ជប៉ុន ផ្តល់ជំនួយ ជិត ៣លានដុល្លារ សម្រាប់អភិវឌ្ឍន៍ធនធានមនុស្សកម្ពុជា
នៅឯទីស្តីការក្រសួងការបរទេសកម្ពុជាព្រឹកថ្ងៃទី ២៨ឧសភានេះ មានពិធីចុះហត្ថលេខាមួយ រវាងរដ្ឋមន្ត្រីការបរទេសកម្ពុជា លោក ហោ ណាំហុង និងឯកអគ្គរាជទូតជប៉ុន ប្រចាំកម្ពុជា ដើម្បីទទួលនូវជំនួយ របស់ជប៉ុននូវទឹកប្រាក់ជិត ៣០០លានយេន ឬ ស្មើនឹង ជិត៣ម៉ឺន ដុល្លា។ តាមគម្រោងនេះ មន្រ្តីរាជការវ័យក្មេងកម្ពុជា ២៤រូប នឹងទទួលបានអាហារូបករណ៍ ចេញទៅសិក្សា នៅប្រទេសជប៉ុន រយៈពេល ២ឆ្នាំ។
ចុះផ្សាយនៅថ្ងៃ៖
ស្តាប់ - ០២:១៦
តាមរយៈកញ្ចប់ទឹកប្រាក់ ជាជំនួយឥតសំណង របស់ជប៉ុនជិត ៣០០លានយេន រឺស្មើនឹង ជិត ៣ម៉ឺនដុល្លាអាមេរិកនេះ នឹងជួយអោយនិស្សិតកម្ពុជា ជាមន្រ្តីរាជការវ័យក្មេង ចំនួន២៤រូប បានចេញ ទៅសិក្សារយៈពេល ២ឆ្នាំ នៅប្រទេសជប៉ុន សម្រាប់មុខវិជ្ជាវិជ្ជាសាស្រ្ត និងវិស្វកម្ម។ នេះបើតាមការបញ្ជាក់ពីលោក គូម៉ាម៉ារូ យូជិ ឯកអគ្គរាជទូតជប៉ុន ប្រចាំនៅកម្ពុជា ដែលបានថ្លែង នៅក្នុងពិធីចុះហត្ថលេខា ជាមួយលោកឧបនាយករដ្ឋមន្រ្តី ហោ ណាំហុង រដ្ឋ មន្រ្តីក្រសួងការបរទេសកម្ពុជា នាព្រឹកថ្ងៃពុធទី២៨ឧសភា នៅទីស្តីការក្រសួងការបរទេស។
នៅក្នុងឳកាសនោះ លោកឯកអគ្គរាជទូតជប៉ុន បានមានប្រសាសន៍បន្ថែមថាគម្រោងនេះ រដ្ឋាភិបាលជប៉ុន បានប្រើសម្រាប់និស្សិតអាហារូបករណ៍កម្ពុជា ចំនួន២៤នាក់ ដើម្បីទៅសិក្សា នៅប្រទេសជប៉ុន រយៈពេល២ឆ្នាំ ហើយអាហារូបករណ៍នេះ ត្រូវបានផ្តល់ជូនជាពិសេសចំពោះមន្ត្រីរដ្ឋាភិបាលវ័យក្មេង ដែលមានសមត្ថភាព ហើយអ្នកទាំងនោះនឹងត្រូវបានរំពឹងថា នឹងចូលរួម ដល់ការអភិវឌ្ឍន៍សេដ្ឋកិច្ច និងសង្គម ដល់ប្រទេសកម្ពុជា បន្ទាប់ពីពួកគេបានវិលត្រឡប់មកប្រទេសរបស់ខ្លួនវិញ។
លោកឧបនាយករដ្ឋមន្ត្រី ហោ ណាំហុង រដ្ឋមន្រ្តីក្រសួងការបរទេសកម្ពុជា បានស្វាគមន៍ចំពោះគម្រោងរបស់ជប៉ុននេះ និងបានមានប្រសាសន៍ថា នេះជាគម្រោង ដែលស្របទៅនឹងគោលដៅអាទិភាព របស់រាជរដ្ឋាភិបាលកម្ពុជា ក្នុងការអភិវឌ្ឍន៍ធនធានមនុស្ស នៅប្រទេស និងក៏ដើម្បីចូលរួមចំណែក ក្នុងការអភិវឌ្ឍន៍ធនធានមនុស្ស ការកសាងសមត្ថភាព និងគុណភាព នៅប្រទេសកម្ពុជាផងដែរ។
សូមបញ្ជាក់ថា ចាប់ពីឆ្នាំ២០០៣ រហូតមកដល់ឆ្នាំ ២០១៣ មាននិស្សិតកម្ពុជា ចំនួន២៦១នាក់ហើយ បានចេញទៅសិក្សា នៅប្រទេសជប៉ុន លើមុខជំនាញ ទំនាក់ទំនងអន្តរជាតិ កសិកម្ម ហេដ្ឋារចនាសម្ព័ន្ធ និងវិស័យជាច្រើនទៀត ហើយពួកគេបច្ចុប្បន្នកំពុងប្រើប្រាស់ជំនាញ របស់ពួកគេ នៅតាមមន្ទីរក្រសួងនានា នៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ