កិច្ចប្រជុំគណៈកម្មការអន្តរជាតិអភិវឌ្ឍន៍តំបន់អង្គរលើកទី២៣ នៅសៀមរាប
នៅថ្ងៃទី ៤ និងទី៥ ខែមិថុនា ឆ្នាំ ២០១៤ គណៈកម្មការអន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា ICC អង្គរ រៀបចំប្រជុំបច្ចេកទេស លើកទី២៣ របស់ខ្លួន នៅខេត្តសៀមរាប ។ កម្មវិធីនេះ ត្រូវបានធ្វើឡើង ដើម្បីពិនិត្យរបាយការណ៍ការងាររបស់ ICC និងស្តាប់របាយការណ៍ការងារ របស់អាជ្ញាធរអប្សរា ឆ្នាំ ២០១៣ ពិនិត្យរបាយការណ៍ របស់ស្ថាប័នអន្តរជាតិ និងជាតិចំនួន ១១គម្រោង ដែលបានអនុវត្តក្នុងឆ្នាំ ២០១៣ ទាក់ទងនឹងការងារអភិរក្សរមណីយដ្ឋាន និងការដ្ឋានជួសជុលប្រាសាទ របស់អាជ្ញាធរអប្សរា ប្រទេសចិន ឥណ្ឌា បារាំង ជប៉ុន និងរបាយការណ៍ជាច្រើនផ្សេងៗទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
កិច្ចប្រជុំ គណៈកម្មការអន្តរជាតិសម្របសម្រួលកិច្ចគាំពារនិងអភិវឌ្ឍន៍តំបន់អង្គរហៅកាត់ថា ICC អង្គរ លោកទី២៣ បានរៀបចំធ្វើហើយ នៅថ្ងៃទី៤ និងទី៥ ខែមិថុនានេះ នៅទីក្រុងសៀមរាប ដែលមានសមាជិកចូលរួមប្រមាណជា ៣០០នាក់។
លោក សុខ អាន ឧបនាយករដ្ឋមន្ត្រី និងជាប្រធានអាជ្ញាធរអប្សរា បានធ្វើជាអធិបតីនៃពិធីនេះ រួមជាមួយសហប្រធាន ICC ភាគីបារាំងលោក Romain Louvet ទីប្រឹក្សាស្ថានទូតបារាំងផ្នែកសហប្រតិបត្តិការ និងការងារ វប្បធម៌ និងភាគីជប៉ុនលោក Yoshihiro Higuchi រដ្ឋមន្ត្រី និងជាអនុប្រធានបេសកកម្មការទូតជប៉ុន ដឹកនាំការប្រជុំចំនួនពីរថ្ងៃ។
ប្រធានបទនៃកិច្ចប្រជុំទាំងពីរថ្ងៃនេះត្រូវគេផ្សា្យដឹងថា មានចំនួន១៤ប្រធានបទក្នុងនោះក៏មាន ការពិនិត្យទៅលើរបាយការណ៍ ICC និងស្តាប់របាយការណ៍របស់អាជ្ញាធរអប្សារាឆ្នាំ២០១៣ កម្មវិធីស្រាវជ្រាវក្រុងអង្គធំ កោះកេរ វិធីសាស្ត្រស្រាវជ្រាវកុលាភាជន៍និងសាសនា គម្រោងអភិវឌ្ឍន៍ភ្នំគូលេន គម្រោងអភិវឌ្ឍន៍ប្រកបដោយចីរភាពនៅរមនីយដ្ឋានអង្គរ និងកម្មវិធីថត ៣D នៅអង្គរវត្តជាដើម។
កិច្ចប្រជុំលើកទី២៣នេះ ជាដំបូង គឺឧទ្ទិសដល់វិញ្ញាណក្ខន្ធ របស់អ្នកជំនាញការអន្តរជាតិបីរូបដែលបានចែកឋានទៅកាលពីពេលថ្មីៗនេះ។ មនុស្សសំខាន់ទាំងបីរូបនោះមាន លោកបណ្ឌិត Pascal Royere ស្ថាបត្យករបារាំងដែលបានចំណាយពេល១៦ឆ្នាំសម្រាប់គម្រោងជួសជុលប្រាសាទបាភួន។ លោក បណ្ឌិត Hyroyuki Suzuki អ្នកជំនាញអភិរក្សបេតិកភ័ណ្ឌជនជាតិជប៉ុន ដែលបានជួយការងារអង្គរប្រចាំ ICC ជាង១០ឆ្នាំ និង លោកបណ្ឌិត Tsuyoshi Narita អ្នកជំនាញអភិរក្សបេតិកភ័ណ្ឌជនជាតិជប៉ុនដែរ ដែលបានជួយការងារអង្គរប្រចាំ ICC ដែរជាង១០ឆ្នាំ។
សូមបញ្ជាក់ថា គណៈកម្មការ ICC បានបង្កើតឡើងនៅឆ្នាំ១៩៩៣ ក្រោយសន្នីសីទអន្តរជាតិលើកទី១ ស្តីពីអង្គរនៅទីក្រុងតូក្យូ ប្រទេសជប៉ុន តាមសំណូមពររបស់គណៈកម្មាធិការ
បេតិកភ័ណ្ឌពិភពលោក ពេលទទួលចុះអង្គរទៅក្នុងបញ្ជីបេតិកភណ្ឌពិភពលោក។ ការបង្កើតយន្តការអន្តរជាតិ ICC សម្រាប់អង្គរជាលក្ខខណ្ឌមួយក្នុងចំណោមលក្ខខណ្ឌទាំង៥ ដែលតម្រូវឲ្យអាជ្ញាធរកម្ពុជាបំពេញក្នុងរយៈពេល៣ឆ្នាំ ១៩៩៣ដល់ឆ្នាំ១៩៩៦ ហើយសមាជិកICC មានចំនួន៣៧ប្រទេស មកពីទ្វីបទាំង៥ និងមានអង្គការជាតិចំនួន១៣ទៀតចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ