លោកនាយករដ្ឋមន្ដ្រី ហ៊ុន សែន ចាត់ទុកចិនជាខ្នងបង្អែករបស់កម្ពុជា
លោកនាយករដ្ឋមន្ដ្រី ហ៊ុន សែន បានចាត់ទុកចិនជាខ្នងបង្អែករបស់កម្ពុជា។ និងថា ជំនួយរបស់ចិន បានជួយពង្រឹងឯករាជ្យជាតិរបស់កម្ពុជា។ ការលើកឡើងរបស់លោកនាយករដ្ឋមន្ដ្រីយ៉ាងដូច្នេះ ធ្វើឡើងនៅថ្ងៃសុក្រទី០២វិច្ឆិកា ក្នុងជំនួបសវនាការជាមួយអនុប្រធានសភាតំណាងប្រជាជនចិន លោក ចាង ឈុនហ្ស៊ាន ។ លោក ចាង ឈុនហ្ស៊ាន ដែលកំពុងបំពេញទស្សនកិច្ចរយៈពេល៤ថ្ងៃនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:៣៨
«បើគ្មានប្រទេសចិនជាខ្នងបង្អែកដ៏រឹងមាំទេ នោះកម្ពុជាមិនអាចឈររឹងមាំដូចសព្វថ្ងៃបានទេ»។ នេះគឺជាអ្វីដែលលោកនាយករដ្ឋមន្ដ្រី ហ៊ុន សែន ថ្លែងប្រាប់លោក ចាង ឈុនហ្ស៊ាន អនុប្រធានសភាតំណាងប្រជាជនចិន នៅល្ងាចថ្ងៃទី០២ ខែវិច្ឆិកា នៅវិមានសន្តិភាព។ បើតាមប្រមុខរដ្ឋាភិបាលកម្ពុជា ការអភិវឌ្ឍហេដ្ឋារចនាសម្ព័ន្ធ និងការរីកចំរើនផ្នែកសេដ្ឋកិច្ចរបស់កម្ពុជានាពេលបច្ចុប្បន្ន មិនអាចកើតមានបានទេ បើគ្មានការជួយឧបត្ថម្ភពីប្រទេសចិន ទាំងជំនួយឥតសំណង ប្រាក់កម្ចីសម្បទាន និងជំនួយផ្សេងៗទៀត។ សម្រាប់លោក ហ៊ុន សែន ជំនួយរបស់ចិនទាំងអស់នេះ បានជួយពង្រឹងនូវឯករាជ្យភាពខាងនយោបាយរបស់កម្ពុជាផងដែរ។
នៅក្នុងជំនួបដដែលនោះ ប្រមុខរដ្ឋាភិបាលកម្ពុជា បានស្នើឲ្យប្រទេសចិន បន្តជួយទិញផលិតផលពីកម្ពុជា ខណៈកម្ពុជាកំពុងរងការគំរាមកំហែងដកប្រព័ន្ធអនុគ្រោះពន្ធ EBA ពីសំណាក់សហភាពអឺរ៉ុប។
ជុំវិញបញ្ហាពាណិជ្ជកម្មនេះ អនុប្រធានសភាតំណាងប្រជាជនចិន លោក ចាង ឈុនហ្ស៊ាន បានសន្យាថា លោកនឹងពាំនាំសំណើរបស់លោក ហ៊ុន សែន ទៅប្រាប់រដ្ឋមន្ដ្រីក្រសួងពាណិជ្ជកម្មចិន និងថ្នាក់ដឹកនាំចិន។ លោក ចាង ឈុនហ្ស៊ាន ក៏បានជំរុញឲ្យកម្ពុជាស្វែងរកទីផ្សារបន្ថែម នៅក្នុងប្រទេសជប៉ុននិងរុស្ស៊ីផងដែរ ព្រោះលោកយល់ថា ទំនិញរបស់កម្ពុជាមានគុណភាពខ្ពស់ អាចនាំចេញទៅលក់នៅបណ្ដាប្រទេសទាំងនោះបាន។
ចំពោះទំនាក់ទំនងទ្វេភាគី លោក ចាង ឈុនហ្ស៊ាន ចាត់ទុកទំនាក់ទំនងកម្ពុជាចិន ថាជាមិត្តភាពដែកថែប មិនអាចបំបែកបំបាក់បាន បន្ទាប់ពីប្រទេសទាំងពីរបានឆ្លងកាត់ឧបសគ្គច្រើននិងគ្រប់បែបយ៉ាងរួមគ្នានាពេលកន្លងមក។ នៅពេលបណ្ដាប្រទេសលោកខាងលិចមានមតិចម្រុះពីកម្ពុជា លោក ចាង ឈុនហ្ស៊ាន អះអាងថា ប្រទេសចិននឹងគាំទ្រលោក ហ៊ុន សែន ជារៀងរហូត។
គួរជម្រាបថា ខ្លឹមសារនៃកិច្ចសន្ទនារវាងលោកនាយករដ្ឋមន្ដ្រី ហ៊ុន សែន និងលោក ចាង ឈុនហ្ស៊ាន ត្រូវបានបង្ហើបឲ្យដឹងពីលោក ស្រ៊ី ថាមរុង្គ រដ្ឋមន្ដ្រីប្រតិភូអមនាយករដ្ឋមន្ដ្រី នៅថ្ងៃទី០២ ខែវិច្ឆិកា។ ក្រោយជំនួបជាមួយប្រមុខរដ្ឋាភិបាលកម្ពុជា លោក ចាង ឈុនហ្ស៊ាន ដែលអញ្ជើញមកដល់កម្ពុជានៅថ្ងៃទី០១វិច្ឆិកា នឹងបន្តដំណើរទៅខេត្តសៀមរាប មុននឹងត្រឡប់ទៅកាន់មាតុប្រទេសវិញនៅថ្ងៃទី០៤វិច្ឆិកា។
សូមរំឭកជូនថា កម្ពុជានិងចិន បានភ្ជាប់ទំនាក់ទំនងការទូតជាផ្លូវការនៅថ្ងៃទី១៩ កក្កដា ឆ្នាំ១៩៥៨។ រហូតមកទល់បច្ចុប្បន្ន ចិនបានក្លាយជាប្រទេសដែលដាក់ទុនរកស៊ីច្រើនជាងគេបង្អស់នៅកម្ពុជា និងជាប្រទេសដែលផ្ដល់ជំនួយឲ្យកម្ពុជាច្រើនជាងគេផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ