សហគមន៍ជនជាតិដើមភាគតិចបង្កើនការតស៊ូមតិកាន់តែខ្លាំង
សហគមន៍ដីធ្លីជនជាតិដើមភាគតិច ពូគង់ រួមជាមួយនឹងវេទិកានៃអង្គការមិនមែនរដ្ឋាភិបាល នានាបានសម្តែងនូវក្តីកង្វល់ និងទាមទារឲ្យរដ្ឋាភិបាលកម្ពុជាអន្តរាគមន៍ប្រកបដោយប្រសិទ្ធភាព ចំពោះការរំលោភដីធ្លីនៅ ស្រុកកែវសីមា ខេត្តមណ្ឌលគីរី។ នៅក្នុងជំនួបថ្ងៃស្អែកនៅទីក្រុងភ្នំពេញ ក្រុមប្រជាសហគមន៍ជនជាតិដើមភាគតិច នឹងថ្លែងពីការបាត់បង់ផលប្រយោជន៍របស់ពួកគេ និងគ្រោងស្នើទៅរដ្ឋាភិបាលជាថ្មីម្តងទៀតឲ្យជួយដោះស្រាយលើបញ្ហា របស់ពួកគេ។
ចុះផ្សាយនៅថ្ងៃ៖
ស្តាប់ - ០១:៥៦
សមាជិកសហគមន៍ពូគង់ ដោយមានការគាំទ្រផ្នែកច្បាប់ពីវេទិការនៃអង្គការមិនមែនរដ្ឋាភិបាលស្តីពីកម្ពុជា និងមជ្ឈមណ្ឌលអប់រំច្បាប់សម្រាប់សហគមន៍ នឹងរៀបចំសន្និសីទសារព័ត៌មានមួយនៅថ្ងៃពុធស្អែក នៅទីក្រុងភ្នំពេញ ដើម្បីសម្តែងពីការពិតនៃការរំលោភដីធ្លីនៅតំបន់ជនជាតិដើមភាគតិច ក្នុងភូមិពូគង់ ឃុំស្រែព្រះ ស្រុកកែវ សីមា ខេត្តមណ្ឌលគីរី។
លោក វណ្ណា ខ្វើក សមាជិកគណៈកម្មការសហគមន៍ភូមិពូគង់ បានប្រាប់វិទ្យុបារាំងអន្តរជាតិRFI នៅថ្ងៃអង្គារនេះថា លោកនឹងពឹងពាក់អ្នកច្បាប់ ដូចជាមេធាវីជាដើម ដើម្បីដាក់ពាក្យតវ៉ាទៅគណៈកម្មាដីធ្លី ដើម្បីទប់កាត់ការកាប់ទន្ទ្រានដីធ្លីពីសំណាក់ក្រុមហ៊ុនដីសម្បទានប៊ិញផឿក២ របស់វៀតណាម។ លោក វណ្ណា ខ្វើក បន្តថាដីអាស្រ័យផលនិងកន្លែងអារក្ខអ្នកតាតំបន់តំណមរបស់ជនជាតិដើមភាគតិច ត្រូវបានក្រុមហ៊ុនទន្ទ្រានចូលដីប្រជាជន លើសពីដីសម្បទានដែលរដ្ឋប្រគល់ឲ្យ។
ជាមួយគ្នានេះលោក ឯម សុភ័ក្ត្រ មន្ត្រីសម្របសម្រួលខេត្តរតនគីរី នៃមជ្ឈមណ្ឌលអប់រំច្បាប់សម្រាប់សហគមន៍ បានថ្លែងថាក្រុមហ៊ុនឈូសឆាយដីដែលជាកម្មសិទ្ធិរបស់សហគមន៍ និងកាប់បំផ្លាញដើមជ័រ ដែលជាអនុផលព្រៃឈើតែមួយគត់របស់ជនជាតិដើមភាគតិចក្នុងការរក្សាចំណូលសេដ្ឋកិច្ចប្រចាំថ្ងៃរបស់គ្រួសារនីមួយ។
មន្ត្រីខេត្តមណ្ឌលគីរី ក៏ដូចជារដ្ឋបាលព្រៃឈើមិនអាចទាក់ទងសុំការពន្យល់បានទេជុំវិញបញ្ហាដូចដែលបានលើកឡើងពីប្រជាពលរដ្ឋសហគមន៍នៅពេលនេះ។
សូមបញ្ជាក់ថា ក្រុមហ៊ុនប៊ិញផឿក២របស់វៀតណាម កាលពីឆ្នាំ២០១៣ បានទទួលដីសម្បទាន ចំនួនជិត៩ពាន់ហិចតា សម្រាប់កិច្ចសន្យា៧០ឆ្នាំ ដើម្បីធ្វើការអភិវឌ្ឍន៍ដំណាំកសិឧស្សាហកម្ម។ ចាប់ពីពេលនោះមកបញ្ហារំលោភដីធ្លី ដោយការបាត់បង់ដីនិងអនុផលជនជាតិដើមភាគតិច បានកើតមានជាបន្តបន្ទាប់ ក៏ប៉ុន្តែមិនឃើញមានការដោះស្រាយណាមួយអាចទទួលយកបានពីសហគមន៍ជនជាតិដើមភាគតិចនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ