ក្រសួងសុខាភិបាល បើកសិក្ខាសាលាផ្សព្វផ្សាយស្ដីពីជំងឺផ្លូវដង្ហើមមជ្ឈឹមបូព៌ា និងជំងឺផ្ដាសាយបក្សីប្រភេទថ្មី
ជំងឺថ្មីពីរ គឺជំងឺផ្ដាសាយបក្សី H7N9 និងជំងឺផ្លូវដង្ហើមមជ្ឈឹមបូព៌ា កំពុងតែរីករាលដាលយ៉ាងឆាប់រហ័ស នៅប្រទេសចិន និងនៅមជ្ឈឹមបូព៌ា។ ដោយក្ដីបារម្ភ ក្រសួងសុខាភិបាលកម្ពុជា ដោយមានការឧបត្ថម្ភពីអង្គការសុខភាពពិភពលោក បានរៀបចំសិក្ខាសាលាមួយ នៅព្រឹកថ្ងៃចន្ទនេះ ដើម្បីផ្សព្វផ្សាយពីជំងឺទាំងពីរនេះ ជូនដល់ប្រព័ន្ធផ្សព្វផ្សាយ។ អ្នកកាសែតពីស្ថាប័នសារព័ត៌មានជាតិ និងអន្ដរជាតិជាច្រើន បានចូលរួមស្ដាប់បទបង្ហាញនៅក្នុងសិក្ខាសាលានេះ ដែលរៀបចំនៅមន្ទីរពេទ្យកុមារជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅក្នុងសិក្ខាសាលាផ្សព្វផ្សាយ នៅព្រឹកថ្ងៃចន្ទទី២៣មិថុនា លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង បានគូសបញ្ជាក់ប្រាប់អ្នកកាសែតជាង៣០នាក់ ពីភាពខុសគ្នារបស់ជំងឺផ្ដាសាយបក្សីប្រភេទចាស់ H5N1 និងជំងឺផ្ដាសាយបក្សីប្រភេទថ្មី H7N9 ដូច្នេះថា៖ ជំងឺផ្ដាសាយបក្សីប្រភេទចាស់ H5N1 ច្រើនកើតលើមនុស្សស្រី ពិសេសគឺក្មេង។ ចំណែកជំងឺផ្ដាសាយបក្សីប្រភេទថ្មី H7N9 ច្រើនកើតលើមនុស្សប្រុស ដែលមានវ័យចំណាស់។
អ្វីដែលគួរឲ្យបារម្ភសម្រាប់ជំងឺផ្ដាសាយប្រភេទថ្មី H7N9 គឺ ការឆ្លង។ ខុសពីជំងឺផ្ដាសាយបក្សីប្រភេទចាស់ H5N1 ដែលឆ្លងពីការប៉ះពាល់បក្សីដែលឈឺឬងាប់ ជំងឺផ្ដាសាយបក្សីប្រភេទថ្មី H7N9 នេះ ឆ្លងពីការប៉ះពាល់បក្សីដែលមានផ្ទុកមេរោគ តែគ្មានសញ្ញាថាឈឺឡើយ។
ដោយឡែក ជំងឺផ្លូវដង្ហើមមជ្ឈឹមបូព៌ាកូរ៉ូណាវីរុស ហៅកាត់ថា MERS ក៏កំពុងតែរីករាលដាលគួរឲ្យបារម្ភដែរ។ ជំងឺ MERS នេះ មានលក្ខណៈស្រដៀងនឹងជំងឺ SARS និងមានប្រភពមកពីតំបន់មជ្ឈឹមបូព៌ា នៅឆ្នាំ២០១២ ហើយគួរឲ្យកត់សម្គាល់នាពេលថ្មីៗនេះ វាបានឆ្លងរាលដាលទៅកាន់ផ្នែកផ្សេងៗទៀតនៃពិភពលោក។ កូរ៉ូណាវីរុស ត្រូវបានគេរកឃើញថា មាននៅលើសត្វប្រចៀវ និងសត្វអូដ្ឋ។
ជំងឺផ្ដាសាយបក្សីប្រភេទថ្មី H7N9 និងជំងឺផ្លូវដង្ហើមមជ្ឈឹមបូព៌ា MERS មានរោគសញ្ញាដូចជា គ្រុនក្ដៅ ក្អក ពិបាកដកដង្ហើម រងារញាក់ ឈឺបំពង់ក ជាដើម។ ដោយសារតែជំងឺថ្មីទាំងពីរ មានរោគសញ្ញាស្រដៀងទៅនឹងជំងឺផ្ដាសាយធម្មតា លោកវេជ្ជបណ្ឌិត លី សូវ៉ាន់ បានសំណូមពរឲ្យប្រជាពលរដ្ឋទាំងអស់ ប្រុងប្រយ័ត្ន និងប្រញាប់ទៅមន្ទីរពេទ្យជាបន្ទាន់ ប្រសិនបើមានរោគសញ្ញាអស់ទាំងនេះ។
ដើម្បីបង្កាជំងឺនេះ លោកវេជ្ជបណ្ឌិតលី សូវ៉ាន់ ផ្ដល់ជាអនុសាសន៍ថា សាធារណជនទូទៅ ត្រូវសម្អាតដៃឲ្យបានញឹកញាប់ ត្រូវខ្ទប់មាត់របស់អ្នក ឬពាក់ម៉ាស នៅពេលក្អកឬកណ្ដាស់។ ផលិតផលសាច់និងស៊ុត ត្រូវចម្អិនឲ្យឆ្អិនល្អ និងមិនត្រូវបរិភោគសត្វឈឺឬងាប់ដោយសារជំងឺ។ ចំណែកអ្នកដែលធ្វើដំណើរទៅតំបន់មជ្ឈឹមបូព៌ា ត្រូវប្រកាន់ស្មារតីប្រុងប្រយ័ត្នខ្ពស់ ពិសេសជៀសវាងប៉ះពាល់ជាមួយសត្វឈឺ ឬ សត្វអូដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ