អង្គការភ្លែន៖ មានបង្គន់អនាម័យ និងទឹកស្អាតគ្រប់គ្រាន់ ទើបអាចលើកកម្ពស់អនាម័យជនបទ
ដើម្បីចូលរួម នៅក្នុងទិវាជាតិលើកកម្ពស់អនាម័យជនបទលើកទី៥ឆ្នាំ ២០១៤ ដែលនឹងធ្វើនៅថ្ងៃទី ១៣វិច្ឆិកាស្អែក, នៅថ្ងៃទី ១២វិច្ឆិកានេះ អង្គការភ្លែន រួមជាមួយក្រសួងអភិវឌ្ឍជនបទ និងដៃគូពាក់ព័ន្ធ បានរៀបចំសន្និសីទកាសែតមួយ លើកឡើងថា បញ្ហាបង្គន់អនាម័យ និងទឹកស្អាត គឺជាកត្តាចម្បង ដែលអាចលើកកម្ពស់អនាម័យជនបទ។ សន្និសីទ ដែលបានធ្វើឡើង នៅសណ្ឋាគារភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៩
ប្រធានបទ ដើម្បីចូលរួម នៅក្នុងទិវាជាតិលើកកម្ពស់អនាម័យជនបទលើកទី៥ ឆ្នាំ ២០១៤នេះ គឺ«វិនិយោគលើអនាម័យ ដើម្បីកូនចៅជំនាន់ក្រោយយើង»។ ជាប្រធានបទ ដែលសំដៅលើការប្រើប្រាស់បង្គន់អនាម័យ និងទឹកស្អាត ដើម្បីអាចធ្វើឲ្យកូនចៅជំនាន់ក្រោយ និងប្រជាជនទូទៅ នៅទីជនបទ មានសុខភាពល្អ និងគ្មានជំងឺព្យាបាទ។
តាមលោក គី សុផល អនុប្រធាននាយកដ្ឋានថែទាំសុខភាពជនបទ ដែលបានធ្វើបទបង្ហាញ នៅក្នុងសន្និសីទកាសែត នាព្រឹកថ្ងៃពុធនេះ បានបង្ហាញថា កម្ពុជាជាប្រទេស ដែលអត្រាអនាម័យជនបទ មានកម្រិតទាបជាងគេ នៅក្នុងតំបន់អាស៊ីអាគ្នេយ៍។ មានប្រជាណ ៨លាននាក់ បានបន្ទោរបង់ពាសវាលពាសកាល ហើយមានលាមកចំនួនជាង ៣០០លានតោន ក្នុងមួយថ្ងៃៗ ត្រូវបានទុកចោលក្នុងទីវាល។ យោងតាមធនាគារពិភពលោក ដោយសារបញ្ហាកង្វះអនាម័យនេះ បានធ្វើឲ្យកម្ពុជា ខាតបង់ប្រាក់ប្រមាណ ៤៤៨លានដុល្លារ ក្នុងមួយឆ្នាំ។
តាមការបទបង្ហាញរបស់លោក គី សុផល ដដែល ផលប៉ះពាល់នៃកង្វះអនាម័យ និងទឹកស្អាត នៅកម្ពុជា បានបណ្តាលឲ្យកុមារក្រិន និងប៉ះពាល់ ដល់ការវិវឌ្ឍខួរក្បាល របស់កុមារតូចៗ មាន ៤០ភាគរយ។ កុមារអាយុក្រោម ៥ឆ្នាំ ចំនួន ២៣០០នាក់ បានស្លាប់ដោយសារជំងឺរាក ហើយ ៩១០០នាក់ បានស្លាប់ដោយសារជំងឺរលាកសួត។ ប្រជាជនកម្ពុជា ចំនួន ៩លាន៧សែននាក់ មានជំងឺរាក និងរលាកផ្លូវដង្ហើម ក្នុងមួយឆ្នាំៗ ដោយសារតែកង្វះអនាម័យ។
ក្នុងនោះផងដែរ នាយករដ្ឋមន្ត្រីកម្ពុជា លោកហ៊ុន សែន ក៏បានចេញសារលិខិត អបអរនៅក្នុងឱកាសទិវាជាតិលើកកម្ពស់អនាម័យជនបទលើកទី៥នេះដែរ ដោយបេ្តជ្ញាថា នៅឆ្នាំ២០២៥ រដ្ឋាភិបាល នឹងផ្តល់ឲ្យប្រជាជនគ្រប់រូប នៅសហគមន៍ជនបទ ត្រូវមានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថាន ដែលមានអនាម័យប្រកបដោយនិរន្តភាព។
តាមរដ្ឋាភិបាលកម្ពុជា ដើម្បីឲ្យអនាម័យឈានឡើង ដល់ ១០០ភាគរយ នៅឆ្នាំ ២០២៥ ក្រសួងអភិវឌ្ឍជនបទ អង្គការពាក់ព័ន្ធ និងរដ្ឋាភិបាល បានកំណត់យកគោលការណ៍ ៥ចំណុច ដែលរួមមាន កៀរគរវិស័យឯកជន និងសប្បុរសជន ឲ្យបន្តលើកស្ទួយការផ្គត់ផ្គង់ទឹកស្អាតនៅជនបទ និងអប់រំប្រជាជន។ អប់រំតាមសាលារៀន អំពីការលើកកម្ពស់សុខាមាលភាពកុមារ។ អប់រំតាមសាសនា និងប្រព័ន្ធផ្សព្វផ្សាយ ពីអនាម័យ ការប្រើប្រាស់បង្គន់អនាម័យ និងទឹកស្អាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ