CMAC៖ គ្រោះថ្នាក់ដោយសារគ្រាប់មីន ច្រើនកើតលើពលរដ្ឋដើរល្បាតនៅតំបន់ព្រៃភ្នំដែលមានភាពស្មុគស្មាញ
នាពេលថ្មីៗនេះមានការលេចឮព័ត៌មានជាញឹកញាប់ពាក់ព័ន្ធនឹង គ្រោះថ្នាក់នៃមីនផ្ទុះនៅកម្ពុជា។គិតត្រឹមរយៈមួយខែជាងដើមឆ្នាំ ២០១៧ អ្នកដែលរងគ្រោះដោយសារតែគ្រាប់មីនផ្ទុះមានទៅដល់ ៦នាក់ ដែលក្នុងនោះស្លាប់៣នាក់ និងរបួស៣នាក់។ ឩបទ្ទេវហេតុផ្ទុះមីនផ្ទួនៗនេះ ភាគច្រើនកើតឡើងចំពោះប្រជាពលរដ្ឋ ហើយជាពិសេសគឺនៅចំពេលដែលពួកគេកំពុងតែដើរល្បាតព្រៃ និងរុករករុក្ខជាតិផ្សេងៗតាមបណ្តាព្រៃភ្នំនានា។ លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជាបានបញ្ជាក់ថា ករណីមីនផ្ទុះទាំងនេះភាគច្រើនកើតឡើងនៅចំតំបន់ថ្មី ដែលជាតំបន់ព្រៃភ្នំស្មុគស្មាញ។ ព្រឿន បញ្ញារី ជូនព័ត៌មាន:
ចុះផ្សាយនៅថ្ងៃ៖
ស្តាប់ - ០២:១៦
លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា(CMAC) បានប្រាប់វិទ្យុ បារាំងអន្តរជាតិនៅព្រឹកថ្ងៃសៅរ៍នេះថា កត្តាគ្រោះថ្នាក់ពាក់ព័ន្ធនឹងករណីដោះមីននេះភាគច្រើនអាចបណ្តាលមកពីការរំដោះមីន និងការដើរល្បាតនៅក្នុងតំបន់ព្រៃភ្នំដែលមានភាពស្មុគស្មាញ។ ស្មុគស្មាញត្រង់ថា ភាគច្រើនតំបន់ទាំងនោះគឺជាចម្រាក់ភ្នំ ព្រមទាំងជាតំបន់ដែលពោរពេញទៅដោយព្រៃឈើស្តុក។
ដោយឡែកប្រជាពលរដ្ឋរងគ្រោះដោយសារមីនផ្ទុះជាហូរហែរនាពេលថ្មីៗដើមឆ្នំា២០១៧នេះកើតឡើងដោយសារពួកគាត់បានដើររុករក និងល្បាតព្រៃនៅក្នុងតបន់ថ្មីដែលពុំទាន់បានឆ្លងកាត់យុទ្ធនាការរំដោះមីននៅឡើយ។ លោកបានបន្ថែមថា គ្រោះថ្នាក់នៃមីនផ្ទុះមួយចំនួន អាចកើតឡើងជាយថាហេតុផងដែរ ដោយសារតែវាអាចផ្ទុះនៅក្នុងឆ្នាំនេះ ឬក៏នៅក្នុងឆ្នាំក្រោយ។
គួរឱ្យដឹងថា ភាគច្រើននៃគ្រោះថ្នាក់គឺកើតឡើងចំពោះប្រជាពលរដ្ឋក្នុងពេលដែលពួកគាត់ដើរព្រៃ ច្រើនជាជាងបុគ្គលិករបស់អង្គភាពរំដោះមីន។ ក្នុងនោះដែរមីនបានផ្ទុះឡើងនៅចំពេលដែលពួកគាត់កំពុងតែធ្វើកសិកម្មស្រែចម្ការ ដោយប្រើប្រាស់ត្រាក់ទ័រភ្ជួរស្រែហើយទៅប៉ះមីនតោនផ្ទុះភ្លាមៗនៅនឹងកន្លែងតែម្តង។
ឆ្លើយតបទៅនឹងបញ្ហានេះ អគ្គនាយកមជ្ឈមណ្ឌលកំចាត់មីនកម្ពុជាបានបន្ថែមថា អង្គភាពបានដាក់ផែនការប្រតិបត្តិការទៅលើតំបន់ដែលបានអាទិភាពខ្ពស់ ពោលគឺសំដៅទៅលើដីដែលកំពុងប្រើប្រាស់ ហើយប្រឈមមុខទៅនឹងបញ្ហាគ្រាប់មីននិងយុទ្ធភ័ណ្ឌមិនទាន់ផ្ទុះនៅក្នុងកម្រិតមួយដែលធ្ងន់ធ្ងរ។ ក្រៅពីនេះ លោកបានបញ្ជាក់ថា តាមពិតទៅអត្រាគ្រោះថ្នាក់នៃគ្រាប់មីនក៏បានថយចុះមួយកម្រិតផងដែរ។ថយចុះ គឺដោយសារតែអង្គភាពបានដាក់គោលដៅ និងបេសកកម្មនៅចំតំបន់ដែលមានមីនច្រើន ព្រមទាំងកិច្ចសហការជាមួយប្រជាជននៅតាមមូលដ្ឋានក៏ដូចជាអ្នកបោសសម្អាតមីនផងដែរ។
មួយវិញទៀត អង្គភាពនឹងពង្រឹងនីតិវិធី និងវិន័យរបស់អង្គភាព តាមរយៈការហ្វឹកហ្វឺននិងពង្រឹងសមត្ថភាពរបស់គាត់ ព្រមទាំងបង្កើតនីតិវិធីថ្មីដើម្បីដោះស្រាយនៅពេលជួបបញ្ហាស្មុគស្មាញនៅពេលពួកគាត់ជួបប្រទះ។
ទាក់ទិនទៅនឹងប្រជាពលរដ្ឋ មជ្ឈមណ្ឌលកម្ចាត់មីនកម្ពុជា នឹងបន្តពង្រឹងបណ្តាញស្ម័គ្រចិត្តនៅតាមភូមិ តាមរយៈបន្តការអប់រំ បណ្តុះបណ្តាល ព្រមទាំងពង្រឹងការឆ្លើយតបទៅប្រជាពលរដ្ឋអោយបានឆាប់រហ័សផងដែរ។ សូមបញ្ជាក់ថា រហូតមកដល់ពេលនេះ ខេត្តដែលនៅតែមានបញ្ហាគ្រាប់មីនច្រើនជាងគេគឺខេត្តមួយចំនួនដែលស្ថិតនៅតាមបណ្តោយព្រំដែនកម្ពុជា-ថៃ ហើយជាពិសេសនោះគឺខេត្តបាត់ដំបង ព្រមទាំងបណ្តាស្រុកចំនួន២១ទៀតនៅតាមបណ្តាយព្រំដែននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ