ថ្ងៃនេះហ្សង់-ហ្វ្រង់ស័រ តាន់ សូមបន្តពិនិត្យមើលទៅលើស្ថានភាពភូមិសាស្រ្តនយោបាយរបស់ប្រទេសឥណ្ឌាតទៅទៀត ដោយសូមនិយាយបកស្រាយពីទំនាក់ទំនងរវាងឥណ្ឌានិងជប៉ុន។
តាំងពីបានចងទំនាក់ទំនងទូតនឹងគ្នានៅឆ្នាំ១៩៥២មក ឥណ្ឌានិងជប៉ុនរក្សាបានល្អណាស់មិត្តភាពរវាងគ្នា។ ប៉ុន្តែទន្ទឹមនេះ ការផ្តោះប្តូរពាណិជ្ជកម្មរវាងប្រទេសអាស៊ីទាំងពីរ បែរជាមិនមានសន្ទុះខ្លាំងក្លាទៅវិញ បើប្រៀបធៀបទៅនឹងការផ្តោះប្តូររវាងចិននិងជប៉ុន។ ដូចនេះ គេអាចនិយាយបានថាខុសផ្ទុយពីចិននិងជប៉ុនដែលមានទំនាក់ទំនងល្អនៅលើវិស័យសេដ្ឋកិច្ចតែល្អក់កករខ្លាំងនៅលើវិស័យនយោបាយ ឥណ្ឌានិងជប៉ុនត្រូវរ៉ូវគ្នាខ្លាំងនៅលើវិស័យនយោបាយ តែនៅមានតិចតួចស្តួចស្តើងណាស់ការផ្តោះប្តូរពាណិជ្ជកម្មរវាងគ្នា។
ទំនាក់ទំនងកក់ក្តៅល្អរវាងឥណ្ឌានិងជប៉ុនមិនមែនជាការមួយចៃដន្យឡើយ។ ប្រទេសអាស៊ីទាំងពីរមានប្រយោជន៍រួមគ្នា ទាំងនៅលើឆាកអន្តរជាតិ ទាំងទៅនៅលើឆាក
តំបន់។
នៅលើឆាកអន្តរជាតិ ឥណ្ឌានិងជប៉ុនទាមទារដូចគ្នាឱ្យកែទម្រង់អង្គការសហប្រជា
ជាតិ។ ប្រទេសអាស៊ីទាំងពីរចង់ក្លាយជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ ចង់ឱ្យអង្គការសហប្រជាជាតិទទួលស្គាល់ពួកគេថាជាមហាអំណាច ស្មើគ្នានឹងអាមេរិក ចិន រុស្ស៊ី បារាំងនិងអង់គ្លេស។ តែចិនមិនព្រម ពីព្រោះចិនដែលមានសិទ្ធវេតូ(Véto) ចង់រក្សាតួនាទីរបស់ខ្លួនជាមហាអំណាចអាស៊ីតែឯកឯង។
នៅលើឆាកតំបន់អាស៊ីវិញ ឥណ្ឌាក៏ដូចជប៉ុនដែរ ជាគូប្រជែងរបស់ចិន។ អ៊ីចឹងហើយបានជាជប៉ុនបានខិតខំអូសទាញឥណ្ឌារហូតដល់បានសម្រេច ឱ្យចូលមកក្នុងវេទិកានៃសមាគមប្រជាជាតិអាស៊ីអាគ្នេយ៍ហៅកាត់ថាអាស៊ាន និងចូលមកក្នុងជំនួបកំពូលអាស៊ីបូព៌ាតាំងពីឆ្នាំ២០០៥មកម្ល៉េះ។ គោលដៅ គឺខ្ទប់កុំឱ្យចិនមានទម្ងន់និងឥទ្ធិពលខ្លាំងពេកនៅក្នុងអង្គប្រជុំទាំងនេះ។
ដោយឡែក នៅក្នុងក្របខ័ណ្ឌនៃទំនាក់ទំនងទ្វេភាគីវិញ ឥណ្ឌានិងជប៉ុនខ្វល់ខ្វាយដូចគ្នាអំពីសន្តិសុខនៅអាស៊ី។ ទីក្រុងញូវដែលីនិងទីក្រុងតូក្យូបារម្ភ បារម្ភខ្លាចកូរ៉េខាងជើងដែលជាសម្ពន្ធមិត្តរបស់ចិនមានអាវុធនុយក្លេអ៊ែរនៅទីបំផុត។
ទន្ទឹមនេះ ជប៉ុនត្រូវការឥណ្ឌា ដ្បិតនាវាដឹកប្រេងកាតរបស់ជប៉ុនធ្វើដំណើរឆ្លងកាត់មហាសមុទ្រឥណ្ឌា នៅត្រង់ឈូងសមុទ្របាំងហ្កាល់(Bengale) មុននឹងត្រូវឆ្លងកាត់ដៃ
សមុទ្រម៉ាឡាក្កា(Malacca)។ ម្ល៉ោះហើយ ទីក្រុងតូក្យូត្រូវការវត្តមាននៃនាវាចម្បាំងឥណ្ឌានៅទីនោះ ដើម្បីបង្ការសកម្មភាពពួកចោរសមុទ្រ និងបញ្ចៀសការគំរាមកំហែង
ជាយថាហេតុដទៃផ្សេងទៀត។ ជាក់ស្តែង នៅឆ្នាំ១៩៩៩ កងទ័ពជើងទឹកឥណ្ឌាបានជួយស្រោចស្រង់នាវាជប៉ុនមួយគ្រឿងដែលត្រូវបានវាយប្រហារដោយពួកចោរសមុទ្រ នៅម្តុំដៃសមុទ្រម៉ាឡាក្កា។
នៅក្នុងក្របខណ្ឌនៃការរក្សាសុវត្ថិភាពផ្លូវទឹកដូចគ្នាអ៊ីចឹងដែរ កងទ័ពនៃប្រទេសអាស៊ីទាំងពីរថែមទាំងបានធ្វើសមយុទ្ធរួមគ្នាយ៉ាងទៀងទាត់ ចាប់ពីឆ្នាំ២០០៧មក។
ឥណ្ឌាវិញ ជាពិសេសនៅចន្លោះឆ្នាំ២០០៥និង២០០៨ ត្រូវការជប៉ុនខ្លាំង។ កាលណោះ ឥណ្ឌាដែលកំពុងចរចាជាមួយអាមេរិកដើម្បីសម្រេចកិច្ចព្រមព្រៀងស្តីពីសហប្រតិបត្តិការនុយក្លេអ៊ែរស៊ីវិល បានពឹងពាក់ជប៉ុនដែលជាមិត្តរបស់អាមេរិកឱ្យជួយធ្វើ
អន្តរាគមន៍។ នៅទីបំផុត កិច្ចព្រមព្រៀងត្រូវបានចុះហត្ថលេខានៅឆ្នាំ២០០៨ និងបានបើកលទ្ធភាពឱ្យឥណ្ឌាប្រើប្រាស់បច្ចេកវិជ្ជានិងបរិក្ខារនុយក្លេអ៊ែររបស់អាមេរិក សម្រាប់វិស័យនុយក្លេអ៊ែរស៊ីវិល។
*
ក្រៅពីមានប្រយោជន៍រួមគ្នានៅលើឆាកអន្តរជាតិនិងនៅលើឆាកតំបន់ ឥណ្ឌានិងជប៉ុនក៏មានមហិច្ឆតាដូចគ្នាដែរ នោះគឺចង់ក្លាយជាមហាអំណាចតំបន់។ ឥណ្ឌាចង់ក្លាយជាមហាអំណាចតំបន់ ដ្បិតអាងថាខ្លួនមានសក្តានុពលសេដ្ឋកិច្ចក្លៀវក្លា មធ្យោបាយយោធាខ្លាំងក្លា និងជាប្រទេសប្រជាធិបតេយ្យធំជាងគេនៅក្នុងលោក។ ជប៉ុនវិញដែលជាមហាអំណាចសេដ្ឋកិច្ចទីបីនៅក្នុងលោក ចង់បង្កើនតួនាទីនយោបាយនិងទូតរបស់ខ្លួននៅក្នុងតំបន់និងនៅលើឆាកអន្តរជាតិ។
មិនតែប៉ុណ្ណោះ ឥណ្ឌានិងជប៉ុនមានដូចគ្នាសត្រូវសក្តានុពលរួមមួយ នោះគឺចិន។
ដូចបានលើកឡើងរួចហើយថា ឥណ្ឌាមិនទុកចិត្តចិនទេ ដ្បិតថ្នាក់ដឹកនាំចិនរមែងតែ
សម្តែងឱ្យឃើញនូវមហិច្ឆតារបស់ខ្លួនមកលើអាស៊ីខាងត្បូង។ ថ្នាក់ដឹកនាំនៅទីក្រុង
ញូវដែលីមិនទុកចិត្តចិនទេ ដ្បិតចិនធ្លាប់បានធ្វើសង្គ្រាមឈ្លានពានមកលើប្រទេសឥណ្ឌានៅឆ្នាំ១៩៦២ និងធ្លាប់ជាសម្ពន្ធមិត្តរបស់ប៉ាគីស្ថាន។
ជប៉ុនវិញ ក៏មិនទុកចិត្តចិនដែរ។ ពីព្រោះចិនជារបបកុម្មុយនិស្តផ្តាច់ការ ពីព្រោះចិនជាសម្ពន្ធមិត្តរបស់កូរ៉េខាងជើង និងពីព្រោះចិនទាមទារចង់បានទីប្រជុំកោះសេនកាគុ(Senkaku) មកវិញ។ Senkaku ដែលជាភាសាចិនមានឈ្មោះថា Diaoyu បានធ្លាក់ទៅនៅក្រោមការកាន់កាប់របស់ជប៉ុនតាំងពីឆ្នាំ១៨៩៥មកម្ល៉េះ។
ម្ល៉ោះហើយ ក្នុងនាមជាគូប្រជែងដូចគ្នារបស់ចិន ឥណ្ឌានិងជប៉ុនយល់ឃើញដូចគ្នាថា បើមិនរួបរួមគ្នាទេ ពួកគេនឹងច្បាស់ជាត្រូវចិនកុម្មុយនិស្តគាបសង្កត់ ឬគំរាមកំហែងផងក៏មិនដឹង។
នៅក្នុងន័យនេះ ជប៉ុនទេតើដែលបានបោះដៃទៅរកឥណ្ឌាមុន។ គឺលោកShinzo ABE បច្ចុប្បន្ននាយករដ្ឋមន្ត្រីជប៉ុនតែម្តង ដែលតាមរយៈសៀវភៅមួយក្បាលរបស់លោកចេញផ្សាយក្នុងឆ្នាំ២០០៥ បានអំពាវនាវមុនគេឱ្យឥណ្ឌានិងជប៉ុនខិតចូលជិតគ្នា។
ចំពោះលោកShinzo ABE ឥណ្ឌានិងជប៉ុន ក្នុងនាមជាប្រទេសប្រជាធិបតេយ្យគំរូនៅអាស៊ី ត្រូវតែរួបរួមគ្នាដើរតួនាទីជាសារវន្ត ដើម្បីរៀបចំឱ្យមានសណ្តាប់ធ្នាប់ថ្មីមួយនៅអាស៊ី ដែលយកសន្តិសុខ ច្បាប់ និងការគោរពសិទ្ធិមនុស្សជាធំ។
ហេតុដូច្នេះហើយ បានជានៅក្នុងឆ្នាំ២០០៧ ឥណ្ឌានិងជប៉ុនបានចុះហត្ថលេខាលើកតិកាសញ្ញាយុទ្ធសាស្រ្តមួយ។ គឺជាកិច្ចព្រមព្រៀងមួយយ៉ាងសំខាន់ស្តីពីសហប្រតិបត្តិការនៅលើវិស័យការពារសន្តិសុខរវាងទីក្រុងញូវដែលីនិងទីក្រុងតូក្យូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ