៥ខែដើមឆ្នាំ២០១៨៖ អាជ្ញាធរឃុំខ្លួនអ្នកជួញដូរគ្រឿងញៀនជាង៣ពាន់នាក់
នៅក្នុងប្រតិបត្តិការបង្ក្រាបគ្រឿងញៀនអស់រយៈពេល៥ខែដើមឆ្នាំ២០១៨នេះ អ្នកជួញដូរគ្រឿងញៀនជាង៣ពាន់នាក់ត្រូវបានបញ្ជូនទៅឃុំខ្លួនក្នុងពន្ធនាគារ។ ចំណែកអ្នកប្រើប្រាស់ជាង២៥០០នាក់បានបញ្ជូនទៅព្យាបាលឬប្រគល់ជូនទៅអាណាព្យាបាល។ នេះបើតាមការគូសបញ្ជាក់របស់ លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន។
ចុះផ្សាយនៅថ្ងៃ៖
លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងប្រាប់វិទ្យុបារាំងអន្តរជាតិនៅថ្ងៃអាទិត្យនេះថា បទល្មើសគ្រឿងញៀនជិត៤ពាន់ករណីត្រូវបានបង្ក្រាបនៅក្នុងរយៈពេល៥ខែដើមឆ្នាំ២០១៨នេះ ដោយឃាត់ខ្លួនអ្នកពាក់ព័ន្ធបានជាង៦ពាន់នាក់ ក្នុងនោះមានស្រីជាង៥០០នាក់។ ក្នុងចំណោមអ្នកដែលឃាត់ខ្លួនបានទាំង៦ពាន់នាក់ សមត្ថកិច្ចបានសម្រេចបញ្ជូនមនុស្សជាង៣ពាន់នាក់ទៅឃុំខ្លួននៅក្នុងពន្ធនាគារ ពាក់ព័ន្ធនឹងការជួញដូរគ្រឿងញៀន។
លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានកត់សម្គាល់ថា ប្រតិបត្តិការបង្ក្រាបគ្រឿងញៀនរយៈពេល៥ខែដើមឆ្នាំ២០១៨នេះមានការថយចុះ បើធៀបនឹងពេលវេលាដូចគ្នាក្នុងឆ្នាំ២០១៧។ ក្នុងឆ្នាំ២០១៧ អាជ្ញាធរបង្ក្រាបបទល្មើសគ្រឿងញឿនគ្រប់ប្រភេទកើនឡើងខ្លាំងជាងឆ្នាំ២០១៦ដល់ទៅជាង៩២ភាគរយ។ ក្នុងនោះ អាជ្ញាធរ ចាប់ឃាត់ខ្លួនជនសង្ស័យបាន១៧៧៩៥នាក់ មានស្រី១៥៨៤នាក់។ ចំណែកគ្រឿងញៀនវិញ អាជ្ញាធរបានរឹបអូសចំនួនជាង២៩៦គីឡូក្រាមឯណោះនៅក្នុងការបង្រ្កាបពេញមួយឆ្នាំ២០១៧កន្លងទៅ។
សូមបញ្ជាក់ថា មនុស្សជាង១ម៉ឺន៥ពាន់នាក់ ត្រូវបានបញ្ជូនទៅឃុំខ្លូនទាក់ទងបទល្មើសគ្រឿងញៀន ចាប់តាំងពីដើមឆ្នាំ២០១៧ ពោលគឺនៅពេលដែលអាជ្ញាធរប្រកាសបើកប្រតិបត្តិការក្ដៅថ្នាក់ជាតិ ដើម្បីបង្ក្រាបគ្រឿងញៀនខុសច្បាប់។ ចំនួនអ្នកជាប់ឃុំដែលកើនឡើងយ៉ាងគំហុកនេះ ធ្វើឲ្យមានភាពចង្អៀតណែននៅក្នងពន្ធនាគារ។ ប្រឈមបញ្ហានេះ លោក នុត សាវនា អគ្គនាយករងនៃអគ្គនាយកដ្ឋានពន្ធនាគារលើកឡើងថា អាជ្ញាធរកំពុងរកវិធានការណ៍ដោះស្រាយបញ្ហានេះ តាមរយៈកិច្ចសហការជាមួយដៃគូក្នុងស្រុក និងក្រៅស្រុក តាមរយៈការអនុវត្តទោសជំនួស ឬវិធីសាស្ត្រនៅក្នុងព្យាបាលអ្នកញៀនថ្នាំជាដើម។ ជុំវិញបញ្ហានេះ កន្លងមក មន្ត្រីនៃក្រសួងយុត្តិធម៌ធ្លាប់បង្ហើបថា ដំណោះស្រាយគឺការអនុវត្តទោសជំនួស ឬក៏វិសាលភាពនៃការពង្រីកពន្ធនាគារបន្ថែមទើបអាចកាត់បន្ថយភាពចង្អៀតណែននៅក្នុងពន្ធនាគារបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ