បក្សប្រឆាំងនឹងយកផែនទីទិញពីបារាំងទៅផ្ទៀងផ្ទាត់ជាមួយផែនទីរដ្ឋាភិបាល និង UNនៅថ្ងៃចន្ទ
មន្ត្រីជាន់ខ្ពស់របស់គណបក្សសង្គ្រោះជាតិលោកអ៊ូ ច័ន្ទឫទ្ធិ បានឲ្យដឹងនៅថ្ងៃសៅរ៍ ទី០៨ សីហានេះ ថា គណបក្សសង្គ្រោះជាតិ នឹងប្រគល់ផែនទីដែលខ្លួនបានទិញនៅក្នុងប្រទេសបារាំងទៅដល់រដ្ឋាភិបាល ព្រះមហាក្សត្រ និង រាជបណ្ឌិត្យសភាកម្ពុជានៅថ្ងៃចន្ទ ដើមសប្តាហ៍ក្រោយ។ ការផ្តល់នេះ គឺ ដើម្បីយកទៅផ្ទៀងផ្ទាត់ជាមួយផែនទីរបស់រដ្ឋាភិបាល និង ផែនទីដែលខ្ចីពីអង្គការសហប្រជាជាតិ ដើម្បីបញ្ជាក់ថា មួយណាជាផែនទីដែលត្រឹមត្រូវ។
ចុះផ្សាយនៅថ្ងៃ៖
ស្តាប់ - ០១:៥២
ផែនទីដែលគណបក្សសង្គ្រោះជាតិគ្រោងផ្តល់ឲ្យស្ថាប័នពាក់ព័ន្ធទាំងនេះ គឺជាផែនទីបង្ហាញពីព្រំដែនកម្ពុជា វៀតណាមខ្នាត១/១០០.០០ បែបឌីជីថល(Digital)ចំនួន២៦ផ្ទាំង ដែលលោកសម រង្ស៊ី ប្រធានគណបក្សសង្គ្រោះជាតិ បានបញ្ជាទិញនៅក្នុងប្រទេសបារាំងក្នុងតម្លៃ១៦៨ដុល្លារអាមេរិក។
ការសម្រេចផ្តល់ផែនទីរបស់គណបក្សសង្គ្រោះជាតិនេះ គឺបានធ្វើឡើងបន្ទាប់ពីលោកបាន គីមូន អង្គការលេខាធិការអង្គការសហប្រជាជាតិកាលពីថ្ងៃទី០៥ សីហា បានសម្រេចឲ្យរដ្ឋាភិបាលកម្ពុជាខ្ចីផែនទីដែលខ្លួនបានតម្តល់ទុកនៅអង្គការសហប្រជាជាតិ។ ម្យ៉ាងទៀត ក៏ការជាឆ្លើយតបទៅកាន់រដ្ឋាភិបាលកម្ពុជាដែលទាមទារឲ្យគណបក្សប្រឆាំងបង្ហាញនូវផែនទីដែលខ្លួនមាននេះផងដែរ ។
លោកអ៊ូ ច័ន្ទឫទ្ធិ មន្ត្រីជាន់ខ្ពស់របស់គណបក្សសង្គ្រោះជាតិ បានបញ្ជាក់ថា ការប្រគល់ផែនទីនេះ គឺដើម្បីយកទៅផ្ទៀងផ្ទាត់ជាមួយផែនទីដែលរដ្ឋាភិបាលកំពុងប្រើប្រាស់សព្វថ្ងៃ និង ផែនទីដែលអង្គការសហប្រជាជាតិឲ្យរដ្ឋាភិបាលខ្ចី ដើម្បីបញ្ជាក់ថា មួយណាត្រឹមត្រូវ និងរកចំណុចរួមមួយដែលអាចទទួលយកបានទាំងអស់គ្នា។
សូមបញ្ជាក់ថា កន្លងមក ក្រុមតំណាងរាស្ត្រគណបក្សសង្គ្រោះជាតិ បានចោទរដ្ឋាភិបាលកម្ពុជាថា បានប្រើប្រាស់ផែនទីក្លែងក្លាយក្នុងការបោះគោលបង្គោលព្រំដែនជាមួយវៀតណាម ដែលបានធ្វើឲ្យកម្ពុជាខាតបង់ទឹកដី។ ការលើកឡើងនេះ បានបង្កើតជាភាពចម្រូងចម្រាសគ្នាយ៉ាងខ្លាំងរវាងរដ្ឋាភិបាល និងគណបក្សប្រឆាំងចំពោះរឿងព្រំដែនកម្ពុជា វៀតណាម។ ព្រំដែនកម្ពុជា វៀតណាម ដែលមិនទាន់បានបោះបង្គោលបញ្ចប់ និង កំពុងធ្វើឲ្យអ្នកនយោបាយខ្មែរមើលមុខគ្នាមិនចំ។
ដោយឡែក ចំពោះការផ្ទៀងផ្ទាត់ផែនទីវិញ រដ្ឋាភិបាលកម្ពុជា បានបង្កើតគណៈកម្មការមួយដែលមានរដ្ឋមន្ត្រីក្រសួងការបរទេសលោក ហោ ណាំហុង ជាប្រធាន លោកវ៉ា គឹមហុង ប្រធានគណៈកម្មការកិច្ចការចម្រុះព្រំដែន និង លោកអ៊ឹម ឈុនលឹម រដ្ឋមន្ត្រីក្រសួងដែនដី ជាអនុប្រធាន។ គណៈកម្មការនេះ នឹងចាត់ចែងសម្របសម្រួលការទទួល ប្រគល់និងការពិនិត្យផ្ទៀងផ្ទាត់ផែនទីរបស់អង្គការសហប្រជាជាតិ ដោយមានការចូលរួមពីគណបក្សប្រឆាំង រាជបណ្ឌិត្យសភាកម្ពុជា និងអ្នកជំនាញការងារផែនទីជាតិនិងអន្តរជាតិផងដែរ ដើម្បីឲ្យការផ្ទៀងផ្ទាត់ ធ្វើឡើងប្រកបដោយតម្លាភាពនិងភាពត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ