គណបក្សកាន់អំណាចរម្លឹកវិញ្ញាណក្ខន្ធអ្នកស្លាប់ក្នុងរបបខ្មែរក្រហមថ្ងៃ២០ឧសភា
នៅថ្ងៃទី២០ឧសភានេះគណបក្សប្រជាជនកម្ពុជា និងប្រជាជនខ្មែរជាច្រើន បានប្រារព្ធពិធីរម្លឹកវិញ្ញាណក្ខន្ធជនរងគ្រោះដោយអំពើឃោរឃៅក្នុងរបបខ្មែរក្រហម។ ពិធីនេះត្រូវបានប្រារព្ធធ្វើនៅឯសារមន្ទីរប្រល័យពូជសាសន៍ជើងឯងក្នុងរាជធានីភ្នំពេញ។ ខ្លឹមសារសំខាន់សម្រាប់ទិវា រម្លឹកពីភាពជូរចត់នៅក្នុងសម័យខ្មែរក្រហមឆ្នាំនេះ គឺអ្នកចូលរួមបានទទូចឲ្យសាលាក្តីខ្មែរ ពន្លឿនការកាត់ក្តីអតីតមេដឹកនាំខ្មែរក្រហមដែលកំពុងជាប់ចោទ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ប្រជាពលរដ្ឋខ្មែរស្នើសុំឲ្យពន្លឿនតុលាការអន្តរជាតិ ដែលកំពុងដំណើរការ បច្ចុប្បន្ននេះ ក្នុងប្រទេសកម្ពុជា កាត់ទោស អតីតមេដឹកនាំខ្មែរក្រហម អោយបានចប់ឆាប់ ដើម្បីជាមេរៀន សម្រាប់មនុស្សជំនាន់ក្រោយ កុំអោយអនុវត្តរបបបែបនេះឲ្យកើតមានសាជាថ្មី។ នេះគឺជាខ្លឹមសារចម្បងនៅក្នុងទិវារម្លឹកវិញ្ញាណក្ខន្ធជនរងគ្រោះក្នុងរបបខ្មែរក្រហមថ្ងៃទី ២០ឧសភាដែលរៀបចំដោយគណបក្សប្រជាជនប្រចាំរាជធានីភ្នំពេញ នៅឯសារមន្ទីរប្រល័យពូជសាសន៍ជើងឯក។
លោក ង៉ែត ចន្តាវី ប្រធានមន្ទីរគណបក្សប្រជាជនកម្ពុជា ប្រចាំរាជធានីភ្នំពេញ បានប្រាប់វិទ្យុបារាំងអន្តជាតិថា ដូចរាល់ឆ្នាំដែរ នៅថ្ងៃទី២០ឧសភានេះ គណបក្សប្រជាជនកម្ពុជា បានប្រារព្ធទិវានេះដើម្បីរម្លឹកពីប្រវត្តិជូរចត់ នៃរបបកម្ពុជាប្រជាធិបតេយ្យរយៈពេល ៣ឆ្នាំ ៨ខែ ២០ថ្ងៃ។ របបកម្ពុជាប្រជាធិបតេយ្យ ដែលបានបណ្តាលឲ្យប្រជាជនខ្មែរជិត២លាននាក់ស្លាប់ និងបន្សល់ទុក្ខនូវស្ត្រីមេម៉ាយ កូនកំព្រា និងភាពទុរគតយ៉ាងធ្ងន់ធ្ងរ ដល់ប្រទេសកម្ពុជា។
កម្មវិធី នៅក្នុងឆ្នាំនេះ រួមមាន ការរាប់បាត្រព្រះសង្ឃ ២៧០អង្គ ដោយមានវត្តមានអ្នកចូលរួម ចំនួនជាង ៥ពាន់នាក់ ដើម្បីឧទ្ទិសកុសល ដល់អ្នកដែលបានស្លាប់ នៅក្នុងរបបនោះ។ នេះបើតាមតំណាងគណបក្សប្រជាជនកម្ពុជាដែលបានប្រកាសឲ្យដឹង។ ក្រៅពីការរាប់បាត្រ ព្រះសង្ឃ ក៏មានផងដែរនូវការសម្តែងសិល្បៈស្តីពីការជម្លៀសប្រជាជន ការសម្លាប់រង្គាល នៅក្នុងសម័យខ្មែរក្រហម និងការថ្លែងវិយោគកថា ដោយសិស្ស-និស្សិត។
សូមរម្លឹកជូនថា របបខ្មែរក្រហម ឬប៉ុលពត ចន្លោះពីឆ្នាំ ១៩៧៥ ដល់១៩៧៩ បានសម្លាប់ប្រជាជនខ្មែរ អស់ប្រមាណជាជិត២លាននាក់។ កាលពីមុន ថ្ងៃទី ២០ ឧសភា ត្រូវបានគណបក្សប្រជាជនកម្ពុជា ចាត់ទុក ជាទិវាចងកំហឹង ជាមួយរបបខ្មែរក្រហម ប៉ុន្តែ ក្រោមស្មារតីបង្រួបបង្រួមជាតិ ពាក្យចងកំហឹង ត្រូវបានលុបចោល និងប្តូរទៅជាពិធីរម្លឹកវិញ្ញាណក្ខន្ធជនរងគ្រោះវិញ។
កន្លងមក តុលាការខ្មែរក្រហម បានបញ្ចប់សំណុំរឿង លេខ០០១ ដោយកាត់ទោស លោក កាំង ហ្គេចអ៊ាវ ហៅ ឌុច ឲ្យដាក់ពន្ធនាគារអស់មួយជីវិត។ បច្ចុប្បុន្ន អង្គជំនុំជម្រះនៃសាលាក្តីខ្មែរក្រហម កំពុងរៀបចំដំណើរការកាត់ក្តី ជាបន្តទៀតក្នុងសំណុំរឿង០០២ ដែលមានជនជាប់ចោទពីររូបគឺ នួន ជា និងខៀវ សំផន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ