ប្រមុខរដ្ឋាភិបាលកម្ពុជា និងជប៉ុនប្រកាសអំពីការបង្កើតដៃគូយុទ្ធសាស្ត្រ
នាយករដ្ឋមន្ត្រីកម្ពុជា និងនាយករដ្ឋមន្ត្រីជប៉ុន បានយល់ស្របគ្នាថានឹងបង្កើនទំនាក់ទំនងទ្វេភាគី រវាងប្រទេសទាំងពីរ ឱ្យដល់កម្រិតទំនាក់ទំនងយុទ្ធសាស្ត្រតែម្តង។ ឆន្ទៈរួមនេះបានស្តែងឡើង ក្នុងសន្និសីទកាសែតរួមគ្នាមួយ នៅប្រទេសជប៉ុន នាល្ងាចថ្ងៃទី១៥ធ្នូម្សិលមិញ បន្ទាប់ពីភាគីទាំងពីរបានមើលឃើញការរីកចម្រើននៃសហប្រតិបត្តិការទ្វេភាគីរវាងរដ្ឋាភិបាលក្រុងភ្នំពេញ និងរដ្ឋាភិបាលក្រុងតូក្យូ។ នយោបាយការបរទេសនេះនឹងនាំជំនួយជប៉ុនបន្ថែមមកឱ្យកម្ពុជា ប៉ុន្តែមិនបណ្តាលឱ្យកម្ពុជាមានបញ្ហាជាមួយចិនទេ នេះបើតាមអ្នកវិភាគ បើទោះបីជាបច្ចុប្បន្ន កម្ពុជាជាដៃគូយុទ្ធសាស្ត្រគ្រប់ជ្រុងជ្រោយរបស់ចិនក្តី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
លោក ហ៊ុន សែន និងលោក ស៊ីនហ្សូ អាបេ (Shinzo Abe) បានប្រកាសជាមួយគ្នាថានឹង បង្កើនទំនាក់ទំនងទ្វេភាគី រវាងប្រទេសទាំងពីរ ឱ្យដល់កម្រិតទំនាក់ទំនងយុទ្ធសាស្ត្រ។ សេចក្តីថ្លែងការណ៍នេះ ត្រូវបានធ្វើឡើង ក្រោយការបញ្ចប់កិច្ចប្រជុំកំពូលទ្វេភាគីមួយ អំឡុងពេលទស្សនកិច្ចផ្លូវការរបស់នាយករដ្ឋមន្ត្រីកម្ពុជា នៅប្រទេសជប៉ុន។ លោក ស៊ីនហ្សូ អាបេ អះអាងអំពីការបន្តផ្តល់ជំនួយបន្ថែមសម្រាប់អភិវឌ្ឍន៍កម្ពុជា ក្នុងនោះមានទាំង ការបញ្ជូនអ្នកជំនាញការជប៉ុនឱ្យមកជួយកែលម្អប្រព័ន្ធបោះឆ្នោតនៅកម្ពុជា និងការភ្ជាប់ ជើងហោះហើរផ្ទាល់ពីជប៉ុនមកកម្ពុជា ក្នុងពេលឆាប់ៗ។
បំណងលើកកម្ពស់ទំនាក់រវាងកម្ពុជា និងជប៉ុន ឱ្យដល់កម្រិតយុទ្ធសាស្ត្រនេះបានកើតឡើងនៅក្រោយពេលដែលកម្ពុជាបានក្លាយជាដៃគូយុទ្ធសាស្ត្រគ្រប់ជ្រុងជ្រោយរបស់ចិន នៅឆ្នាំ២០១០។ លោក សុខ ទូច អ្នកវិភាគនយោបាយកម្ពុជា យល់ឃើញថា ដៃគូយុទ្ធសាស្ត្ររវាងកម្ពុជា និងជប៉ុន នឹងពង្រឹងប្រព័ន្ធច្បាប់ និងការប្រឆាំងអំពើពុករលួយនៅកម្ពុជា។ លោកពន្យល់ថា រាល់ការវិនិយោគរបស់ជប៉ុនគឺតែងតែផ្អែកលើមូលដ្ឋានច្បាប់ ខុសពីចិន ដែលបានមើលរំលងបញ្ហានេះ។
ម្យ៉ាងទៀត ចំពោះលោក សុខ ទូច បទពិសោធន៍របស់កម្ពុជាក្នុងទំនាក់ទំនងផ្តាច់មុខជាមួយមហាអំណាចពិភពលោក គ្មានអ្វីចំណេញឡើយសម្រាប់កម្ពុជា។ បណ្ឌិតវិទ្យាសាស្ត្រនយោបាយរូបនេះ អះអាងថា កម្ពុជាមិនមែនជា«កូនក្រមុំ»របស់មហាអំណាចណាមួយឡើយ ពោលគឺក្នុងនាមជារដ្ឋឯករាជ្យ មានអធិបតេយ្យ កម្ពុជាត្រូវការកិច្ចសហប្រតិបត្តិការអន្តរជាតិស្មើភាព ជាមួយបណ្តាប្រទេសនានាលើពិភពលោក ដូចជាអាមេរិក និងកូរ៉េជាដើម។
ប្រទេសជប៉ុនបានទទួលស្គាល់ឯករាជ្យភាពរបស់ប្រទេសកម្ពុជាតាំងពីដើមទី ពោលគឺមុនប្រទេសចិនទៅទៀត។ រហូតដល់ពេលនេះ ទំនាក់ទំនងការទូតកម្ពុជា-ជប៉ុន មានអាយុ៦០ឆ្នាំហើយ ចំណែកឯចំណងទូតកម្ពុជា-ចិន ទើបតែបាន៥៥ឆ្នាំប៉ុណ្ណោះ។ បើតាមលោក សុខ ទូច ទំនាក់ទំនងយុទ្ធសាស្ត្រកម្ពុជា-ជប៉ុន អាចធ្វើឱ្យចិន ដែលជាយក្សនៅអាស៊ី និងដែលជាប្រទេសផ្តល់ជំនួយឱ្យកម្ពុជាច្រើនជាងគេ ដោយឥតលក្ខខណ្ឌ«បន្ទន់ឥរិយាបទ» ចំពោះកម្ពុជា៕1
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ