបតីចិនកោតសរសើរចំណងមិត្តភាពកម្ពុជាចិន ហើយស្នើឱ្យប្រទេសទាំងពីរ«ពង្រឹងភាពជាដៃគូរបស់ខ្លួនឱ្យបានកាន់តែខ្លាំងក្លាថែមទៀត ទោះបីជាស្ថានការណ៍អន្តរជាតិប្រែប្រួលយ៉ាងណាក្តី»។ ស៊ីហួបន្តស្រង់សម្ដីរបស់លោក ស៊ី ជិនពីងថា «ប្រទេសចិនបានត្រៀមលក្ខណៈរួចជាស្រេច ក្នុងការបន្តទស្សនកិច្ចទៅវិញទៅមក នៃគណៈប្រតិភូជាន់ខ្ពស់ជាមួយកម្ពុជា លើកកម្ពស់ទំនាក់ទំនង រវាងគណៈបក្សកាន់អំណាចនៃប្រទេសទាំងពីរ និងចែករំលែកបទពិសោធន៍ផ្នែកអភិបាលកិច្ច»។
បើតាមប្រភពដដែល ប្រធានាធិបតីចិន«បានប្តេជ្ញាគាំទ្រកិច្ចខិតខំប្រឹងប្រែងរបស់កម្ពុជា ក្នុងការការពារសន្តិសុខ និងស្ថេរភាពជាតិ ព្រមទាំងសន្យាបន្តជំនួយសម្រាប់អភិវឌ្ឍន៍សេដ្ឋកិច្ចនិងសង្គមកម្ពុជា»ផងដែរ។ លោក ស៊ី ជិនពីង បានបញ្ជាក់ប្រាប់ទីភ្នាក់ងារស៊ីនហួបន្ថែមថា«ប្រទេសចិនជ្រោមជ្រែងប្រជាជនកម្ពុជាឱ្យបន្តដើរតាមវិថីនៃការអភិវឌ្ឍ ដែលសមស្របទៅនឹងលក្ខខណ្ឌនៃប្រទេសរបស់ខ្លួន»។
លោកប្រធានាធិបតីចិនបានពាវនាវឱ្យបង្កើនការវិនិយោគក្នុងវិស័យកសិកម្ម ទេសចរណ៍ និងការអនុវត្តគម្រោងទាំងឡាយទាក់ទងនឹងថាមពលទឹក ធ្យូងថ្ម និងតំបន់សេដ្ឋកិច្ចពិសេសក្នុងប្រទេសកម្ពុជា ព្រមទាំងពង្រីកសហប្រតិបត្តិការផ្នែកវប្បធម៌ និងការផ្លាស់ប្តូរទស្សនកិច្ចយុវជនទៅវិញ ទៅមកដែរ។
ជាការឆ្លើយតប លោក ហ៊ុន សែន បានថ្លែងថា «រដ្ឋាភិបាល និងប្រជាជនកម្ពុជា វាយតម្លៃខ្ពស់ ចំពោះជំនួយរយៈពេលវែងរបស់ចិន និងពេញចិត្តនឹងចំណងមិត្តភាពរវាងចិន និងកម្ពុជា យ៉ាងខ្លាំង»។ ទីភ្នាក់ងារសារព័ត៌មានចិនបានស្រង់សម្ដីរបស់នាយករដ្ឋមន្ត្រីកម្ពុជាថា កិច្ចព្រមព្រៀងជាឯកច្ឆន្ទរបស់លោក ហ៊ុន សែន និងលោក ស៊ី ជិនពីង កាលពីខែមេសា ឆ្នាំមុន «ត្រូវបានអនុវត្តដោយភាគីទាំងពីរ ប្រកបដោយវឌ្ឍនភាពក្នុងវិស័យជាច្រើន»។
លោក ហ៊ុន សែន បានប្រាប់ទីភ្នាក់ងារសារព័ត៌មានស៊ីហួទៀតថា «ប្រទេសកម្ពុជាមានឆន្ទៈពង្រឹងភាពជាដៃគូជាមួយចិន ដោយប្តេជ្ញាសម្រួលដល់ការអនុវត្តគម្រោងទ្វេរភាគី ទាក់ទងនឹងសេដ្ឋកិច្ច ជីវភាពរបស់ប្រជាជន ក៏ដូចជាកិច្ចសហប្រតិបត្តិការក្នុងវិស័យសន្តិសុខ និងការអនុវត្តច្បាប់ដែរ»។ នាយករដ្ឋមន្ត្រីខ្មែរបានគូសបញ្ជាក់សារជាថ្មីម្តងទៀតថា «កម្ពុជានឹងបន្តដើរតួ ក្នុងន័យស្ថាបនា ដើម្បីបង្កើនចំណងមេត្រីភាពរវាងប្រទេសចិន និងសមាគមប្រជាជាតិអាស៊ីអាគ្នេយ៍» ហើយថា «កម្ពុជាបានត្រៀមធ្វើការជាមួយចិនរួចជាស្រេច ដើម្បីនាំជោគជ័យ មកឱ្យកិច្ចប្រជុំកំពូលស្តីពីវិធានការកសាងទំនុកចិត្ត និងអន្តរសកម្មភាពនៅអាស៊ី» ដែលនឹងប្រព្រឹត្តទៅ ពីថ្ងៃទី២០ ដល់ថ្ងៃទី២១ ខែឧសភា ឆ្នាំ២០១។
ទំនាក់ទំនងរវាងកម្ពុជា និងចិន បានឈានដល់កម្រិត «ភាពជាដៃគូយុទ្ធសាស្ត្រគ្រប់ជ្រុងជ្រោយលើគ្រប់វិស័យ» កាលពីឆ្នាំ២០១០ ហើយភាពជិតស្និទនេះក៏ជាប្រភពនៃក្តីបារម្ភនៃអ្នកតាមដាននយោបាយនៅកម្ពុជាថា វាអាចនាំឱ្យកម្ពុជាបាត់បង់អព្យាក្រឹតភាពរបស់ខ្លួន ក្នុងទំនាក់ទំនងការបរទេស។ ប៉ុន្តែ កន្លងទៅរដ្ឋាភិបាលបានបដិសេធ ហើយអះអាងថា កម្ពុជានៅតែមានជំហរឥតលម្អៀងដូចមានចែងក្នុងរដ្ឋធម្មនុញ្ញរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ