សាកសពពលករខ្មែរ៦នាក់បានមកដល់កម្ពុជាវិញ ខណៈចំនួនពលករខ្មែរដែលត្រូវបញ្ជូនមកវិញ កើនឡើងដល់១៤ម៉ឺននាក់
សាកសពពលករខ្មែរ៦នាក់ ដែលស្លាប់ដោយសារគ្រោះថ្នាក់ចរាចរណ៍ នៅខេត្តឆៈឆឹងសៅ ប្រទេសថៃ ត្រូវបានបញ្ជូនមកដល់ប្រទេសកម្ពុជាវិញហើយ កាលពីយប់ម៉ិញនេះ។ ដំណើរមកដល់នៃសាកសពពលករខ្មែរនេះ កើតឡើងស្របពេលដែលអាជ្ញាធរថៃ នៅតែបន្តបញ្ជូនពលករខ្មែរមកប្រទេសវិញ ហើយចំនួនពលករខ្មែរដែលត្រូវបានបញ្ជូនមកវិញ រហូតមកទល់រសៀលថ្ងៃចន្ទនេះ កើនឡើងដល់១៤ម៉ឺននាក់ហើយ។
ចុះផ្សាយនៅថ្ងៃ៖
ស្តាប់ - ០១:៥២
ពលករទាំង៦នាក់ដែលស្លាប់ ដោយសារគ្រោះថ្នាក់ចរាចរណ៍ រថយន្តបែកកង់ជ្រុលចង្កូតទៅបុកដើមឈើ នៅខេត្តឆៈឆឹងសៅ ប្រទេសថៃ កាលពីយប់ថ្ងៃសៅរ៍ឆ្លងចូលថ្ងៃអាទិត្យទី១៥មិថុនា ត្រូវគេស្គាល់អត្តសញ្ញាណទាំងអស់ហើយ។ ក្នុងនោះ មានម្នាក់មានទីលំនៅនៅខេត្តព្រៃវែង ម្នាក់មានទីលំនៅនៅខេត្តបន្ទាយមានជ័យ និង៤នាក់ទៀតមានទីលំនៅនៅខេត្តកំពង់ចាម។ នេះបើតាមការឲ្យដឹងពីលោកគោ ស៊ុំសារឿត អភិបាលខេត្តបន្ទាយមានជ័យ។
ក្រោយពីបានបញ្ជូនមកដល់កម្ពុជាវិញ នៅយប់ថ្ងៃអាទិត្យ ទី១៥មិថុនា សាកសពទាំង៦ ត្រូវបានបញ្ជូនបន្តទៅកាន់ស្រុកកំណើតរបស់ពួកគេរៀងៗខ្លួនរួចរាល់ហើយ។
ដោយឡែក សាកសពពលករពីរនាក់ទៀត ដែលស្លាប់នៅក្នុងគ្រោះថ្នាក់ចរាចរណ៍ នៅក្បែរក្រុងបាងកក ប្រទេសថៃ ត្រូវបានលោកគោ ស៊ុំសារឿត គូសបញ្ជាក់ថា នឹងត្រូវមកដល់កម្ពុជា យ៉ាងយូរនៅល្ងាច ឬយប់ថ្ងៃចន្ទ ទី១៦មិថុនានេះ។ ពលករទាំងពីរនាក់នេះ ត្រូវគេបញ្ជាក់អត្តសញ្ញាណថា មានទីលំនៅនៅស្រុកភ្នំស្រុក ខេត្តបន្ទាយមានជ័យ។
ដំណើរមកដល់នៃសាកសពពលករខ្មែរ កើតឡើងស្របពេលដែលអាជ្ញាធរថៃ នៅតែបន្តបញ្ជូនពលករខ្មែរមកប្រទេសវិញ។ បើតាមលោកអភិបាលខេត្តបន្ទាយមានជ័យ រហូតមកទល់រសៀលថ្ងៃចន្ទនេះ ចំនួនពលករខ្មែរដែលត្រូវបានបញ្ជូនមកវិញ កើនឡើងដល់១៤ម៉ឺននាក់ហើយ។
អាជ្ញាធរខេត្តបានប្រើប្រាស់កំលាំងមន្ដ្រីប៉ូលិស មន្ដ្រីយោធា មន្ដ្រីស៊ីវិល និងកងរាជអាវុធហត្ថ មិនតិចជាងមួយពាន់នាក់ទេ ដើម្បីសម្របសម្រួលសន្តិសុខ សណ្ដាប់ធ្នាប់ដល់ពលករ។ កាកបាទក្រហម និងអង្គការសង្គមស៊ីវិលជាច្រើន បាននិងកំពុងតែធ្វើការយ៉ាងមមាញឹក ផ្ដល់ជំនួយមនុស្សធម៌ដែលចាំបាច់ សម្រាប់ពលករដែលទើបតែត្រឡប់មកដល់មាតុប្រទេសវិញ។ រថយន្តយោធាជាង៣០០គ្រឿង ធ្វើដំណើរចុះឡើង ដើម្បីបញ្ជូនពលករពីប៉ោយប៉ែត ទៅកាន់ស្រុកកំណើតរបស់ពួកគាត់វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ