ប្រព័ន្ធបច្ចេកវិទ្យា5G៖ កម្ពុជាកំពុងរៀបចំគោលនយោបាយថ្មីមួយ
ក្រសួងប្រៃសណីយ៍ និងទូរគមនាគមន៍កម្ពុជានឹងរៀបចំធ្វើគោលនយោបាយមួយ ដើម្បីប្រើប្រាស់ប្រព័ន្ធបច្ចេកវិទ្យា5G។ នេះបើតាមនិយ័តករទូរគមនាគមន៍កម្ពុជា។ បណ្តាញ5G ដែលបច្ចុប្បន្ននេះ មានក្រុមហ៊ុនផ្តល់សេវាទូរស័ព្ទក្នុងស្រុកចំនួន៥ហើយ បានធ្វើតេស្តសាកល្បង និងមានក្រុមហ៊ុនខ្លះចង់ឲ្យអតិថិជនរបស់ខ្លួនប្រើប្រាស់នៅឆ្នាំ២០២០។
ចុះផ្សាយនៅថ្ងៃ៖
ស្តាប់ - ០២:១៩
លោក អ៊ឹម វត្ថា សមាជិកនិយ័តករទូរគមនាគមន៍កម្ពុជាបានថ្លែងប្រាប់វិទ្យុបារាំងអន្តរជាតិនៅថ្ងៃទី៤ ខែមីនានេះថា ក្រសួងប្រៃសណីយ៍ និងទូរគមនាគមន៍កម្ពុជានឹងរៀបចំធ្វើគោលនយោបាយមួយ សហការជាមួយក្រសួងពាក់ព័ន្ធ ដើម្បីពិនិត្យលើវិសាលភាពវិទ្យុក៏ដូចជាហ្វ្រេកង់ ក្នុងគោលដៅបន្ស៊ីគ្នាជាមួយនឹងស្តង់ដារអន្តរជាតិ លើការប្រើប្រាស់5G។ រហូតមកដល់ពេលនេះ ក្រុមហ៊ុនផ្តល់សេវាទូរស័ព្ទ និងអ៊ីនធឺណិតនៅកម្ពុជាចំនួន៥ហើយ បានធ្វើតេស្តសាកល្បង បណ្តាញសេវាទូរស័ព្ទ5G នៅក្នុងប្រទេសកម្ពុជា។ នេះបើតាម លោក អ៊ឹម វត្ថា សមាជិកនិយ័តករទូរគមនាគមន៍កម្ពុជា។
ក្រុមហ៊ុន Cellcard របស់អ្នកឧកញ៉ា គិតម៉េង កាលពីចុងខែកុម្ភៈ កន្លងទៅបានធ្វើតេស្តសាកល្បង នូវបច្ចេកវិទ្យា 5G និងបានប្តេជ្ញាក្នុងការនាំយកបច្ចេកវិទ្យាថ្មីនេះ មកបម្រើជូនអតិថិជនរបស់ខ្លួននៅក្នុងឆ្នាំ២០២០។ នេះបើតាមសេចក្តីប្រកាសព័ត៌មានរបស់ក្រុមហ៊ុន។ ក្រៅពីក្រុមហ៊ុន Cellcard ក្រុមផ្តល់សេវាទូរស័ព្ទចំនួន៤ទៀត គឺក្រុមហ៊ុន Smart Axiata ក្រុមហ៊ុន Yes Seatel ក្រុមហ៊ុន Kingtel និងក្រុមហ៊ុន Viettel ក៏បានតេស្តសាកល្បងនូវប្រព័ន្ធបច្ចេកវិទ្យា 5G នេះនៅក្នុងប្រទេសកម្ពុជា។
ឆ្លើយតបនឹងសំនួរពីសារសំខាន់នៃបណ្តាញ5G, លោកអ៊ឹម វត្ថា បញ្ជាក់ថា ការប្រើប្រាស់បច្ចុប្បន្នរបស់ពលរដ្ឋកម្ពុជាលើប្រព័ន្ធ4G ហាក់មិនមានជាបញ្ហាចោទនោះទេ ប៉ុន្តែបើនិយាយពីឧស្សាហកម្ម៤.០ ដែលអ្វីៗដំណើរការដោយស្វ័យប្រវត្ត ដូចជាការបើកបរដោយស្វ័យប្រវត្តជាដើម នោះគេត្រូវប្រើប្រាជ្ញាសិប្បនិម្មិត (AI)ហើយចាំបាច់ត្រូវមានប្រព័ន្ធបច្ចេកវិទ្យា5G។
សូមជម្រាបជូនថា 5G គឺជាបច្ចេកវិទ្យាទូរគមនាគមន៍ជំនាន់ទី៥ បន្ទាប់ពីបច្ចេកវិទ្យាទូរគមនាគមន៍ជំនាន់ទី៤ ឬ 4G ដែលពិភពលោកបានស្គាល់និងប្រើប្រាស់នាពេលសព្វថ្ងៃនេះ។ ប្រព័ន្ធបច្ចេកវិទ្យា 5G មានសមត្ថភាពបញ្ជូនទិន្នន័យ ដែលមានទំហំកាន់តែធំជាងមុន ក្នុងល្បឿនលឿនជាងមុន ប្រៀបធៀបនឹងប្រពន្ធ4G៕
គួរបញ្ជាក់ថា កាលពីថ្ងៃទី២៨ ខែមេសា ឆ្នាំ២០១៩ កន្លងទៅក្រសួងប្រៃសណីយ៍ និងទូរគមនាគមន៍កម្ពុជា បានចុះកិច្ចព្រមព្រៀងមួយជាមួយក្រុមហ៊ុនបច្ចេកវិទ្យាគមនាគមន៍របស់ចិន គឺក្រុម Huawei ដើម្បីធ្វើការអភិវឌ្ឍបណ្តាញបច្ចេកវិទ្យា 5G នៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ