អំណាចសាលក្រមលែងជាអន្ទាក់សម្រាប់បក្សប្រឆាំងហើយ
ចុះផ្សាយនៅថ្ងៃ៖
ស្តាប់ - ០៣:៣៣
ប្រមុខគណបក្សប្រឆាំងលែងជាប់ក្នុងអន្ទាក់តុលាការខ្មែរទៀតហើយនៅពេលដែលប្រពន្ធ័អ៊ីនធើណែត កំពុងរីកចម្រើន។ លោកបានប្រើប្រាស់អ៊ីនធើណែតជាឧបករណ៍ជំរុញការឃោសនានយោបាយនិងបង្កើនការចាប់អារម្មណ៍ពីសាធារណជននិងបណ្តាញផ្សព្វផ្សាយ។ បទវិភាគរបស់គង់ សុឋានរិទ្ធ៖
នៅពេលដែលវិស័យបច្ចេកវិទ្យាអ៊ីនធើណែតកាន់តែជឿនលឿន គំនៀបតុលាការលើមេដឹកនាំគណបក្សប្រឆាំងលោកសម រង្ស៊ី ហាក់ដូចជាមិនសូវទទួលបានជោគជ័យប៉ុន្មានទេ។ ពីព្រោះថាមេបក្សប្រឆាំងបានប្រើប្រពន្ធ័អ៊ីនធើណែតពីនាយសមុទ្រដើម្បីធ្វើនយោបាយ ដើម្បីដឹកនាំនយោបាយនិងដើម្បីជួបជាមួលសកម្មជនមូលដ្ឋានរបស់ខ្លួនពីចម្ងាយ។
ចាប់តាំងពីឆ្នាំ២០០៤មក មេដឹកនាំគណបក្សប្រឆាំងត្រូវតុលាការខ្មែរផ្តន្ទាទោសជាច្រើនដងនិងដោយបានដាក់ទោសធ្ងន់ធ្ងរទៀតផង។ ការផ្តន្ទាទោសដែលត្រូវគេអធិប្បាយថាដោយសារមូលហេតុនយោបាយដើម្បីឲ្យលោកសម រង្ស៊ី ថយឥទ្ធិពលក្នុងការប្រមូលសម្លេងឆ្នោត។ ក្នុងពេលនោះលោកសម រង្ស៊ី បាននិរទេសខ្លួនទៅក្រៅប្រទេសដើម្បីគេចផុតពីការទទួលទោស។ ម្យ៉ាងវិញទៀតនៅពេលនោះ មេដឹកនាំគណបក្សប្រឆាំងក៏មិនសូវមានឱកាសទាក់ទងផ្ទាល់មកកាន់សកម្មជនមូលដ្ឋានរបស់ខ្លួនដែរ ហើយការភ្ជាប់ទំនាក់ទំនងរបស់មេបក្សប្រឆាំងពីក្រៅប្រទេសមកកាន់សកម្មជនឬក្បាលម៉ាស៊ីននយោបាយក្នុងស្រុកត្រូវធ្វើតាមទូរសព្ទ័ដោយភ្ជាប់សម្លេងទៅកាន់ឧឃោសនសព្ទ័។
ប៉ុន្តែក្នុងពេលនេះអ្វីៗមានភាពងាយស្រួលច្រើនសម្រាប់មេបក្សប្រឆាំងហើយសាលក្រមរបស់តុលាការលែងជាអង្គប់ចាប់បង្ខាំងលោកសម រង្ស៊ី មិនឲ្យធ្វើសកម្មភាពនយោបាយដូចជាការឃោសនា ការពិភាក្សានយោបាយជាមួយឥស្សជននយោបាយនៅក្នុងប្រទេសទៀតហើយ។ នោះគឺដោយសារតែការនរីកចំរើនផ្នែកនសេវាកម្មInternet។ ហើយអ្នកនយោបាយដូចជាប្រមុខបក្សប្រឆាំងជាដើមបានប្រើប្រាស់គ្រប់មធ្យោបាយដួចជាសន្និសិទដោយបង្ហាញរូបភាព ឬវីដេអូ កុងហ្វេរ៉ង់ស៍ពីក្រៅប្រទេស ឬបណ្តាញសង្គមហ្វេសប៊ុកដើម្បីបង្ហាញវត្តមានរបស់ខ្លួនឡើងវិញចំពោះមុខសកម្មជន អ្នកគាំទ្រនយោបាយ ឬសមាជិកដឹកនាំបក្ស។ ត្រង់ចំណុចនេះបញ្ជាក់ថាបើទោះបីជាគណបក្សកាន់អំណាចប្រើប្រាស់ជាយថាហេតុនូវយន្តការតុលាការដើម្បីដាក់សម្ពាធលើមេដឹកនាំគណបក្សប្រឆាំងក៏ដោយក៏មេដឹកនាំគណបក្សនេះអាចធ្វើអាជីវកម្មលើផលប្រយោជន៍នៃការរីកចម្រើនប្រពន្ធ័បច្ចេកវិទ្យាInternet សម្រាប់ជាមធ្យោបាយធ្វើនយោបាយដែរ។
ក្រៅពីនោះប្រមុខបក្សប្រឆាំងក៏បានប្រើប្រាស់បណ្តាញសង្គមហ្វេសប៊ុកជាវេទិកាបង្ហាញទស្សនយោបល់ និងជាប្រភពដកស្រង់របស់អ្នកសារព័ត៌មានទៀតផង។ ហើយការដកស្រង់របស់អ្នកសារព័ត៌មានពីមេដឹកនាំនិងសកម្មភាពបក្សប្រឆាំងនេះបានផ្តល់សារសំខាន់ថែមទៀតដល់មេបក្សប្រឆាំង។
សរុបមកវិញ បើទោះជាលោកសម រង្ស៊ី មិនអាចវិលចូលប្រទេសកម្ពុជាវិញនៅក្នុងពេលនេះ ដោយសារអំណាចសាលក្រមតុលាការប៉ុន្តែលោកសម រង្ស៊ី នៅតែអាចធ្វើសកម្មភាពនយោបាយតាមបែបជឿនលឿនគឺការប្រើប្រាស់អ៊ីនធើណែតនេះឯង។ ដូចនេះនៅពេលដែលប្រពន្ធ័បច្ចេកវិទ្យាInternet រីកចម្រើន នោះការធ្វើនយោបាយក៏មានលក្ខណៈកាន់តែងាយស្រួលនិងបើកចំហ។ ហើយគំនៀបតាមផ្លូវតុលាការនឹងចុះថយប្រសិទ្ធិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ