ជម្លោះដីធ្លីនៅសហគមន៍បុរីកីឡាក្រុងភ្នំពេញអាចនឹងបិទបញ្ចប់
ថ្ងៃនេះ ប្រជាសហគមន៍បុរីកីឡាក្រុងភ្នំពេញ និងក្រុមការងារពិសេសសិទ្ធិលំនៅដ្ឋាន ប្រជុំគ្នាដើម្បីត្រៀមធ្វើសន្និសីទសារព័ត៌មាននៅថ្ងៃស្អែក ជាមួយសាលារាជធានីភ្នំពេញ ទាក់ទងនឹងដំណោះស្រាយជម្លោះដីធ្លីរបស់ពួកគេ។ លទ្ធផលបឋមនៃដំណោះស្រាយដែលនឹងត្រូវបទផ្សាយនៅថ្ងៃស្អែកដែរនោះ ទំនងអាចបិទបញ្ចប់ជម្លោះដីធ្លីរ៉ាំរ៉ៃរបស់សហគមន៍បុរីកីឡានៅកណ្តាលរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:២៨
មួយថ្ងៃមុនការប្រកាសលទ្ធផលបឋមនៃការវាយតម្លៃលើលក្ខណៈសម្បត្តិរបស់គ្រួសារនីមួយៗដែលមិនទាន់ទទួលបានដំណោះស្រាយចំពោះជម្លោះដីធ្លីនៅបុរីកីឡា មានការប្រជុំមួយរវាងសហគមន៍បុរីកីឡា និងក្រុមការងារពិសេសសិទ្ធិលំនៅដ្ឋាន។ ជំនួបនៅរសៀលថ្ងៃព្រហស្បតិ៍គឺដើម្បីត្រៀមធ្វើសន្និសីទសារព័ត៌មានជាមួយលោក ប៉ា សុជាតិវង្ស អភិបាលសាលារាជធានីភ្នំពេញនៅថ្ងៃសុក្រ ដែលនៅក្នុងនោះមានការប្រកាសលទ្ធលបឋមជាផ្លូវការនៃដំណោះស្រាយដែលអាចនាំទៅដល់ការបញ្ចប់ជម្លោះដីធ្លី«ទាំងស្រុង»នៅបុរីកីឡា។
ដោយបានដឹងខ្លះៗថា សាលាក្រុងបានត្រៀមដីឡូតិ៍ ទទឹង៤មបណ្ដោយ៦ម និងផ្ទះទំហំ២០ម៉ែត្រក្រឡា នៅក្នុងខ័ណ្ឌពោធិ៍សែនជ័យ ជាយរាជធានីភ្នំពេញ អ្នកស្រី ឆាយ គឹមហ៊ន ដែលជាអ្នកតំណាងសហគមន៍បុរីកីឡា ថ្លែងថា ដំណោះស្រាយសម្រាប់ប្រជាពលរដ្ឋសេសសល់ទាំង«១៥៤គ្រួសារ»នោះ គឺ«គ្រាន់បើជាង»ការណ៍ដែលឱ្យប្រជាជនទៅនៅភ្នំបាតចម្ងាយ៤៥គីឡូម៉ែត្រពីភ្នំពេញ និងនៅទួលសំបូរចម្ងាយ៣០គីឡូម៉ែត្រពីក្រុង។
ដោយឡែក លោក សៀ ភារម្យ ប្រធានលេខាធិការដ្ឋានក្រុមការងារពិសេសសិទ្ធិលំនៅដ្ឋាន បានឱ្យដឹងថា ប្រមាណជា៣០ភាគរយនៃប្រជាជន«១៥២គ្រួសារ»ទំនងទទួលបានផ្ទះល្វែងសេសសល់នៅបុរីកីឡា អ្នកខ្លះប្រហែលទទួលបានដីនិងផ្ទះទំហំពី២០ទៅ២៤ម៉ែត្រការ៉េ នៅជាយក្រុងភ្នំពេញ ហើយអ្នកខ្លះទៀតដែលគ្មានលក្ខណៈសម្បត្តិគ្រប់គ្រាន់ អាចទទួលបានប្រាក់គោលនយោបាយ២លានរៀល ។ទោះបីជាយ៉ាងនេះក្តី អ្នកស្រី ឆាយ គឹមហ៊ន ក៏បានពោលផងដែរថា ទំហំដីនឹងផ្ទះក្នុងគម្រោងនោះនោះ អាច«ពិបាកទទួលយក»ចំពោះ«គ្រួសារដែលមានកូនច្រើន»។
អ្នកនាំពាក្យឱ្យសាលារាជធានីភ្នំពេញបានបញ្ជាក់ថា សន្និសីទសារព័ត៌មានមួយនឹងត្រូវធ្វើឡើងនៅថ្ងៃសុក្រ ក្នុងសាលាក្រុង ដើម្បីប្រកាលលទ្ធផលបឋម ហើយពលរដ្ឋមានពេលរហូតដល់ថ្ងៃទី៣០ ខែមេសា ឆ្នាំ២០១៥ ដើម្បីតវ៉ា។ បើតាមលោក ឡុង ឌីម៉ង់ ការវាយតម្លៃលើលក្ខណៈសម្បត្តិនោះគឺធ្វើឡើងតាមរយៈការពិភាក្សាគ្នា«ល្អិតល្អន់»ជាមួយប្រជាសហគមន៍ ក្រុមហ៊ុនផានអ៊ីម៉ិច និងអង្គការមិនមែនរដ្ឋាភិបាល ដោយគ្មាន«ការកេងចំណេញនយោបាយ»ឡើយ។
សូមរម្លឹកថា កាលពីឆ្នាំ២០០៣ រដ្ឋាភិបាលកម្ពុជាបានប្រគល់ដីបុរីកីឡាទៅឱ្យក្រុមហ៊ុនផានអ៊ីម៉ិច ដើម្បីធ្វើការអភិវឌ្ឍ ដោយសន្យាសាងសង់អាគារ១០ខ្នងសម្រាប់ឱ្យប្រជាជនរស់នៅ។ តាមជាក់ស្តែង ក្រុមហ៊ុនឯកជននេះ សង់បានតែ៨អាគារ ដោយបន្សល់ទុកឱ្យប្រជាជន៣៨០គ្រួសារគ្មានសំណង ហើយជម្លោះបានកើតឡើងខ្លាំងនៅឆ្នាំ២០១២ ពេលក្រុមហ៊ុនផានអ៊ីម៉ិចបំផ្លាញសម្បុករបស់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ