គោលដៅទេសចរណ៍ធំៗទាំង៣ ត្រៀមរួចហើយ ដើម្បីស្វាគមន៍អ្នកទេសចរ ក្នុងឱកាសបុណ្យអុំទូក
ខេត្តព្រះសីហនុ ទីក្រុងភ្នំពេញ ជាពិសេសគឺ ខេត្តសៀមរាប ដែលជាគោលដៅទេសចរណ៍សំខាន់នៅកម្ពុជា បានត្រៀមលក្ខណៈរួចរាល់ហើយ ដើម្បី អបអរសាទរព្រះរាជពិធីបុណ្យ អុំទូក បណ្តែតប្រទីប និងសំពះព្រះខែដែលចាប់ផ្តើមនៅថ្ងៃទី ២៤ ខែវិច្ឆិកាស្អែកនេះ។ ជាថ្ងៃឈប់សំរាកដ៏ធំមួយប្រចាំឆ្នាំ ដែលអនុញ្ញាតិអោយប្រជាជននៅកម្ពុជាឈប់សំរាកបាន៣ថ្ងៃ។
ចុះផ្សាយនៅថ្ងៃ៖
ស្តាប់ - ០២:១៦
ការប្រណាំងទូក បណ្តែតប្រទីប សំពះព្រះខែ នឹងត្រូវធ្វើឡើងរយៈពេល២ថ្ងៃ គឺថ្ងៃទី ២៤ និង ២៥ នៅខេត្តសៀមរាប ។ ក្រៅពីនេះក៏នឹងមានការបាញ់កាំជ្រួច និង បង្ហោះគោម រួមជាមួយនឹងការតុបតែងលម្អក្នុងទីក្រុង ដើម្បីអបអរសាទរព្រះរាជពិធីបុណ្យប្រចាំឆ្នាំដ៏ធំមួយនេះផងដែរ។ ចំនែកសន្តិសុខក៏ត្រូវបានរៀបចំអោយមានការការពារយ៉ាងល្អប្រសើរ ដែលអនុញាតិអោយភ្ញៀវទេសចរអាចដើរហើរគ្រប់ច្រកល្ហក ទោះទៅដល់ទីដាច់ស្រយាលក្តី។ នេះបើតាមប្រសាសន៍ លោក ប៊ុន ថារិទ្ធ អភិបាលរង និងជាអ្នកនាំពាក្យសាលាខេត្តសៀមរាប ដែលក៏បានបង្ហាញសុទិដ្ឋិនិយមថា ជាមួយនឹងការរៀបចំដែលកាន់តែល្អស្អាតជាងឆ្នាំមុនៗទៅទៀត នឹងធ្វើអោយខេត្តសៀមរាបរបស់លោក ទទួលបានភ្ញៀវទេសចរជាង៥ម៉ឺននាក់ ក្នុងរយៈពេល៣ថ្ងៃនៃពិធីបុណ្យអុំទូកនេះ។
ចំនែក នៅខេត្តព្រះសីហនុជាប់ឆ្នេរសមុទ្រវិញ បើទោះមិនមានរៀបចំកម្មវិធីអ្វីពិសេសក៏ដោយ លោក នូ សុផល ប្រធានមន្ទីរទេសចរណ៍ខេត្តព្រះសីហនុ បានបញ្ជាក់ប្រាប់វិទ្យុបារាំងនាថ្ងៃទី២៣ វិច្ឆិកានេះថា អាជ្ញាធរបានចាត់កំលាំងដើម្បីពង្រឹងសន្តិសុខសុវត្ថិភាពជូនដល់ភ្ញៀវទេសចរណ៍ទាំងឡាយ។ ក្រៅពីនេះ អាជ្ញាធរក៏បានណែនាំ កុំអោយមានការដំឡើងថ្លៃលើម្ហូបនិងសេវាកម្មផងដែរ។ ថ្លៃអាហារនិងសេវាកម្ម ជាបញ្ហាដែលអ្នកទេសចរតែងតែរអ៊ូរទាំ ថាអោយតែមានបុណ្យទានដឹងតែឡើងថ្លៃ។
រីឯនៅភ្នំពេញ ដែលជាទីក្រុងដែលតែងតែទាក់ទាញប្រជាពលរដ្ឋយ៉ាងច្រើនកុះករអោយមកដើរកំសាន្តនាបុណ្យអុំទូកនោះ នៅឆ្នាំ ទំនងជាស្ងាត់ជាងរាល់ដង ក៏ព្រោះតែគ្មានការប្រណាំងទូក។ ក៏ប៉ុន្តែលោកឡុង ឌីម៉ង់អ្នកនាំពាក្យសាលារាជធានីភ្នំពេញបានបញ្ជាក់ប្រាប់វិទ្យុបារាំងថា ដើម្បីជំនួសអោយការប្រណាំងទូកដ៏មានប្រជាប្រិយភាព អាជ្ញាធរក្រុងភ្នំពេញ នៅឆ្នាំនេះ មានកម្មវិធីពិសេស២ គឺ ទី១ ការបណ្តែតគោមលើផ្ទៃជលសារ ប្រមាណជា៥០០គោមនៅទន្លេចតុមុខ មុខព្រះបរមរាជវាំង និងទី២គឺ ការបង្ហាញពីពិធីដាល់អំបុក អកអំបុក និងសំពះព្រះខែនៅរមណីយដ្ឋានវត្តភ្នំ។ កម្មវិធីទាំងពីរនេះ លោកអ្នកនាំពាក្យបញ្ជាក់ថា នឹងធ្វើឡើងនៅថ្ងៃទី២៥ខែវិច្ឆិកា ដែលជាថ្ងៃទី២នៃព្រះរាជពិធីបុណ្យ។
សូមបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ ជារៀងរាល់ឆ្នាំតែងតែប្រារព្ធឡើងរយៈពេល៣ថ្ងៃ គឺនៅថ្ងៃទី ១៤កើត ១៥កើត និង ១រោចខែកត្តិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ