តំណាងក្រុមហ៊ុនអឺរ៉ុប៖ ការការពារសុវត្ថិភាពបុគ្គលិកខ្មែរនៅតាមការដ្ឋាន ដើរយឺតជាងចិន និងវៀតណាម
ក្លឹបអ្នកកាសែតកម្ពុជានិងតំណាងក្រុមហ៊ុនមកពីអឺរ៉ុប នៅថ្ងៃព្រហស្បតិ៍ទី១៥វិច្ឆិកានេះ បានរៀបចំកិច្ចពិភាក្សាមួយស្ដីពី ធុរកិច្ច និងសុវត្ថិភាពបុគ្គលិកការដ្ឋាន។ ក្នុងនោះតំណាងក្រុមហ៊ុនអឺរ៉ុបបានវាយតម្លៃជំហានបឋមថា ការការពារសុវត្ថិភាពបុគ្គលិកខ្មែរនៅតាមការដ្ឋាន ដើរយឺតជាងចិននិងវៀតណាម។ គួរកត់សម្គាល់ដែរថា ការវាយតម្លៃនេះធ្វើឡើងស្របពេលដែលការដ្ឋានសំណង់នៅកម្ពុជាកំពុងមានសន្ទុះកើនឡើងនាពេលបច្ចុប្បន្ន ទាំងនៅទីក្រុងនិងតាមបណ្ដាលខេត្ត។
ចុះផ្សាយនៅថ្ងៃ៖
លោក Michel Cassagnes (មីស៊ែ កាសាញ) ប្រធានគណៈកម្មការផ្នែកសំណង់និងអចលនទ្រព្យនៃសភាពាណិជ្ជកម្មអឺរ៉ុប និងជាតំណាងក្រុមហ៊ុនអឺរ៉ុប ឲ្យដឹងថា នៅកម្ពុជាសុវត្ថិភាពបុគ្គលិកនៅតាមការដ្ឋាន គួរត្រូវបានគិតគូរឲ្យបានមុនគេ។ ប៉ុន្តែទន្ទឹមនឹងការគិតគូរអំពីសុវត្ថិភាពនេះ គេក៏ត្រូវគិតដល់ការចំណាយលើសម្ភារៈការពារសុវត្ថិភាពផងដែរ។ នៅកម្ពុជា គេមិនទាន់ដឹងថា ស្ថាប័នណាមួយទទួលបន្ទុកចំពោះគ្រោះថ្នាក់នៅក្នុងការដ្ឋាននៅឡើយទេ។ ប៉ុន្តែកម្ពុជាគួរតែមានស្ថាប័នទទួលបន្ទុកនិងកត់ត្រាគ្រោះថ្នាក់ដែលកើតឡើងនៅក្នុងការដ្ឋាន បើទោះបីជាចំនួនគ្រោះថ្នាក់នៅតាមការដ្ឋានមានចំនួនមិនច្រើនដូចករណីគ្រោះថ្នាក់ចរាចរណ៍ក៏ដោយ។
ផ្ទុយពីកម្ពុជា ប្រទេសវៀតណាមមានស្ថាប័នមួយកត់ត្រាច្បាស់លាស់នូវចំនួនគ្រោះថ្នាក់នៅតាមការដ្ឋាន។ ដោយឡែក ប្រទេសនៅអឺរ៉ុបវិញ ពិសេសគឺប្រទេសបារាំងតែម្ដង អ្នកទទួលខុសត្រូវចំពោះសុវត្ថិភាពបុគ្គលិកតាមការដ្ឋាន នោះគឺក្រសួងសាងសង់និងក្រសួងការងារ។ បន្ថែមពីលើស្ថាប័នទទួលបន្ទុក មន្ត្រីនៃក្រសួងទទួលបន្ទុកទាំងពីរឧស្សាហ៍ចុះទៅត្រួតពិនិត្យការដ្ឋានសំណង់។ ហើយនៅប្រទេសបារាំង ឧបករណ៍ស្ទូចឆ្លងកាត់ផ្លូវអាចប្រើប្រាស់បាន ដរាបណាទទួលបានការអនុញ្ញាតពីអាជ្ញាធរជាមុនសិន។
លោក Michel Cassagnes ថា វិធានការបែបនេះគួរតែអនុវត្តផងដែរនៅក្នុងប្រទេសកម្ពុជា។ ក្រៅពីនេះសម្រាប់ប្រទេសកម្ពុជា ដើម្បីទប់ស្កាត់គ្រោះថ្នាក់ការដ្ឋាន គឺម្ចាស់ការដ្ឋានត្រូវពន្យល់អំពីគ្រោះថ្នាក់ក្នុងការដ្ឋានដែលងាយកើតមានក្នុងពេលបំពេញការងារ។
លោក Michel Cassagnes បានរំឭកថា សម្ភារៈការពារសុវត្ថិភាពបុគ្គលិកនៅក្នុងវិស័យសំណង់ចាំបាច់ត្រូវមាន៖ មួកដែកដើម្បីការពារអ្វីៗដែលធ្លាក់មកពីខាងលើ ស្បែកជើងសុវត្ថិភាពដែលមានបាតការពារឆក់ និងអាវរំលេចពន្លឺដើម្បីឲ្យគេមើលឃើញពីចំងាយ។ បើតាមលោក Cassagnes សុវត្ថិភាពបុគ្គលិកក្នុងការដ្ឋាន គួរត្រូវយកចិត្តទុកដាក់ឲ្យបានខ្ពស់ ព្រោះយ៉ាងហោចណាស់ នៅក្នុងការដ្ឋានសំណង់ដែលវិនិយោគលើអគារខ្ពស់ៗ ត្រូវការមនុស្សចន្លោះពី១ពាន់ទៅ២ពាន់នាក់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ