ទាហានខ្មែរ ២នាក់ ស្លាប់ នៅក្នុងប្រទេសម៉ាលី
កងទាហានកម្ពុជា ២នាក់ ដែលបានទៅបម្រើការ នៅប្រទេសម៉ាលី ក្នុងបេសកកម្ម ក្រោមឆ័ត្ររបស់អង្គការសហប្រជាជាតិ បានស្លាប់ នៅថ្ងៃអង្គារម្សិលមិញ ដោយសារការទាស់ចំណីអាហារ និងបញ្ហាផ្លូវដង្ហើម។ នេះបើតាមការបញ្ជាក់ ពីលោកនាយឧត្តមសេនីយ សែម សុវណ្ណនី អគ្គនាយកមជ្ឈមណ្ឌលជាតិ គ្រប់គ្រង កងកម្លាំងរក្សាសន្តិសុខកម្ពុជា។ កាលពីពេលថ្មីៗនេះ ក៏មានទាហានមួកខៀវខ្មែរម្នាក់ ដែលបានបំពេញបេសកកម្មនៅប្រទេសម៉ាលី បានស្លាប់ដោយសារជំងឺគ្រុនចាញ់ ក្រោយពីបានដឹកមកដល់ប្រទេសកម្ពុជាផងដែរ ។
ចុះផ្សាយនៅថ្ងៃ៖
ស្តាប់ - ០១:៥៨
នៅមិនទាន់មានមូលហេតុច្បាស់លាស់ជុំវិញការស្លាប់របស់កងទាហានកម្ពុជាទាំងពីរនាក់នោះនៅឡើយទេ ប៉ុន្តែជាជំហានដំបូង គឺលោកអាចសន្និដ្ឋានបានថា កងទាហានទាំងពីរនាក់ បានស្លាប់ ដោយសារការទាស់ចំណីអាហារ និងបញ្ហាផ្លូវដង្ហើម។ នេះបើតាមការអះអាងរបស់លោកឧត្តមសេនីយ សែម សុវណ្ណនី អគ្គនាយកមជ្ឈមណ្ឌលជាតិ គ្រប់គ្រង កងកម្លាំងរក្សាសន្តិសុខកម្ពុជា ដែលបានប្រាប់វិទ្យុបារាំងអន្តរជាតិនៅថ្ងៃពុធនេះ។
លោក សែម សុវណ្ណនី បានបន្តថា នៅពេលនេះ សាកសពកងទាហានទាំង២ កំពុងត្រូវបានអាជ្ញាធរម៉ាលី និងអង្គការសហប្រជាជាតិ ធ្វើកោសល្យវិច័យ រកមូលហេតុច្បាស់លាស់នៃការស្លាប់ មុននឹងបញ្ជូនមកធ្វើបុណ្យតាមប្រពៃណី នៅក្នុងប្រទេសកម្ពុជា។
ដោយមិនបានបញ្ជាក់ឈ្មោះទាហាន ដែលបានស្លាប់នោះ លោក សែម សុវណ្ណនី គ្រាន់តែបានប្រាប់ថា យោធាខ្មែរទាំង២នាក់នោះ ម្នាក់ គឺជាវិស្វករ និងម្នាក់ទៀត មានមុខងារជាពេទ្យបឋម។ លោក សុវណ្ណនី បានអះអាងថា ការស្លាប់កងទាហានកម្ពុជានេះ គឺជាលើកដំបូងហើយ ចាប់តាំងពីរយៈពេល ៣ខែ ដែលកម្ពុជា បានបញ្ចូនកងទ័ពមួកខៀវចំនួនប្រមាណជា ៣០០នាក់ ទៅបំពេញបេសកកម្ម ក្នុងប្រទេសម៉ាលី។
ចាប់តាំងពីឆ្នាំ ២០០៦ មករហូតដល់នាពេលបច្ចុប្បន្ននេះ រដ្ឋាភិបាលកម្ពុជា បានបញ្ជូនកងទ័ពរក្សាសន្តិភាព ក្រោមឆ័ត្ររបស់អង្គការសហប្រជាជាតិ បានចំនួនជាង ២ពាន់នាក់ទៅកាន់ប្រទេសចំនួន ៧ ។ បន្ទាប់ពីមានការស្នើសុំ ពីអង្គការសហប្រជាជាតិ ឲ្យទាហានកម្ពុជា ចូលរួមរក្សាសន្តិភាពលើពិភពលោក កម្ពុជា ក៏បានធ្វើការបណ្តុះបណ្តាលជំនាញជាច្រើន ដូចជាការដោះមីន វិស្វកម្ម ពេទ្យ និងដឹកជញ្ជូន ដោយមានការជួយជ្រោមជ្រែង ពីប្រទេសជាមិត្ត ដូចជា ជប៉ុន ចិន អាម៉េរិក បារាំង អូស្ត្រាលី និងប្រទេសឥណ្ឌាជាដើម ។
ជាទូទៅ បេសសកម្មរបស់កងទ័ពកម្ពុជា ក្នុងតួនាទីជាទាហានមួកខៀវរបស់អង្គការសហប្រជាជាតិ ដើម្បីថែរក្សាសន្តិភាពនៅឯក្រៅប្រទេសតែងបានទទួលជោគជ័យនិងមិនដែលជួបគ្រោះថ្នាក់អ្វីទេ។ ប៉ុន្តែ ចុងក្រោយនេះទាហានកម្ពុជា បានស្លាប់ក្នុងឧបទ្ទវហេតុមួយចំនួន។ កាលពីពេលថ្មីៗនេះ ក៏មានទាហានមួកខៀវខ្មែរម្នាក់ ដែលបានបំពេញបេសកកម្ម ក្នុងប្រទេសម៉ាលី បានស្លាប់ ដោយសារជំងឺគ្រុនចាញ់ ក្រោយពេលមកដល់ប្រទេសកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ