មួយឆ្នាំក្រោយកិច្ចព្រមព្រៀង២២កក្កដា៖ អ្វីខ្លះជាលទ្ធផល?
ចុះផ្សាយនៅថ្ងៃ៖
ស្តាប់ - ០៤:១២
២២កក្កដាឆ្នាំ២០១៤ - ២២កក្កដាឆ្នាំ២០១៥។ ថ្ងៃទី២២កក្កដានេះ គឺជាខួបមួយឆ្នាំគត់នៃកិច្ចព្រមព្រៀងបិទបញ្ចប់វិបត្តិនយោបាយ ក្រោយការបោះឆ្នោតនៅកម្ពុជា។ អស់រយៈពេលមួយឆ្នាំកន្លងមកនេះ គណបក្សជាប់ឆ្នោតទាំងពីរ ព្យាយាមគោរពអនុវត្តតាមកិច្ចព្រមព្រៀងនេះយ៉ាងម៉ឺងម៉ាត់។ អ៊ឹម រចនា សូមឆ្លៀតឱកាសនេះ រៀបរាប់ឡើងវិញនូវដើមកំណើត និងលទ្ធផលផ្លែផ្កានៃកិច្ចព្រមព្រៀងថ្ងៃទី២២កក្កដាឆ្នាំ២០១៤ ដូចតទៅ៖
នៅព្រឹកថ្ងៃទី២២កក្កដាឆ្នាំ២០១៤ ជំនួបកំពូលរវាងគណបក្សជាប់ឆ្នោតទាំងពីរបានរៀបចំ ធ្វើឡើងនៅវិមានព្រឹទ្ធសភា។ ជំនួបនេះ បានកើតឡើងបន្ទាប់ពីអំពើហិង្សាកាលពីថ្ងៃទី១៥កក្កដា។ ជាអំពើហិង្សា ដែលឈានដល់ការចាប់ខ្លួនតំណាងរាស្ត្រគណបក្សប្រឆាំង៧នាក់ដាក់ពន្ធនាគារ។
ក្រោយកិច្ចប្រជុំកំពូលដែលមានរយៈពេលជិត៥ម៉ោង គណបក្សប្រជាជនកម្ពុជា និងគណបក្សសង្គ្រោះជាតិ ដែលមានសមាសភាពម្ខាង៨រូប បានឈានទៅសម្រេចកិច្ចព្រមព្រៀងរួមមួយ បិទបញ្ចប់ជម្លោះនយោបាយក្រោយការបោះឆ្នោតនីតិកាលទី៥ នៅកម្ពុជា។ កិច្ចព្រមព្រៀង៧ចំណុច ស្ដីពីដំណោះស្រាយនយោបាយ ត្រូវបានចុះហត្ថលេខា។ ហើយប៉ុន្មានម៉ោងបន្ទាប់ពីនោះ ពោលគឺនៅល្ងាចថ្ងៃទី២២ខែកក្កដានោះតែម្ដង តំណាងរាស្ត្ររបស់គណបក្សសង្គ្រោះជាតិចំនួន៧រូប ក៏ត្រូវបានដោះលែងឲ្យនៅក្រៅឃុំជាបណ្ដោះអាសន្ន។
មួយឆ្នាំកន្លងមកនេះ កិច្ចព្រមព្រៀងនយោបាយថ្ងៃទី២២កក្កដា ត្រូវបានគណបក្សជាប់ឆ្នោតទាំងពីរគោរព និងអនុវត្តយ៉ាងខ្ជាប់ខ្ជួន។ បើមើលមួយភ្លែត កិច្ចព្រមព្រៀងនេះ បានផ្ដល់លទ្ធផលគួរឲ្យកត់សម្គាល់ដល់គណបក្សសង្គ្រោះជាតិ។ ប៉ុន្តែមែនទែនទៅ បើទោះបីជាសង្គ្រោះជាតិបានលទ្ធផលខ្លះ ប៉ុន្តែវាតិចតួចណាស់ បើប្រៀបទៅនឹងការទាមទាររបស់គណបក្សនេះ នៅក្រោយការបោះឆ្នោត។ ជាងនេះទៅទៀត គណបក្សប្រជាជនកម្ពុជា នៅតែអាចរក្សាបាននូវការចង់បានរបស់ខ្លួនដដែល។ ពេលខ្លះ បក្សកាន់អំណាច ថែមទាំងមានឱកាសដាក់គំនាបទៅលើបក្សប្រឆាំងទៀតផង។
ទី១៖ ទាក់ទងនឹងការដើរចូលសភារបស់តំណាងរាស្ត្របក្សប្រឆាំង។ ជាលទ្ធផលវិជ្ជមាន គណបក្សសង្គ្រោះជាតិ បានទទួលតំណែងអនុប្រធានទី១នៃរដ្ឋសភា។ ជាងនេះទៅទៀត បក្សប្រឆាំងនិងបក្សអំណាច កាន់តំណែងប្រធានគណៈកម្មការស្មើគ្នា ក្នុងចំណោមគណៈកម្មការទាំង១០របស់រដ្ឋសភា។ ប៉ុន្តែយ៉ាងណាក៏ដោយ គណៈកម្មការសំខាន់ៗ នៅតែស្ថិតក្រោមកណ្ដាប់ដៃរបស់គណបក្សប្រជាជនកម្ពុជាដដែល។
ទី២៖ ទាក់ទងនឹងកំណែទម្រង់ការបោះឆ្នោត។ ក្បាលម៉ាស៊ីននៃគណៈកម្មាធិការជាតិរៀបចំការបោះឆ្នោត ត្រូវរុះរើឡើងវិញ តាមរយៈរូបមន្ត ៤-៤-១។ ពោលគឺ គណបក្សទាំងពីរមានសមាសភាពម្ខាង៤នាក់ និងម្នាក់ទៀត នឹងត្រូវជ្រើសរើសតាមរយៈការព្រមព្រៀងរបស់គណបក្សទាំងពីរ។ នេះគឺជាលទ្ធផលស្មើមុខស្មើមាត់រវាងគណបក្សជាប់ឆ្នោតទាំងពីរ។ ប៉ុន្តែ គណបក្សកាន់អំណាចនៅតែមានប្រៀបជាងដដែល តាមរយៈការអនុម័តសមាសភាព គជប តាមរូបមន្តភាគច្រើនដាច់ខាត ឬ៥០ភាគរយ បូកមួយ។ ការបោះឆ្នោតឡើងវិញ តាមការចង់បានរបស់បក្សប្រឆាំងក៏គ្មានដែរ។ គឺមានតែការប្ដូរកាលបរិច្ឆេទនៃការបោះឆ្នោត ពីខែកក្កដា មកខែកុម្ភៈតែប៉ុណ្ណោះ។
ក្រៅពីលទ្ធផលសំខាន់ៗទាំងពីរនេះ កិច្ចព្រមព្រៀងនយោបាយថ្ងៃទី២២កក្កដា ក៏បានត្រួសត្រាយផ្លូវឲ្យបក្សប្រឆាំង បង្កើតប៉ុស្តិ៍ទូរទស្សន៍ព្រះអាទិត្យ ស្របតាមការចង់បានផងដែរ។ ជាមួយគ្នានេះ កិច្ចព្រមព្រៀង២២កក្កដា បានបើកឱកាសឲ្យបក្សកាន់អំណាច អនុម័តច្បាប់ដ៏រសើបមួយចំនួន។ កិច្ចព្រមព្រៀងដដែលនេះ ធ្វើឲ្យបក្សកាន់អំណាច លែងត្រូវបក្សប្រឆាំងវាយប្រហារជេរប្រមាថ។ យ៉ាងណាក៏ដោយ វាមិនអាចបញ្ចប់បណ្ដឹងទៅលើតំណាងរាស្ត្រនិងសកម្មជនគណបក្សសង្គ្រោះជាតិ នៅក្នុងសំណុំរឿងអំពើហិង្សាថ្ងៃទី១៥កក្កដា ឆ្នាំ២០១៤ឡើយ។ តុលាការនៅតែបន្តកោះហៅតំណាងរាស្ត្រ និងសកម្មជននៃបក្សប្រឆាំងទៅបំភ្លឺក្នុងសំណុំរឿងនេះ ជារឿយៗរហូតមក។
អស់រយៈពេលមួយឆ្នាំកន្លងមកនេះ ពេលវេលានិងការប្រព្រឹត្តរបស់អ្នកនយោបាយកម្ពុជា បានពិសោធឲ្យឃើញថា កិច្ចព្រមព្រៀងថ្ងៃទី២២កក្កដា គ្រាន់តែជាកិច្ចសន្យានយោបាយ ដែលធ្វើឡើងក្រោមសម្ពាធរបស់គណបក្សកាន់អំណាចតែប៉ុណ្ណោះ។ ទោះជាយ៉ាងណាក៏ដោយចុះ យ៉ាងហោចណាស់ កិច្ចព្រមព្រៀងថ្ងៃទី២២កក្កដា បានបិទបញ្ចប់វិបត្តិនយោបាយក្រោយការបោះឆ្នោតនៅកម្ពុជា។ គណបក្សទាំងពីរ ត្រូវការពេល និងការប្ដេជ្ញាចិត្តច្រើនជាងនេះទៀត ទើបអាចអនុវត្តខ្លឹមសារនៃកិច្ចព្រមព្រៀងថ្ងៃទី២២កក្កដា ឲ្យបានពេញលេញពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ