អ្នកបបួលគ្នាស្បថរឿងបាត់សន្លឹកឆ្នោត ចោទគ្នាថាចង់បានមុខមាត់
នៅថ្ងៃទី២១ ខែមិថុនានេះ ក្រុមនិសិ្សតក្មេងវត្ត និងក្រុមសម្ព័ន្ធសេនានាគ បាននាំគ្នាស្បថខាងមុខព្រះអង្គដងកើ ជាមួយលោក ម៉ៅ ពិសេស ជាប្រធានសហព័ន្ធនិស្សបញ្ញវន្តកម្ពុជា។ តែលោក ម៉ៅ ពិសេស មិនបានចូលរួមក្នុងការស្បថនោះទេ។ លោកម៉ៅ ពិសេស បញ្ជាក់ពីការមិនចូលរួមស្បថនោះថាលោកមិនចាប់អារម្មណ៍នឹងពួកគាត់ ដែលចេញមុខស្បថជំនួសលោកនាយករដ្ឋមន្ត្រី ហ៊ុន សែន នោះទេ។
ចុះផ្សាយនៅថ្ងៃ៖
ស្តាប់ - ០១:៤០
លោក ម៉ៅ ពិសេស ប្រធានសហព័ន្ធនិស្សបញ្ញវន្តកម្ពុជា បានបញ្ជាក់ពីអវត្តមានរបស់លោកថា ដោយសារតែលោកមិនបានទទួលលិខិតត្រឹមត្រូវពីក្រុមនិស្សិតក្មេងវត្ត និងក្រុមសម្ព័ន្ធសេនានាគ។ លោកបន្ថែមថា ជាការពិតលោកបានដាក់លិខិតស្បថជាមួយនឹងលោកនាយករដ្ឋមន្ត្រីហ៊ុន សែន ពោលគឺមិនមែនបបួលក្រុមយុវជននេះទេ។ លោកបញ្ជាក់ទៀតថានេះ ប្រហែលជាក្រុមពួកគាត់ចង់បានពិន្ទុក្នុងចំណោមក្រុមយុវជនរបស់គណបក្សប្រជាជនកម្ពុជា។
សូមបញ្ជាក់ថាលោក ម៉ៅ ពិសេស កាលពីថ្ងៃទី៩ មិថុនា បាន សរសេរលិខិតមួយដាក់ទៅលោកនាយករដ្ឋមន្ត្រីហ៊ុន សែន ដើម្បីកំណត់ពេលក្នុងការស្បថជាមួយលោកនៅខាងមុខព្រះអង្គដងកើ ពាក់ព័ន្ធនឹងរឿងលួចបន្លំសន្លឹកឆ្នោត។ ការដាក់លិខិតនេះទៅលោកនាយករដ្ឋមន្ត្រីហ៊ុនសែន របស់លោកម៉ៅ ពិសេស បានធ្វើឡើងក្រោយពីលោកនាយករដ្ឋមន្ត្រីបានបបួលគណបក្សប្រឆាំង ស្បថ ដើម្បីបញ្ជាក់ថាគណបក្សប្រជាជនមិនបានលួចបន្លំសន្លឹកឆ្នោតដូចការចោទប្រកាន់នោះទេ។
ចំណែកលោក ប៉ាន់ ខែម ប៊ុនថន ជាប្រធានក្រុមសម្ព័ន្ធសេនានាគ បានបញ្ជាក់ថា ការមិនចូលរួមរបស់លោកម៉ោ ពិសេសគឺជាសិទ្ធិរបស់លោក ហើយលោកថាការអញ្ជើញលោកម៉ៅ ពិសេសមកស្បថ គឺដោយសារតែលោកម៉ៅ ពិសេស បានអញ្ជើញលោកនាយករដ្ឋមន្ត្រីហ៊ុនសែន។ លោកបន្តថា ប្រសិនបើលោកម៉ៅ ពិសេស ថាក្រុមរបស់លោកចង់បានមុខមាត់ ចុះតើលោកម៉ៅ ពិសេស មិនចង់បានមុខមាត់ទេ ឬយ៉ាងណា? ព្រោះការពិតលោកនាយករដ្ឋមន្ត្រីមិនបានហៅ លោក ម៉ៅ ពិសេសទេ តែលោកអញ្ជើញ លោក សម រង្សី។
លោក អ៊ូ វីរៈ ប្រធានស្ថាប័នស្រាវជ្រាវវេទិកាអនាគត និងជាអ្នកវិភាគឯករាជ្យ បានបញ្ជាក់ការស្បថស្បែវាគឺជារឿងចាស់គំរឹលណាស់ទៅហើយ។ លោកបន្ថែមថា បើសិនជាអាចក្រុមទាំងពីរមិនគួរបបួលគ្នាស្បថទេ ព្រោះការលើកឡើងរបស់ក្រុមទាំងពីរគឺសុទ្ធតែលើសពីការពិត។ ជុំវិញការចោទប្រកាន់គ្នាទៅវិញទៅមកថាការស្បថនេះ គឺដើម្បីមុខមាត់ លោកអ៊ូ វីរៈបញ្ជាក់ថា គឺជាការពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ