គណបក្សទាំងពីរបើកទ្វារចំហររៀងខ្លួន តែមិនបោះដៃរកគ្នា
រហូតមកដល់ពេលនេះ គណបក្សប្រជាជនកម្ពុជា និងគណបក្សសង្គ្រោះជាតិ នៅមិនទាន់មានការចរចាណាមួយថ្មីនៅឡើយនោះទេ ទាក់ទងពីវិបត្តិនយោបាយនៅកម្ពុជា ដែលបានអូសបន្លាយជិតមួយឆ្នាំកន្លងមកហើយ។ យ៉ាងណាក៏ដោយ គណបក្សមានជម្លោះទាំងពីរ បានអះអាងថា ទ្វារនៃការចរចា គឺកំពុងតែបើកចំហររៀងៗខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
មិនទាន់មានការជួបចរចាផ្លូវការ និងក្រៅផ្លូវការ រវាងគណបក្សទាំងពីរសារជាថ្មីទេ ក្រោយជំនួបកាលពីពាក់កណ្តាលខែមិថុនា ដែលមិនទទួលបានលទ្ធផលធំដុំនោះ ។ នេះបើតាមការបញ្ជាក់ពីតំណាងចរចាថ្នាក់បច្ចេកទេស របស់គណបក្សទាំងពីរ នៅព្រឹកថ្ងៃពុធនេះ។ លោក ព្រុំ សុខា តំណាងក្រុមគណបក្សប្រជាជនកម្ពុជា បានលើកឡើងថា ទ្វារចរចារបស់គណបក្សកាន់អំណាចនៅតែបន្តបើកជាដរាប។ ប៉ុន្តែលោកសង្កត់ធ្ងន់ថា ដៃគូចរចារបស់ខ្លួន គឺគណបក្សសង្គ្រោះជាតិតែងតែបង្កើតលក្ខខ័ណ្ឌទាមទារជាបន្តបន្ទាប់។ ដែលនេះលោក ព្រុំសុខា រដ្ឋលេខាធិការ ក្រសួងមហាផ្ទៃ បានហៅថា ជាការទាមទារ ដើម្បីរារាំង ដល់ដំណើរការបិទបញ្ចប់វិបត្តិនយោបាយ រយៈពេលជិតមួយឆ្នាំនៅកម្ពុជា។
ជាការឆ្លើយតប លោកគួយប៊ុនរឿន តំណាងក្រុមចរចាគណបក្សសង្គ្រោះជាតិ បានអះអាងថា ការទាមទារ ដែលជាជំហររួមរបស់គណបក្សប្រឆាំងនោះ គឺឈរលើស្មារតីចរចា រវាងគណបក្សទាំងពីរ។ តំណាងរាស្ត្រជាប់ឆ្នោតមណ្ឌលកំពង់ស្ពឺរូបនេះ បានគូសបញ្ជាក់ត្រឡប់ទៅវិញថា ការទាមទាររបស់គណបក្សសង្គ្រោះជាតិ គឺក្នុងស្មារតីផលប្រយោជន៍ជាតិ និងការពារបញ្ហាកើតឡើង នៅអាណត្តិក្រោយៗទៀតនាពេលអណាគត។ លោក គួយ ប៊ុនរឿន លើកឡើងថា “ត្រូវតែជជែកគ្នាឱ្យលំអិតព្រោះថា ថ្ងៃអនាគតមិនដឹងថា ពលរដ្ឋគាំទ្រគណបក្សណាមួយនោះទេ។
សូមបញ្ជាក់ជូនថា នាពេលចុងក្រោយនេះ គណបក្សសង្គ្រោះជាតិតាមរយៈលោក កឹមសុខាប្រធានស្តីទីគណបក្ស បានដាក់ការទាមទារ ចំនួនបីចំណុច ដើម្បីជាថ្នូរចូលសភា ប៉ុន្តែមិនមានការទាមទារឱ្យបោះឆ្នោតឡើងវិញនោះទេ។ ចំណុចទាំងបីនោះ គឺតុល្យភាពក្នុងសភា ប្រព័ន្ធផ្សព្វផ្សាយ និងកំណែទម្រង់គណៈកម្មាធិកាជាតិរៀបចំការបោះឆ្នោត ដែលជ្រើសរើសក្បាលម៉ាស៊ីន ដោយប្រើសំឡេង ២ភាគ៣។ ដែលចំណុចនេះ គឺកំពុងជាគន្លឹះគាំងនៃដំណើរចរចារវាងគណបក្សទាំងពីរ។
សូមរំលឹកសារជាថ្មីថា តំណាងក្រុមចរចានៃគណបក្សទាំងពីរ បានជួបចរចាគ្នាចុងក្រោយ កាលពីថ្ងៃទី១២ មិថុនា ដើម្បីនិយាយពីកិច្ចព្រមព្រៀង នៃការដាក់បញ្ចូលគណៈកម្មាធិការជាតិរៀបចំការបោះឆ្នោត ចូលទៅជាជំពូកទី១៥នៃរដ្ឋធម្មនុញ្ញ។ ប៉ុន្តែភាគីទាំងពីរ បានខ្វែងគំនិតគ្នាខ្លាំង។
យ៉ាងណាក៏ដោយ លោក ព្រំ សុខា បានស្នើឱ្យគណបក្សសង្គ្រោះជាតិ កុំដាក់លក្ខខ័ណ្ឌដែលនាំឱ្យរាំងស្ទះ ដល់ដំណើរការនៃការចរចារ ដើម្បីបិទបញ្ចប់ជម្លោះ។ ប៉ុន្តែលោក គួយប៊ុនរឿន វិញ បានបញ្ជាក់ថា ការទាមទារ គឺមិនមែនប្រយោជន៍គណបក្សនោះទេ ពោលគឺដើម្បីប្រយោជន៍ពលរដ្ឋខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ