គណបក្សធំទាំងពីរប្រជុំសម្រេចបាន៩ចំណុច ក្នុងចំណោម២១ចំណុចដែលសហជីពស្នើសុំ
គណបក្សប្រជាជនកម្ពុជា និងគណបក្សសង្គ្រោះជាតិ បានអះអាងរួមគ្នានៅរសៀលថ្ងៃទី១៤ មករានេះថា ការប្រជុំពិភាក្សាលើសំណើរបស់សហជីពទាំង២១ ចំណុចនឹងត្រូវបញ្ចប់ក្នុងពេលឆាប់ៗខាងមុខនេះជាមិនខាននោះទេ។ ក្នុងកិច្ចប្រជុំពិភាក្សាជាលើកទីពីរ នៅវិមានរដ្ឋសភាកម្ពុជា នៅរសៀលថ្ងៃនេះ គណបក្សទាំងពីរសម្រេចបាន៧ចំណុច ខណៈដែលការប្រជុំលើកទីមួយកាលពីថ្ងៃទី៤ មករា សម្រេចបានពីរចំណុច។
ចុះផ្សាយនៅថ្ងៃ៖
ស្តាប់ - ០២:៥២
រហូតមកទល់នឹងពេលនេះ គណបក្សកាន់អំណាចនិងគណបក្សប្រឆាំងបានរួមគ្នាប្រជុំពិភាក្សាសម្រេចបាន ៩ចំណុចហើយ ក្នុងចំណោម២១ ចំណុចដែលសហជីពបានស្នើសុំឲ្យធ្វើការពិនិត្យឡើងវិញ មុននឹងសម្រេចអនុម័តសេចក្តីព្រាងច្បាប់សហជីព ដែលមាន១៧ជំពូក និង៩១មាត្រា។ ជាសេចក្តីព្រាងច្បាប់មួយដែលមានការប្រទាញប្រទង់គ្នា រវាងសហជីពនិងក្រសួងការងារ ព្រោះខាងសហជីពបានលើកឡើងថាសេចក្តីព្រាងច្បាប់មួយនេះមាននិន្នាការបិទសិទ្ធិសេរីភាពក្នុងការបញ្ចេញមតិ និងប៉ះពាល់ដល់ប្រយោជន៍រួមរបស់ក្រុមសហជីពនិងកម្មករ។
នៅក្នុងកិច្ចប្រជុំពិភាក្សាជាលើកទីពីរនេះ ទាំងគណបក្សប្រជាជនកម្ពុជា និងគណបក្សសង្គ្រោះជាតិសុទ្ធតែបានអះអាងថា ខ្លួនរួមគ្នាដើម្បីដោះស្រាយ និងកែប្រែសេចក្តីព្រាងច្បាប់នេះ ឲ្យបម្រើផលប្រយោជន៍ដល់គ្រប់ភាគីទាំងអស់ ដែលមានដូចជាខាងសហជីព កម្មករនិយោជិក និងនិយោជកផងដែរ។ លោកសុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងប្រាប់ក្រុមអ្នកសារព័ត៌មានបន្ទាប់ពីកិច្ចប្រជុំបិទបញ្ចប់ថា សំណើទាំង២១ ចំណុចរបស់សហជីពនឹងត្រូវដោះស្រាយចប់រួចរាល់ក្នុងពេលឆាប់ៗខាងមុខនេះ។ សំលេងរបស់លោកសុខ ឥសាន៖
ជាមួយគ្នានេះដែរ លោកសុន ឆៃ មន្ត្រីជាន់ខ្ពស់មកពីគណបក្សប្រឆាំងដែលបានចូលរួមនៅក្នុងកិច្ចប្រជុំនេះ ក៏បានថ្លែងថា គណៈកម្មការទទួលបន្ទុកដោះស្រាយលើបញ្ហានេះបានកំពុងតែព្យាយាមដោះស្រាយក្តីកង្វល់នានារបស់សហជីពទាំងអស់ ដូច្នេះសូមកុំឲ្យមានការព្រួយបារម្ភតទៅទៀតអី។ សំលេងរបស់លោកសុន ឆៃ៖
បន្ទាប់ពីកិច្ចប្រជុំលើកទីពីរនេះ ត្រូវបានបញ្ចប់ គណៈកម្មការដែលមានភាគីចូលរួមពីតំណាងរាស្រ្តរបស់គណបក្សទាំងពីរ បានបញ្ជាក់ថា ការប្រជុំលើកទីបីនឹងត្រូវធ្វើឡើងនៅថ្ងៃអង្គារ ទី១៩ សប្តាហ៍ក្រោយនេះជាបន្តទៀត ដើម្បីពន្លឿនដំណើរការឲ្យបានចប់រួចរាល់ក្នុងពេលឆាប់ៗខាងមុខនេះ។ គួររំលឹកជូនថាការប្រជុំពិភាក្សាលើកទីមួយត្រូវបានធ្វើឡើងកាលពីថ្ងៃទី៤ មករា ដើមឆ្នាំ២០១៦នេះ ហើយលើកទីពីរ គឺនៅថ្ងៃទី១៤ មករានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ