អង្គការមិនមែនរដ្ឋាភិបាលបន្តចោទប្រកាន់រដ្ឋាភិបាលមិនគោរពកតិកាសញ្ញាអន្តរជាតិស្តីពីសិទ្ធិពលរដ្ឋ
ក្រុមអង្គការសង្គម ស៊ីវិលចំនួន២៥ កាលពីចុងសប្តាហ៍កន្លងទៅ បានសម្តែងការមិនពេញចិត្តចំពោះការខកខានរបស់អាជ្ញាធរកម្ពុជា ក្នុងការប្រតិបត្តិតាមអនុសាសន៍របស់ក្រុមការងារទទួលបន្ទុកបញ្ហា ឃុំខ្លួនតាមអំពើចិត្ត។ ក្រុមអង្គការ សមាគមទាំងនេះ ក៏បានស្នើជាថ្មីម្តងទៀត ដល់រដ្ឋាភិបាលកម្ពុជាឲ្យគោរពតាមកាតព្វកិច្ចរបស់ខ្លួនក្រោមច្បាប់ សិទ្ធិមនុស្សអន្តរជាតិ តាមរយៈការអនុវត្តជាបន្ទាន់នូវអនុសាសន៍របស់ ក្រុមការងារទទួលបន្ទុកបញ្ហាឃុំខ្លួនតាមអំពើចិត្ត រួមទាំងធានាថានឹងមានការដោះលែងអ្នកការពារសិទ្ធិមនុស្សទាំង៥នាក់ ជាបន្ទាន់។ តែមន្ត្រីរដ្ឋាភិបាលបានច្រានចោលសេចក្តីថ្លែងការណ៍នេះ។
ចុះផ្សាយនៅថ្ងៃ៖
ស្តាប់ - ០១:៤៩
ការអំពាវនាវនេះ បានធ្វើឡើងនៅក្នុងឱកាសគម្រប់ពីរខែនៃការអនុម័តលើសេចក្តីសម្រេចរបស់ក្រុមការងារអង្គការសហប្រជាជាតិទទួលបន្ទុកបញ្ហាឃុំខ្លួនតាមអំពើចិត្ត ដែលសម្រេចថាការបន្តឃុំខ្លួនលើបុគ្គលិកសមាគមអាដហុក រួមមានអ្នកស្រីលឹម មុនី លោក នី សុខា លោក ណៃ វ៉ង់ដា លោកយី សុខសាន្ត និងលោក នី ចរិយា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត(គ.ជ.ប)គឺធ្វើឡើងតាមអំពើចិត្ត។
សេចក្តីថ្លែងការណ៍រួមរបស់អង្គការ សមាគម បានអំពាវនាវផងដែរឲ្យរដ្ឋាភិបាលធ្វើការដោះលែងអ្នកទាំង៥ បន្ទាប់ពីពួកគេត្រូវបានឃុំខ្លួនអស់រយៈពេលជិត៩ខែមកហើយ ដោយសេចក្តីថ្លែងការណ៍នេះចោទប្រកាន់ថា កម្ពុជាពុំទាន់ចាត់វិធានការដើម្បីបញ្ឈប់ឬប៉ះប៉ូវចំពោះការអនុវត្តមិនត្រឹមត្រូវទៅលើអ្នកជាប់ឃុំទាំង៥នាក់ និងកម្ពុជានៅតែបន្តមិនគោរពតាមកាតព្វកិច្ចផ្លូវច្បាប់របស់ខ្លួន ក្រោមកតិកាសញ្ញាអន្តរជាតិស្តីពីសិទ្ធិពលរដ្ឋនិងសិទ្ធិនយោបាយ។
ដោយឡែក អ្នកនាំពាក្យក្រសួងយុត្តិធម៌ លោក ជិនម៉ាលីន ជាថ្មីម្តងទៀតបានហៅសេចក្តីថ្លែងការណ៍របស់ក្រុមអង្គការសង្គមស៊ីវិលថាជាការដាក់សម្ពាធទៅលើប្រព័ន្ធតុលាការ ខណៈដែលសំណុំរឿងកំពុងស្ថិតនៅក្នុងដំណើរការនីតិវិធីរបស់តុលាការ។ អ្នកនាំពាក្យរូបនេះកត់សម្គាល់ថាសេចក្តីថ្លែងការណ៍នេះ មិនមានមូលដ្ឋានច្បាប់គឺផ្អែកទៅលើទិដ្ឋភាពសង្គមនិងនយោបាយច្រើនជាង។
សូមបញ្ជាក់ថា មន្ត្រីអង្គការការពារសិទ្ធិមនុស្សអាដហុកចំនួន៤រូប និងអគ្គលេខាធិការរង គ.ជ.ប ១រូប ត្រូវបានឃាត់ខ្លួននិងឃុំខ្លួន បន្ទាប់ពីមានការចោទប្រកាន់ថា បានជាប់ទាក់ទងទៅនឹងបទសូកប៉ាន់សាក្សី ការសមគំនិតសូកប៉ាន់សាក្សី នៅក្នុងសំណុំរឿងអាស្រូវផ្លូវភេទរវាងលោកកឹម សុខា និងនាង ខុម ចាន់តារាទី ហៅស្រីមុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ