៩ខែ ឆ្នាំ២០១៦ កម្ពុជាទទួលបានជំនួយទឹកប្រាក់ជាង២៥លានដុល្លារ ដើម្បីបោសសម្អាតមីន
រយៈពេល ៩ ខែ ឆ្នាំ ២០១៦ នេះ កម្ពុជាទទួលបានជំនួយគិតជាទឹកប្រាក់ ជាង២៥ លានដុល្លារ ពីបរទេស ដើម្បីបោសសម្អាតផ្ទៃដីដែលនៅសេសសល់ដោយគ្រាប់មីន។ ជំនួយទាំងនោះ ភាគច្រើន បានមកពីប្រទេស ជប៉ុន សហរដ្ឋអាមេរិក អាល្លឺម៉ង់ នរវៃស និង កាណាដាជាដើម។ សូមបញ្ជាក់ផងដែរ កាលពីម្សិលមិញ អាមេរិក តាមរយៈអង្គការ NPA បានសម្រេចផ្តល់ជំនួយបន្ថែមទៀត ជិត២លានដុល្លារ ដើម្បីគាំទ្រសកម្មភាពបោសសម្អាតសំណល់ជាតិផ្ទុះពីសង្គ្រាមរបស់អង្គការស៊ីម៉ាក់ នៅបណ្តាខេត្តទិសខាងកើតនៃប្រទេសកម្ពុជា សម្រាប់រយៈពេល១ ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ជំនួយបរទេសជាបន្តបន្ទាប់ បានបន្តផ្តល់ឲ្យកម្ពុជា នៅឆ្នាំនេះ ក្នុងគោលដៅបោសសម្អាតផ្ទៃដីមានមីននិងគ្រាប់យុទ្ធភ័ណ្ឌមិនទាន់ផ្ទុះដែលនៅសេសសល់តាំងពីសម័យសង្រ្គាមស៊ីវិល។ រយៈពេល ៩ ខែ ឆ្នាំ ២០១៦ ជំនួយពីបរទេសទាំងសម្ភារៈ និងទឹកប្រាក់ មានទឹកប្រាក់ចន្លោះ ពី ២៥ ដល់ ៣០ លាន ដុល្លារអាមេរិក។
ជាការកត់សម្គាល់ កាលពីថ្ងៃទី ៧ខែ តុលា សហរដ្ឋអាមេរិក តាមរយៈអង្គការ NPA បានផ្តល់ជាកញ្ចប់ថវិកា ដែលមានទឹកប្រាក់ជិត ២ លានដុល្លារ សម្រាប់គម្រោងបោសសម្អាតមីននៅកម្ពុជា។ គម្រោងបោះសម្អាតមីនរបស់អាមេរិក តាមរយៈអង្គការ NPA មានរយៈពេល១២ខែ ចាប់ពីដើមខែវិចិ្ឆកាឆ្នាំ២០១៦ ដល់ចុងខែតុលា ឆ្នាំ២០១៧ ដែលមានកម្លាំងប្រតិបតិ្តការចំនួនជាង២៣០នាក់ និងត្រូវរំដោះផ្ទៃដីចំការគ្រាប់មីនជាអាទិភាព នៅខេត្តកំពង់ចាម ត្បូងឃ្មុំ ក្រចេះ ស្ទឹងត្រែង ជាដើម។
គម្រោងនេះ នឹងបោសសម្អាតតំបន់ចំការមីនគ្រាប់បែក ប្រមាណ១២គីឡូម៉ែត្រក្រឡា។ នេះបើតាម លោក ហេង រតនា នាយកមជ្ឈមណ្ឌលសកម្មភាពកំចាត់មីន ហៅកាត់ថា ស៊ីម៉ាក់។ សូមបញ្ជាក់ថា គិតពីឆ្នាំ១៩៩៥ មក រដ្ឋាភិបាលសហរដ្ឋអាមេរិក បានផ្តល់ថវិកាឲ្យស៊ីម៉ាក់ ប្រមាណ៤០លានដុល្លារ បន្ថែមលើសនេះក៏មានជំនួយសម្ភារៈ និងការហ្វឹកហ្វឺនផងដែរ។
មិនត្រឹមតែប៉ុណ្ណោះ កាលពីចុងខែ កញ្ញា កន្លងទៅនេះ រាជរដ្ឋាភិបាលកម្ពុជា និងរដ្ឋាភិបាលជប៉ុន ក៏បានចុះហត្ថលេខាលិខិតប្តូរសារ សម្រាប់គាំទ្រការបោសសម្អាតមីន ដោយរដ្ឋាភិបាលជប៉ុន បានសម្រេចផ្តល់ជំនួយ ជាផ្លូវការចំនួន ១៧.៦លានដុល្លារអាមេរិក ផងដែរ។
សម្រាប់ប្រទេសកាណាដា ដែលជាប្រទេសកំណើតនៃអនុសញ្ញាអូតាវ៉ាអន្តរជាតិស្ដីពី ការហាមប្រាមការប្រើប្រាស់គ្រាប់មីនប្រឆាំងមនុស្សវិញ ក៏មានកញ្ចប់ថវិកាជួយដល់វិស័យដោះមីននៅកម្ពុជា ដែលជារដ្ឋភាគីនៃអនុសញ្ញានេះ ចំនួនជាង ១០លានដុល្លារក្នុងរយៈពេលបី ៣ឆ្នាំ ផងដែរ។
សូមបញ្ជាក់ថា នៅឆ្នាំ ២០១៦ នេះ កម្ពុជានៅមានផ្ទៃដីសង្ស័យថា មានមីននិងគ្រាប់យុទ្ធភ័ណ្ឌមិនទាន់ផ្ទុះប្រមាណជាង១ពាន់៦រយគីឡូម៉ែត្រក្រឡាទៀតដែលត្រូវសំអាត។ ក្នុងរយៈពេលបីឆ្នាំចុងក្រោយ ពីឆ្នាំ២០១៣ និងឆ្នាំ២០១៥ បញ្ហាគ្រោះថ្នាក់ដោយសារមីនតោននៅតែបន្តកើតឡើងជាញឹកញាប់ ដែលបណ្តាលមកពីការប្រើប្រាស់គ្រឿងចក្រធុនធ្ងន់នៅក្នុងតំបន់ដែលមានផលប៉ះពាល់ដោយសារមីនតោន។
លោក ហេង រតនា ធ្លាប់បានបញ្ជាក់ប្រាប់វិទ្យុបារាំងថា សម្រាប់ផ្ទៃដីដែលនៅសេសសល់ជាង១ពាន់៦រយគីឡូម៉ែត្រក្រឡានេះ មជ្ឈមណ្ឌលសកម្មភាពកំចាត់មីន អាចត្រូវការពេលវេលាប្រមាណជាង១០ឆ្នាំដើម្បីសំអាតផ្ទៃដីទាំងនោះ។ កម្ពុជា មានកាតព្វកិច្ចផ្លូវច្បាប់ និង ជាហត្ថលេខីទៅនឹងនៃ សន្ធិសញ្ញាស្ដីពីការហាមឃាត់គ្រាប់មីនប្រឆាំងមនុស្ស ហើយផែនការសកម្មភាព និងផែនការថ្នាក់ជាតិទាំងអស់កំណត់ត្រឹមឆ្នាំ២០២៥នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ