ប្រជាសហគមន៍ នៅតែបារម្ភអំពីផលប៉ះពាល់ ពីទំនប់វារីអគ្គិសនីសេសានក្រោម២
ប្រជាសហគមន៍ រស់ជុំវិញតំបន់សាងសង់ទំនប់វារីអគ្គិសនីសេសានក្រោម២ ក្នុងខេត្តស្ទឹងត្រែង បានសម្តែងក្តីកង្វល់ របស់ខ្លួន ជុំវិញផលប៉ះពាល់ពីគម្រោងមួយនេះ។ ប្រជាពលរដ្ឋភាគច្រើន បានសម្តែងការមិនពេញចិត្ត ចំពោះគោលនយោបាយសំណងរបស់រដ្ឋាភិបាល។ ក្តីព្រួយបារម្ភនេះត្រូវបាន ធ្វើឡើងតាមរយៈសន្និសីទសារព័ត៌មាន នៅព្រឹកមិញនេះ នៅឯទីស្នាក់ការអង្គការ NGO Forum ។ សង្គមស៊ីវិលជំរុញឲ្យមានដំណោះស្រាយសមស្រប ចំពោះពលរដ្ឋរងគ្រោះទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ប្រជាពលរដ្ឋមកពីភូមិចំនួន៤ ក្នុងខេត្តស្ទឹងត្រែង នៅព្រឹកថ្ងៃអង្គារនេះ បានថ្លែងក្នុងសន្និសីទកាសែតថា ពួកគាត់មិនពេញចិត្តនឹងសំណងរបស់ក្រុមហ៊ុននោះឡើយ។ លោក ស្រី លីបិ ប្រជាពលរដ្ឋមកពីភូមិស្រែពក បានលើកឡើងថា ការផ្លាស់ប្តូរទីលំនៅអាចធ្វើឲ្យលោកជួបប្រទះបញ្ហាជាច្រើន។ បញ្ហាទាំងនោះរួមមាន ស្ថានភាពដីធ្វើកសិកម្មមិនអំណោយផល ពីព្រោះដីថ្មីដែលរដ្ឋផ្តល់ឲ្យមានទំហំតូច និងមិនសូវមានជីជាតិសម្រាប់ការបង្កបង្កើនផល។
លោកបានបន្ថែមថា ប្រជាពលរដ្ឋភាគច្រើននៅជុំវិញតំបន់សេសានក្រោម២ រស់នៅដោយអាស្រ័យទៅលើការចិញ្ចឹមសត្វ ដំណាំដាំដុះ និងអនុផលព្រៃឈើ ដូចជាការរកជ័រ វល្លិ៍ និងផ្តៅជាដើម។ ប៉ុន្តែ ការបិទអាងទឹកទាំងមូល គឺជាហេតុធ្វើប្រជាពលរដ្ឋជួបឧបសគ្គក្នុងការប្រកបរបររកស៊ីប្រចាំថ្ងៃ។ ពលរដ្ឋដែលរងផលប៉ះពាល់ដោយសារទំនប់វារីអគ្គិសនីសេសានក្រោម២ មាន១២គ្រួសារ នៅក្នុងភូមិភ្លុក ស្រុកភ្លុក ក្នុងខេត្តស្ទឹងត្រែង។ ពួកគេត្រូវបានជម្លៀសទៅកាន់ទីតាំងថ្មីនៅតាមបណ្តោយផ្លូវជាតិលេខ៧៨ថ្មី ក្បែរភូមិជ្រប។
លោក ម៉ៅ ប៉ម មន្ត្រីធនធានទឹកនៃសមាគមថែរក្សាបរិស្ថាន និងវប្បធម៌ បាននិយាយថា សំណងដែលផ្តល់ឲ្យប្រជាពលរដ្ឋធ្វើឡើងក្នុងរយៈពេលដ៏ខ្លី ខណៈពេលដែលពួកគេមិនទាន់យល់ច្បាស់អំពីគោលនយោបាយនៃសំណងដែលសមស្របទៅនឹងតម្លៃទីផ្សារនៅឡើយ។
សូមបញ្ជាក់ថា ទំនប់វារីអគ្គិសនីសេសានក្រោម២ គឺជាគម្រោងអភិវឌ្ឍន៍ធំជាងគេដំបូងនៅកម្ពុជា ដែលអាចផលិតថាមពលអគ្គិសនីបានចំនួន ៤០០ មេហ្គាវ៉ាត់។ បច្ចុប្បន្ន ទំនប់នេះកំពុងស្ថិតក្នុងការសាងសង់។ លោក តឹក សុវណ្ណារ៉ា នាយកប្រតិបត្តិនៃវេទិកានៃអង្គការមិនមែនរដ្ឋាភិបាលស្តីពីកម្ពុជាបានអះអាងថា ការសាងសង់ទំបន់វារីអគ្គិសនីនេះ ធ្វើឲ្យប៉ះពាល់យ៉ាងធ្ងន់ធ្ងរដល់ធនធានធម្មជាតិ អនុផលព្រៃឈើ បាត់បង់ត្រី ប៉ះពាល់ដល់គុណភាពទឹក រមណីដ្ឋាន និងសុខភាពជាដើម។
លោកស្នើឲ្យមានការផ្សព្វផ្សាយពីគម្រោងទំនប់វារីអគ្គិសនីនេះឲ្យបានទូលំទូលាយ បើកឲ្យមានឱកាសពិគ្រោះយោបល់គ្នា អំពីសំណងរវាងប្រជាពលរដ្ឋនិងក្រុមហ៊ុន និងជំរុញឲ្យរដ្ឋាភិបាលផ្តល់ជម្រើសមុខរបរថ្មីឲ្យប្រជាពលរដ្ឋ ដែលអាចទទួលយកបាន។ ថ្លែងក្នុងរដ្ឋសភា កាលពីសប្តាហ៍កន្លងទៅ លោកស៊ុយ សែម រដ្ឋមន្ត្រីក្រសួងរ៉ែ និងថាមពល ទទួលស្គាល់ថាពិតជាមានផលប៉ះពាល់មែន ប៉ុន្តែ ផលប៉ះពាល់មានតិចជាងផលប្រយោជន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ