លោកកឹម សុខា អំពាវនាវជាថ្មីកុំឲ្យសមាជិកភ្ញាក់ផ្អើលនឹងរឿងរ៉ាវដែលកើតឡើងលើបក្សប្រឆាំង
ចំពោះមុខរឿងរ៉ាវដែលបានកើតឡើងលើគណបក្សសង្គ្រោះជាតិនាពេលចុងក្រោយនេះ បង្ខំឲ្យលោកកឹម សុខា ប្រធានស្តីទីគណបក្សប្រឆាំងចេញមុខអំពាវនាវម្តងជាពីរដងទៅដល់សមាជិក និងសកម្មជនរបស់ខ្លួនកុំឲ្យមានការភ្ញាក់ផ្អើល។ តាមលោកកឹម សុខា រឿងដែលសំខាន់សម្រាប់គណបក្សសង្គ្រោះជាតិ គឺដំណើរឆ្ពោះទៅរកការបោះឆ្នោតនាពេលខាងមុខឯណោះទេ។
ចុះផ្សាយនៅថ្ងៃ៖
ស្តាប់ - ០២:២៥
តាមរយៈទំព័រហ្វេសប៊ុករបស់ខ្លួនកាលពីរសៀលថ្ងៃព្រហស្បតិ៍ លោកកឹម សុខា ប្រធានស្តីទីគណបក្សសង្គ្រោះជាតិបានប្រាប់ថ្នាក់ដឹកនាំមូលដ្ឋានគណបក្សសង្គ្រោះជាតិខេត្តកណ្ដាលថា លោកដឹងពីការឈឺចាប់របស់ពួកគេចំពោះភាពអយុត្តិធម៌ដែលកើតមានចំពោះគណបក្សសង្គ្រោះជាតិ ប៉ុន្តែការឈឺចាប់មិនអាចបញ្ចប់បានឡើយបើគណបក្សសង្គ្រោះជាតិមិនបន្តការខិតខំតស៊ូ អត់ធ្មត់ដោយរួបរួមគ្នាឲ្យកាន់តែរឹងមាំឡើងទេនោះ។ លោកកឹម សុខា បានសូមឲ្យសមាជិករបស់ខ្លួនប្រែក្លាយការឈឺចាប់ ដើម្បីជោគជ័យវិញ ហើយលោកថា គណបក្សសង្គ្រោះជាតិមានកិច្ចការច្រើនណាស់ដែលត្រូវធ្វើចំពោះមុខនេះ។ ដូច្នេះលោកអំពាវនាវឲ្យពួកគេផ្ដោតលើកិច្ចការរបស់គណបក្សជាជាងការភ្ញាក់ផ្អើលនូវអ្វីដែលលោកកឹម សុខា សង្កត់ធ្ងន់ថា “គេបង្ក បង្កើតដើម្បីរំខានគណបក្សសង្គ្រោះជាតិនោះ។
នេះ មិនមែនជាលើកទីមួយនោះទេដែលលោកកឹម សុខាបានលើកឡើងដូច្នេះ។ កាលពីថ្ងៃទី៣១ មករាកន្លងទៅ គឺនៅពេលជួបជាមួយថ្នាក់ដឹកនាំមូលដ្ឋានគណបក្សសង្គ្រោះជាតិខេត្តកំពង់ចាម លោកប្រធានស្តីទីគណបក្សប្រឆាំង ក៏បានអំពាវនាវកុំឲ្យសមាជិករបស់ខ្លួនភ្ញាក់ផ្អើលនឹងរឿងរ៉ាវដែលកើតឡើងមកលើគណបក្សសង្គ្រោះជាតិផងដែរ គឺផ្តោតសំខាន់តែលើការបោះឆ្នោតបានហើយ។
ការអំពាវនាវម្តងជាពីរដងរបស់លោកកឹម សុខា បានកើតឡើង បន្ទាប់ពីរូបលោកផ្ទាល់ត្រូវខ្ទាតចេញពីតំណែងជាប្រធានក្រុមមតិភាគតិចនៅក្នុងរដ្ឋសភាតាមរយៈការធ្វើវិសោធនកម្មប្រការ៤៨ថ្មី(បី)នៃបទបញ្ជាផ្ទៃក្នុងរដ្ឋសភារបស់តំណាងរាស្ត្រគណបក្សប្រជាជនកម្ពុជា។
លើសពីនេះទៅទៀត លោកសម រង្ស៊ី ប្រមុខគណបក្សប្រឆាំងដែលស្ថិតក្រៅប្រទេសនោះ ក៏ត្រូវបានលោកហ៊ុន សែនលើកឡើងពីលទ្ធភាពនៃការលក់ទីស្នាក់ការគណបក្សសង្គ្រោះជាតិ ដើម្បីយកលុយសងសំណងជំងឺចិត្តក្នុងសំណុំបរិហារកេរ្ត៍លើរូបលោកទៀតផង។ អ្វីដែលធ្ងន់ធ្ងរជាងនេះ គឺលោកនាយករដ្ឋមន្ត្រីក៏បានបញ្ជាឲ្យក្រុមការងាររបស់លោកព្រាងវិសោធនកម្មច្បាប់ស្តីពីគណបក្សនយោបាយ ដើម្បីរឹតបន្តឹងដល់គណបក្សទាំងអស់ ដែលនេះ គឺអាចនឹងជះឥទ្ធិពលមិនល្អទាល់តែសោះដល់គណបក្សប្រឆាំង។ ម្យ៉ាងវិញទៀត លោកប្រមុខរដ្ឋាភិបាលកម្ពុជា ក៏បានប្រកាសបិទផ្លូវក្នុងការលើកលែងទោសដល់លោកហុង សុខហួរ និងលោកអ៊ុំ សំអានថែមទៀត។ ស្របពេលគ្នានេះដែរ តំណាងរាស្ត្របក្សប្រឆាំងខ្លះ ក៏ស្រាប់មានការបែកធ្លាយរឿងអាស្រូវផ្លូវភេទលើបណ្តាញសង្គមហ្វេសប៊ុក។
សម្រាប់លោកកឹម សុខា លោកយល់ថា គណបក្សសង្គ្រោះជាតិស្ទើតែមិនចាំបាច់និយាយច្រើនទេ ព្រោះសាធារណៈមតិ ទាំងជាតិ និងអន្ដរជាតិ ជាពិសេសប្រជាពលរដ្ឋខ្មែរ បានឃើញ បានឮ និងបានយល់អស់ហើយថាតើអ្នកណាបានធ្វើនូវអ្វីដែលប៉ះពាល់ដល់ផលប្រយោជន៍ជាតិ ឬ ប៉ះពាល់ដល់ប្រជាពលរដ្ឋខ្មែរនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ