វិវាទផ្ទៃក្នុងគណបក្សប្រឆាំងនៅសៀមរាបមិនទាន់បានដោះស្រាយ
បន្ទាប់ពីបានជួបប្រជុំជាមួយសមាជិកតាមមូលដ្ឋានរបស់ខ្លួននៅខេត្តសៀមរាបកាលពីថ្ងៃព្រឹកថ្ងៃព្រហស្បតិ៍ម្សិលមិញទាក់ទងនឹងសំណើសុំដូរអ្នកស្រីកែ សុវណ្ណរតន៍ចេញពីប្រធានក្រុមការងារខេត្តនោះ ថ្នាក់ដឹកនាំគណបក្សសង្គ្រោះជាតិមិនទាន់បានសម្រេចបែបណាមួយនៅឡើយទេ។ ថ្នាក់ដឹកនាំបក្សប្រឆាំង កំពុងធ្វើការពិចារណាចំពោះករណីនេះ។ ប៉ុន្តែក្រុមប្រឆាំងលោកស្រីកែ សុវណ្ណរតន៍ បានព្រមានទុកជាមុនថា នឹងធ្វើការតវ៉ាជាថ្មី ប្រសិនបើលោកស្រីកែ សុវណ្ណរតន៍នៅមានវត្តមានក្នុងខេត្តសៀមរាបទៀតនោះ។
ចុះផ្សាយនៅថ្ងៃ៖
ស្តាប់ - ០២:៤៣
ការដូរ ឫមិនដូរ លោកស្រីកែ សុវណ្ណរតន៍ ចេញពីតំណែងជាប្រធានក្រុមការងារគណបក្សសង្គ្រោះជាតិប្រចាំខេត្តសៀមរាបនោះ គឺស្ថិតនៅក្នុងភាពមិនច្បាស់លាស់នៅឡើយ។ មិនទាន់ច្បាស់លាស់ គឺដោយសារតែថ្នាក់ដឹកនាំគណបក្សសង្គ្រោះជាតិ មិនទាន់បានធ្វើការសម្រេចបែបណាមួយនៅឡើយទេចំពោះករណីនេះ។
លោកសម រង្ស៊ី និង លោកកឹម សុខា ប្រធាន និងអនុប្រធានគណបក្សសង្គ្រោះជាតិ មិនអាចទាក់ទងការសុំបំភ្លឺបន្ថែមបាននោះទេជុំវិញរឿងនេះ នៅថ្ងៃសុក្រទី០៦ មីនា។ ប៉ុន្តែលោកអ៊ុំ សំអាន តំណាងរាស្ត្រគណបក្សសង្គ្រោះជាតិដែលបានចុះទៅដោះស្រាយបញ្ហានេះជាមួយលោកសម រង្ស៊ី និងលោកកឹម សុខា បានបញ្ជាក់ប្រាប់វិទ្យុបារាំងអន្តរជាតិពីខេត្តសៀមរាបថា ថ្នាក់ដឹកនាំគណបក្សប្រឆាំង កំពុងធ្វើការពិចារណាលើសំណុំរឿងលោកស្រីកែ សុវណ្ណរតន៍នេះ។
សូមជំរាបជូនថា កាលពីថ្ងៃព្រហស្បតិ៍លោកសម រង្ស៊ី និងលោកកឹម សុខា រួមទាំងតំណាងរាស្ត្រគណបក្សសង្គ្រោះជាតិមួយចំនួនទៀតបានចុះទៅជួបប្រជុំជាមួយក្រុមការងារតាមថ្នាក់មូលដ្ឋានរបស់ខ្លួននៅក្នុងខេត្តសៀមរាប ដើម្បីដោះស្រាយវិវាទផ្ទៃក្នុងគណបក្សនៅទីនោះ។ ជាវិវាទដែលសមាជិកបក្សមួយចំនួន បានស្នើសុំឲ្យដូរលោកស្រីកែ សុវណ្ណរតន៍ ចេញពីប្រធានក្រុមការងារខេត្តសៀមរាប ដោយពួកគេចោទថា លោកស្រីជាមនុស្សបក្ខពួកនិយម។ ហើយការជួបប្រជុំនេះគ្នានេះទៀតសោត គឺបានធ្វើឡើងបន្ទាប់ក្រុមប្រឆាំងលោកស្រីកែ សុវណ្ណរតន៍ បានធ្វើការតវ៉ាទាមទារដូរលោកស្រីចេញតំណែងនៅពីមុខទីស្នាក់ការកណ្តាលគណបក្សសង្គ្រោះជាតិនៅក្នុងទីក្រុងភ្នំពេញកាលពីថ្ងៃចន្ទ ដើមសប្តាហ៍នេះផងដែរ។
លោកមុត មល្លា ប្រធានគណៈកម្មាធិការប្រតិបត្តិគណបក្សសង្គ្រោះជាតិខេត្តសៀមរាបឲ្យដឹងថា ការប្រជុំកាលថ្ងៃព្រហស្បតិ៍នោះ មានសមាជិកគណបក្សសង្គ្រោះជាតិចូលរួមប្រមាណជិត៣០០នាក់ និងធ្វើឡើងជិតពីរម៉ោង។ ហើយនៅក្នុងកិច្ចប្រជុំពិភាក្សាសាធារណៈនោះដែរ សមាជិកក្រុមការងារខេត្តសៀមរាបទាំងអ្នកគាំទ្រ និងអ្នកប្រឆាំងលោកស្រីកែ សុវណ្ណរតន៍ សុទ្ធតែបានឡើងថ្លែងមតិផ្សេងៗរបស់ខ្លួនចំពោះលោកស្រីកែ សុវណ្ណរតន៍។
ក៏ប៉ុន្តែលោកគង់ សឿន អនុប្រធានគណៈកម្មាធិការប្រតិបត្តិថ្នាក់ខេត្ត បានចាត់ទុកការប្រជុំពិភាក្សានោះថា មិនមែនជាការដោះស្រាយបញ្ហានោះទេ តែផ្ទុយទៅវិញជាការសម្របសម្រួល។ ជាការសម្របសម្រួលដែលលោកគង់ សឿន មើលឃើញថា មានការលម្អៀងទៅខាងលោកស្រីកែ សុវណ្ណរតន៍ ។ បើតាមអ្នកប្រឆាំងលោកស្រី កែ សុវណ្ណរតន៍រូបនេះ សមាជិកក្រុមកាងារខេត្តដែលមិនគាំទ្រមិនត្រូវបានអនុញ្ញាតឲ្យឡើងថ្លែងមតិ និងបង្ហាញភស័តាងពីការប្រឆាំងរបស់ខ្លួននោះទេ។ ប្រឈមនឹងទង្វើបែបនេះ លោកគង់ សឿន បានព្រមានថា លោកនឹងដឹកនាំធ្វើបាតុកម្មតវ៉ាជាថ្មីប្រសិនបើលោកស្រីកែ សុវណ្ណរតន៍នៅធ្វើជាប្រធានក្រុមការងារខេត្តសៀមរាបដដែលនោះ។
យ៉ាងណាក៏ដោយ ទោះបីមិនទាន់បានសម្រេចបែបណាមួយចំពោះករណីលោកស្រី កែ សុវណ្ណរតន៍នេះក៏ពិតមែន ក៏ប៉ុន្តែថ្នាក់ដឹកនាំគណបក្សសង្គ្រោះជាតិគ្រោងនឹងផ្លាស់ប្តូរអនុប្រធានក្រុមការងារខេត្តសៀមរាបដោយដាក់បញ្ចូលលោកទួន យក់ដា តំណាងរាស្ត្រប្រចាំមណ្ឌលខេត្តកំពង់ចាមជំនួសអនុប្រធានចាស់ដែលត្រូវផ្លាស់ប្តូរទៅកាន់ខេត្តផ្សេង។ នេះបើតាមបង្ហើបឲ្យដឹងពីលោកអ៊ុំ សំអាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ