ក្រុមមេធាវីស្នើដកឧបករណ៍ថតរូបនិងស្រូបសម្លេងចេញពីបន្ទប់ឃុំខ្លួនលោក កឹម សុខា
ក្រុមមេធាវីការពារក្ដីលោក កឹម សុខា កាលពីថ្ងៃទី ១៥ កញ្ញា បានស្នើទៅចៅក្រមស៊ើបសួរសាលាដំបូងរាជធានីភ្នំពេញ ដកកាមេរ៉ាសុវត្ថិភាព និងឧបករណ៍ស្រូបសម្លេងផ្សេងៗចេញពីបន្ទប់ឃុំឃាំងលោក កឹម សុខា និងបន្ទប់ជួបសន្ទនាជាមួយមេធាវី។ បើតាមលិខិតនេះ ការបំពាក់កាមេរ៉ា សុវត្ថិភាពក្នុងបន្ទប់ឃុំឃាំង គឺផ្ទុយពីច្បាប់ស្ដីពីពន្ធនាគារ និងច្បាប់ក្នុងរដ្ឋធម្មនុញ្ញកម្ពុជា។ ក្រុមមេធាវីក៏ស្នើសុំយកសំណៅឯកសារពាក់ព័ន្ធចូលទៅជាមួយផងដែរ នៅពេលមានជំនួបជាមួយលោក កឹម សុខា។
ចុះផ្សាយនៅថ្ងៃ៖
លិខិតមួយច្បាប់របស់ក្រុមមេធាវីការពារក្ដីលោក កឹម សុខា ប្រធានគណបក្សសង្គ្រោះជាតិ បានជម្រាបលោក គី ឬទ្ធី ចៅក្រមស៊ើបសួរសាលាដំបូងរាជធានីភ្នំពេញថា នៅក្នុងបន្ទប់ឃុំខ្លួនលោក កឹម សុខា មានបំពាក់កាមេរ៉ាសុវត្ថិភាព។ ក្រុមមេធាវីបន្ដថា ការបំពាក់កាមេរ៉ានេះ គឺផ្ទុយនឹងមាត្រា ៣៨ កឋាខណ្ឌ១ នៃរដ្ឋធម្មនុញ្ញ និងមាត្រា ២៥ នៃច្បាប់ស្ដីពីពន្ធនាគារ។
បើតាមក្រុមមេធាវី នៅកន្លែងជួបប្រជុំរវាងលោក កឹម សុខា និងមេធាវី ក៏មានដែរការបំពាក់កាមេរ៉ាសុវត្ថិភាព ដែលក្រុមមេធាវីអះអាងថា នេះជាការផ្ទុយនឹងមាត្រា ៣១ នៃច្បាប់ស្ដីពីពន្ធនាគារ និងមាត្រា ១៤៩ នៃក្រមនីតិវិធីព្រហ្មទណ្ឌ។ អាស្រ័យដូចនេះ ក្រុមមេធាវីបានស្នើឲ្យយកកាមេរ៉ា និងឧបករណ៍ថតសម្លេងចេញពីបន្ទប់ទាំងនោះ។
ក្រៅពីនេះ ក្រុមមេធាវីការពារក្ដីឲ្យមេបក្សសង្គ្រោះជាតិ ក៏បានស្នើសុំយកឯកសារច្បាប់ និងសំណុំរឿង ចូលជួបពិគ្រោះយោបល់ជាមួយមេធាវី និងកូនក្ដីផងដែរ។ ក្រុមមេធាវីបានជម្រាបចៅក្រមស៊ើបសួរថា ចាប់តាំងពីថ្ងៃចូលជួបលើកដំបូង និងការសន្ទនារវាងកូនក្ដី និងមេធាវី មន្ដ្រីពន្ធនាគារមិនបានអនុញ្ញាតឲ្យយក ប៊ិច សៀវភៅច្បាប់ ក្រដាសស និងឯកសារសំណុំរឿង កាន់ចូលជួបលោក កឹម សុខា ទេ។ ក្រុមមេធាវីចាត់ទុកថា ទង្វើនេះធ្វើឲ្យប៉ះពាល់សិទ្ធិស្មើគ្នាចំពោះមុខច្បាប់ និងផ្ទុយពីមាត្រា ១៤៩ នៃក្រមនីតិវិធីព្រហ្មទណ្ឌ។
ក្រុមមេធាវីក៏បានស្នើផ្ដល់វិទ្យុមួយគ្រឿងដល់លោក កឹម សុខ សម្រាប់ស្ដាប់ផងដែរ។ បើតាមក្រុមមេធាវី មាត្រា ៣៧ នៃច្បាប់ស្ដីពីពន្ធនាគាចែងថា កូនក្ដីរបស់លោកអាចទទួលបានវិទ្យុមួយគ្រឿងសម្រាប់ស្ដាប់ ដែលក្រុមគ្រួសារគាត់នឹងទិញជូន។
លោក សំ សុគង់ មេធាវីម្នាក់របស់លោក កឹម សុខា បានបញ្ជាក់ប្រាប់វិទ្យុបារាំងនៅថ្ងៃ១៦ កញ្ញានេះថា លោករំពឹងទុកថា ចៅក្រមស៊ើបសួរសាលាដំបូងនឹងពិចារណាដោយផ្អែកលើអង្គហេតុ និងនីតិវិធីច្បាប់ជាចំបង។ បើតាមលោក សំ សុគង់ ចៅក្រមស៊ើបសួរគួរដកកាមេរ៉ា និងអនុញ្ញាតឲ្យយកសំណៅឯកសារច្បាប់ផ្សេងៗ ដើម្បីឲ្យមេធាវីអាចពន្យល់កូនក្ដីអំពី សិទ្ធិនិងផ្លូវច្បាប់ដល់កូនក្ដី។
វិទ្យុបារាំងមិនអាចសុំការឆ្លើយតបពីលោក លី សុផាន់ណា អ្នកនាំពាក្យសាលាដំបូងរាជធានីភ្នំពេញបានទេ ដោយលោកបញ្ជាក់ថា លោកកំពុងបំពេញបេសកម្មនៅក្រៅប្រទេស មិនអាចបកស្រាយបានទេ។
គួររម្លឹកថា ក្រុមមេធាវីការពារក្តីលោក កឹម សុខា កាលពីថ្ងៃចន្ទដើមសប្តាហ៍នេះក៏បានដាក់ពាក្យបណ្តឹងជំទាស់ចំនួនពីរ ទៅតុលាការផងដែរ។ បណ្តឹងមួយ ដាក់ទៅកាន់សាលាដំបូងរាជធានីភ្នំពេញ ដើម្បីឲ្យទម្លាក់ចោលការចោទប្រកាន់លើលោក កឹម សុខា ហើយបណ្តឹងមួយទៀត ដាក់ទៅកាន់សាលាឧទ្ធរណ៍ ដើម្បីសុំជំទាស់នឹងដីការបស់សាលាដំបូងរាជធានីភ្នំពេញ ក្នុងការឃុំខ្លួនលោក កឹម សុខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ